തൃശ്ശൂര്‍: റെയ്ഡിനിടെ പിടിച്ചെടുത്ത 1000 ലിറ്റര്‍ സ്പിരിറ്റ് 1240 ലിറ്റര്‍ സാനിറ്റൈസറാക്കി ആരോഗ്യ കേന്ദ്രങ്ങള്‍ക്കും പ്രധാന ആശപത്രികള്‍ക്കും വിതരണം ചെയ്താണ് എക്സൈസ് ഉദ്യോഗസ്ഥര്‍ മാതൃകയായത്. കഴിഞ്ഞ ഓണക്കാലത്ത് എക്സൈസ് സ്പെഷല്‍ ഡ്രൈവിന്റെ ഭാഗമായി പിടികൂടിയ സ്പിരിറ്റ് സാനിറ്റൈസറാക്കിയാണ് തൃശൂര്‍ എക്സൈസ് ഓഫീസ്‌ ഇത്തരത്തില്‍ വിതരണം നടത്തിയത്.
എന്‍ഫോഴ്സ്മെന്റ് പ്രവര്‍ത്തനത്തിനിടെയാണ് 1000 ലിറ്റര്‍ സ്പിരിറ്റ് എക്സൈസ് പിടികൂടുന്നത്. തുടര്‍ന്ന് കോടതി നടപടികള്‍ക്ക് ശേഷം ജില്ലാ ഭരണകൂടത്തിന്റെ ശുപാര്ശയോട് കൂടി എക്സൈസ് കമ്മീഷണര്‍ 1000 ലിറ്റര്‍ സ്പിരിറ്റ് സാനിറ്റൈസര്‍ ആക്കാന്‍ നിര്‍ദേശം നല്‍കി. കുട്ടനെല്ലൂരിലെ സ്വകാര്യ ഫാര്‍മസ്യൂട്ടിക്കലിന്റെ സഹായത്തോടെയാണ് എക്സൈസ് സ്പിരിറ്റിനെ സാനിറ്റൈസറാക്കി മാറ്റിയത്.
തൃശൂരിലെ 2 ജനറല്‍ ആശുപത്രികള്‍, 2 ജില്ലാ ആശുപത്രികള്‍, 6 താലൂക്ക് ആശുപത്രികള്‍, 25 സി.എച്ച്‌.സികള്‍, 79 പി.എച്ച്‌.സികള്‍, ജില്ലയിലെ സി.എഫ്.എല്‍.ടി.സികള്‍ എന്നിവയ്ക്കാണ് എക്സൈസ് സാനിറ്റൈസര്‍ നല്‍കിയത്.
ഡെപ്യൂട്ടി ഡി.എം.ഒ. കെ.എന്‍. സതീഷിന് ജില്ലാ കലക്ടര്‍ എസ് ഷാനവാസ് സാനിറ്റൈസറുകള്‍ കൈമാറി. അസി. എക്സൈസ് കമ്മീഷണര്‍ വി.എ. സലിം, എക്സൈസ് വിമുക്തി കോര്‍ഡിനേറ്റര്‍ കെ.കെ. രാജു, റെജി ജിയോ തോമസ് എന്നിവര്‍ ചടങ്ങില്‍ പങ്കെടുത്തു.
