സാൻ ഫ്രാൻസിസ്കോ: ആഗോളതലത്തിൽ മൈക്രോസോഫ്റ്റിന്റെ വിവിധ ഓൺലൈൻ സേവനങ്ങൾ മണിക്കൂറുകളോളം തടസ്സപ്പെട്ടത് കോടിക്കണക്കിന് ഉപയോക്താക്കളെ വലച്ചു. വെള്ളിയാഴ്ച പുലർച്ചെ മുതൽ ഏഴ് മണിക്കൂറിലധികം സമയമാണ് മൈക്രോസോഫ്റ്റ് 365, ഔട്ട്‌ലുക്ക് (Outlook), ടീംസ് (Teams), കോപൈലറ്റ് (Copilot) തുടങ്ങിയ പ്രധാന സേവനങ്ങൾ പൂർണ്ണമായും തടസ്സപ്പെട്ടത്. സെർവറുകളിൽ ഉണ്ടായ അപ്രതീക്ഷിത സാങ്കേതിക തകരാറുകളാണ് ഈ വൻ പ്രതിസന്ധിക്ക് കാരണമായതെന്ന് മൈക്രോസോഫ്റ്റ് ഔദ്യോഗികമായി പ്രതികരിച്ചു.
മൈക്രോസോഫ്റ്റിന്റെ സേവനങ്ങൾ തടസ്സപ്പെട്ടത് പ്രമുഖ നിർമ്മിത ബുദ്ധി (AI) പ്ലാറ്റ്‌ഫോമുകളായ ഓപ്പൺഎഐ (OpenAI), ആന്ത്രോപിക് (Anthropic) എന്നിവയുടെ പ്രവർത്തനങ്ങളെയും സാരമായി ബാധിച്ചു. ഈ എഐ കമ്പനികൾ ഉപയോഗിക്കുന്ന മൈക്രോസോഫ്റ്റ് 365 കണക്ടറുകൾ തകരാറിലായതോടെ പല എഐ ടൂളുകളുടെയും പ്രവർത്തനം മണിക്കൂറുകളോളം നിലച്ചു. ഇതോടെ ആഗോളതലത്തിൽ ഐടി മേഖലയിലുള്ളവരും കോർപ്പറേറ്റ് സ്ഥാപനങ്ങളും വലിയ പ്രതിസന്ധിയിലായി. ഇമെയിലുകൾ അയക്കാനോ ഓൺലൈൻ മീറ്റിംഗുകളിൽ പങ്കെടുക്കാനോ സാധിക്കാതെ വന്നതോടെ ഉപയോക്താക്കൾ സമൂഹമാധ്യമങ്ങളിലൂടെ വ്യാപകമായി പരാതികൾ ഉന്നയിച്ചു.
ഓൺലൈൻ സേവനങ്ങളുടെ തടസ്സങ്ങൾ നിരീക്ഷിക്കുന്ന വെബ്‌സൈറ്റായ ‘ഡൗൺ ഡിറ്റക്ടറിന്റെ’ (Downdetector) കണക്കുകൾ പ്രകാരം, വെള്ളിയാഴ്ച പുലർച്ചെ 1.30-ഓടെയാണ് തകരാർ ഏറ്റവും രൂക്ഷമായത്. ഈ സമയത്ത് ഔട്ട്‌ലുക്ക് സേവനങ്ങൾ തടസ്സപ്പെട്ടതായി 1,38,058-ലധികം പരാതികളാണ് രേഖപ്പെടുത്തിയത്. തുടർന്ന് പുലർച്ചെ 4.30-ഓടെ പരാതികളുടെ എണ്ണം ഏകദേശം 34,490 ആയി കുറഞ്ഞെങ്കിലും സേവനങ്ങൾ പൂർണ്ണതോതിൽ പുനഃസ്ഥാപിക്കാൻ മണിക്കൂറുകൾ വേണ്ടിവന്നു. അപ്രതീക്ഷിതമായുണ്ടായ സെർവർ തകരാർ പരിഹരിക്കാൻ എൻജിനീയറിങ് വിഭാഗം യുദ്ധകാലാടിസ്ഥാനത്തിൽ ഇടപെട്ടതായും നിലവിൽ ഭൂരിഭാഗം സേവനങ്ങളും സാധാരണ നിലയിലായതായും മൈക്രോസോഫ്റ്റ് അറിയിച്ചു.
