കഴിഞ്ഞ വര്‍ഷം ജനുവരി മുതല്‍ സര്‍ക്കാര്‍ ഓഫീസുകളില്‍ ഷാര്‍ജ നടപ്പിലാക്കിയ ആഴ്ചയില്‍ മൂന്ന് ദിവസം അവധി വന്‍ വിജയം. ഇത് നടപ്പിലാക്കിയ ശേഷം ഉദ്യോഗസ്ഥരുടെ ഉല്‍പ്പാദനക്ഷമതയില്‍ 88 ശതമാനവും തൊഴില്‍ സംതൃപ്തിയില്‍ 90 ശതമാനവും വര്‍ധന ഉണ്ടായതായി ഔദ്യോഗിക റിപ്പോര്‍ട്ട്.
വെള്ളി, ശനി, ഞായര്‍ ദിവവസങ്ങളാണ് ഷാര്‍ജ സര്‍ക്കാര്‍ ഗവണ്‍മെന്റ് സ്ഥാപനങ്ങളിലെ ഉദ്യോഗസ്ഥര്‍ക്ക് അവധി നല്‍കിയിരിക്കുന്നത്. ഈ പുതിയ സംവിധാനത്തെ കുറിച്ചുള്ള ഔദ്യോഗിക അവലോകനത്തില്‍ ഉദ്യോഗസ്ഥരുടെ ഹാജര്‍ നിലയില്‍ 74 ശതമാനം വര്‍ധനയും സിക്ക് ലീവില്‍ 46 ശതമാനം കുറവും രേഖപ്പെടുത്തി. മാത്രമല്ല, ഔദ്യോഗിക ജോലിസമയത്ത് പുറമേ നല്‍കുന്ന ഇ-സേവനങ്ങളില്‍ 61 ശതമാനം വര്‍ധനയും രേഖപ്പെടുത്തി.
ഉദ്യോഗസ്ഥരുടെ തൊഴില്‍ പ്രകടനം 90 ശതമാനം മെച്ചപ്പെട്ടു. പുതിയ അവധി സംവിധാനത്തില്‍ 91 ശതമാനം ഉദ്യോഗസ്ഥരും സന്തുഷ്ടരാണ്. പുതിയ തീരുമാനം മാനസികാരോഗ്യം മെച്ചപ്പെടുത്താന്‍ സഹായിച്ചതായി 87 ശതമാനം പേര്‍ അഭിപ്രായപ്പെട്ടു. മാ്ത്രമല്ല, തൊഴില്‍,കുടുംബ ജീവിതം ഒന്നിച്ചുകൊണ്ടുപോകാനും തീരുമാനം സഹായകരമായതായി ഏറെപ്പേര്‍ അഭിപ്രായപ്പെട്ടു.
ഷാര്‍ജ എക്‌സിക്യുട്ടീവ് കൗണ്‍സില്‍ യോഗത്തിലാണ് പുതിയ അവധി സംവിധാനം സംബന്ധിച്ച അവലോകന റിപ്പോര്‍ട്ട് അവതരിപ്പിച്ചത്. ഷാര്‍ജ കിരീടാവകാശിയും ഉപ ഭരണാധികാരിയുമായ ഷേഖ് സുല്‍ത്താന്‍ ബിന്‍ മുഹമ്മദ് ബിന്‍ സുല്‍ത്താന്‍ അല്‍ ഖാസിമി യോഗത്തിന് അധ്യക്ഷത വഹിച്ചു.
