വിംബിള്‍ഡണ്‍ ബോയ്സ് കിരീടം നേടി ഇൻഡ്യൻ വംശജനായ സമീര്‍ ബാനര്‍ജി. വെറും രണ്ട് ഗ്രാന്‍ഡ്സ്ലാം മത്സരത്തില്‍ മാത്രം പങ്കെടുത്താണ് ഇന്തോ അമേരിക്കന്‍ ടെന്നീസ് താരമായ ന്യൂജേഴ്സിക്കാരന്‍റെ ഈ മിന്നുന്ന നേട്ടം സ്വന്തമാക്കിയത്. ഒരുമണിക്കൂറും 22 മിനിറ്റും നീണ്ട പോരാട്ടത്തിനൊടുവിലാണ് വിക്ടര്‍ ലിലോവിനെ പതിനേഴുകാരനായ സമീര്‍ പരാജയപ്പെടുത്തിയത്.
”നന്നായി കളിക്കണമെന്നും ഒരു റൌണ്ടിലെങ്കിലും ജയിക്കണമെന്ന ലക്ഷ്യത്തോടെയുമായിരുന്നു ടൂര്‍ണമെന്‍റിന് എത്തിയത്. എങ്ങനെയാണ് ഇത്തരമൊരു പ്രകടനം ഗ്രാസ് കോര്‍ട്ടില്‍ കാഴ്ച വയ്ക്കാനായതെന്ന് അറിയില്ല, ഏറ്റവും മികച്ച പ്രകടനം കാഴ്ച വയ്ക്കണമെന്ന ഉദ്ദേശമേ തനിക്കുണ്ടായിരുന്നുള്ളു” സമീര്‍ പറയുന്നു. സമീറിന്‍റെ ആദ്യ ജൂനിയര്‍ ഗ്രാന്‍ഡ് സ്ലാം നേട്ടമാണ് ഇത്.
അസമിലാണ് സമീറിന്‍റെ പിതാവ് ജനിച്ചത്. ആന്ധ്രപ്രദേശിലാണ് സമീറിന്‍റെ അമ്മ വളര്‍ന്നത്. 1980കളുടെ മധ്യത്തോടെ ഇവര്‍ അമേരിക്കയിലേക്ക് കുടിയേറുകയായിരുന്നു. കൊളംബിയ സര്‍വ്വകലാശാലയില്‍ ഡിഗ്രി പഠനത്തിന് ഒരുങ്ങുകയാണ് സമീര്‍. ഏറെക്കാലമായി ജൂനിയര്‍ ഗ്രാന്‍ഡ് സ്ലാം നേട്ടങ്ങളില്ലാതിരുന്ന അമേരിക്കയ്ക്ക് ഏറെ പ്രതീക്ഷ നല്‍കുന്നതാണ് സമീറിന്‍റെ നേട്ടം.
