ന്യൂഡൽഹി: ഞാൻ ദൈവത്തെ കണ്ടു!. ലോകസിനിമയിൽ പരീക്ഷണങ്ങളിലൂടെ അത്ഭുതങ്ങൾ തീർത്ത വിഖ്യാത സംവിധായകൻ സ്റ്റീവൻ സ്പിൽബർഗിനെ നേരിട്ട് കണ്ട നിമിഷത്തെക്കുറിച്ച് സംവിധായകൻ എസ്എസ് രാജമൗലിയുടെ വാക്കുകളാണിത്. ഗോൾഡൻ ഗ്ലോബ് പുരസ്‌കാര വിതരണത്തിനിടെയായിരുന്നു കൂടിക്കാഴ്ച. ഇൻസ്റ്റഗ്രാമിലൂടെ ഇതിന്റെ ചിത്രങ്ങൾ പങ്കുവെച്ചുകൊണ്ടായിരുന്നു ഞാൻ ദൈവത്തെ കണ്ടു എന്ന് രാജമൗലി കുറിച്ചത്.
രണ്ട് ചിത്രങ്ങളാണ് അദ്ദേഹം പോസ്റ്റ് ചെയ്തത്. ആദ്യ ചിത്രത്തിൽ അത്ഭുതം കാണുന്ന ഒരു കൊച്ചുകുട്ടിയെപ്പോലെ കൈപ്പത്തികൾ കവിളിൽ വെച്ചിരിക്കുന്ന രാജമൗലിയെ കാണാം. രണ്ടാമത്തെ ചിത്രത്തിൽ മികച്ച ഒറിജനൽ ഗാനത്തിനുളള ഗോൾഡൻ ഗ്ലോബ് നേടിയ സംഗീത സംവിധായകൻ എംഎം കീരവാണിയും ഒപ്പം ഉണ്ട്.
സ്റ്റീവൻ സ്പിൽബർഗ് ആയിരുന്നു മികച്ച സംവിധായകനുളള ഗോൾഡൻ ഗ്ലോബ് ഇക്കുറി നേടിയത്. സ്പിൽബർഗിന്റെ ദ ഫേബിൾമാൻസ് ആയിരുന്നു മികച്ച ചിത്രമായി തിരഞ്ഞെടുക്കപ്പെട്ടത്. ഈ ചിത്രം ഫെബ്രുവരി 10 ന് ഇന്ത്യയിൽ റിലീസ് ചെയ്യാനിരിക്കെയാണ് ഇരുവരുടെയും കൂടിക്കാഴ്ചയെന്നതും ശ്രദ്ധേയമായി.
എംഎം കീരവാണിയും ചിത്രങ്ങൾ ഇൻസ്റ്റഗ്രാമിൽ പങ്കുവെച്ചിട്ടുണ്ട്. ഗോൾഡൻ ഗ്ലോബ് നേടിയ തന്റെ നാട്ടു നാട്ടു എന്ന ഗാനം ഇഷ്ടപ്പെട്ടുവെന്ന് സ്പിൽബർഗ് പറഞ്ഞത് വിശ്വസിക്കാനാകുന്നില്ലെന്ന് ആയിരുന്നു ഒരു ചിത്രം പങ്കുവെച്ച് അദ്ദേഹം കുറിച്ചത്. സിനിമയുടെ ദൈവത്തെ കാണാൻ അവസരം ലഭിച്ചുവെന്നും അദ്ദേഹത്തിന്റെ ചിത്രങ്ങൾ വളരെയേറെ താൻ ഇഷ്ടപ്പെടുന്നുവെന്ന് ആ ചെവിയിൽ പറയുവാനും സാധിച്ചുവെന്ന് കീരവാണി കുറിച്ചു.
