ആര്‍ട്ടിഫിഷ്യല്‍ ഇന്റെലിജന്‍സ് അഥവാ കൃത്രിമബുദ്ധി നിലവില്‍ വന്നിട്ട് കാലങ്ങളായി. കുറേ വര്‍ഷങ്ങളായി ഇത് പല മേഖലകളിലും ഉപയോഗിച്ച് വരുന്നും ഉണ്ട്. എങ്കിലും കുറച്ച് ദിവസങ്ങളായി എഐ ആണ് സോഷ്യല്‍മീഡിയയിലെ ചര്‍ച്ചാവിഷയം. മെഡിക്കല്‍ പരീക്ഷ പാസാകാനും പ്രസംഗം പറയാനും അടക്കം പല മേഖലകളിലായി പല കാര്യങ്ങളും ചെയ്യാന്‍ കഴിയുന്ന രീതിയിലേക്ക് എഐ വളര്‍ന്നിരിക്കുന്നു. ഇങ്ങനെ എല്ലാ കാര്യങ്ങളും എഐ ചെയ്താല്‍ മനുഷ്യന് ചെയ്യാന്‍ ജോലികള്‍ ഇല്ലാതാകില്ലേ എന്ന ആശങ്കയും അതിനൊപ്പം ഉയരുന്നുണ്ട്. അതെക്കുറിച്ചുള്ള ചര്‍ച്ചകളും ഒരു വശത്ത് നടക്കുന്നുണ്ട്.
പക്ഷേ എഐയുടെ ഈ വരവും അത് പലതിനും പകരമാകുന്നതുമെല്ലാം നേരത്തെ പ്രവചിച്ചിരുന്നുവെന്നാണ് ഇപ്പോള്‍ നെറ്റിസണ്‍സ് കണ്ടെത്തിയിരിക്കുന്നത്. എവിടെയാണെന്നല്ലേ, നമ്മുടെയെല്ലാം പ്രിയപ്പെട്ട കാര്‍ട്ടൂണ്‍ ആയ ടോം ആന്‍ഡ് ജെറിയില്‍. ഈ കണ്ടെത്തലിന്റെ വീഡിയോ സോഷ്യല്‍ മീഡിയയില്‍ പ്രചരിക്കുന്നുണ്ട്. വീഡിയോയില്‍ നമ്മുടെ ജെറി എലിയെ പിടിക്കാന്‍ ഓടിപ്പാഞ്ഞ് നടക്കുന്ന ടോം പൂച്ചയുടെ ജോലിയാണ് ആര്‍ട്ടിഫിഷ്യല്‍ ഇന്റെലിജന്‍സ് ഇല്ലാതാക്കിയിരിക്കുന്നത്. ടോമിന് പകരം റോബോട്ട് പൂച്ച വളരെ വിദഗ്ധമായി ജെറിയെ പിടിക്കുന്നതാണ് വീഡിയോയില്‍ ഉള്ളത്. ഐഎഎസ് ഓഫീസറായ സുപ്രിയ സാഹു ആണ് ഈ കണ്ടെത്തല്‍ ട്വിറ്ററില്‍ പങ്കുവെച്ചിരിക്കുന്നത്. ‘ആറുപത് വര്‍ഷങ്ങള്‍ക്ക് മുമ്പ്, യന്ത്രങ്ങളും ആര്‍ട്ടിഫിഷ്യല്‍ ഇന്റെലിജന്‍സും കൊണ്ട് ജോലി നഷ്ടപ്പെട്ട ആദ്യത്തെ ആള്‍ ടോം ആണെ’ന്ന രസകരമായ അടിക്കുറിപ്പും സുപ്രിയ എഴുതിയിട്ടുണ്ട്.
60 years ago, Tom was the first one to lose his job because of Machines and Artificial Intelligence. Now 😝#TomandJerry #Wednesdayvibes pic.twitter.com/EhWMbnZYLA
— Supriya Sahu IAS (@supriyasahuias) March 1, 2023
വീഡിയോയില്‍ ടോമിന്റെ ഉടമസ്ഥ ടോമിനെ വിളിച്ച് എലിപിടിത്തക്കാരന്‍ എന്ന നിലയില്‍ ടോമിന് ചെയ്യാനാകാത്തത് മികച്ച രീതിയില്‍ ചെയ്യുന്ന റോബോട്ട് പൂച്ചയായ മെക്കാനോയെ പരിചയപ്പെടുത്തുന്നതും കാണാം. “മെക്കാനോ-നാളത്തെ പൂച്ച, ഭക്ഷണം ആവശ്യമില്ല. രോമം വൃത്തിയാക്കണ്ട, ബഹളവുമില്ല, മിടുക്കനും വിശ്വസ്തനും” എന്ന നോട്ട് വീഡിയോയ്‌ക്കൊപ്പം ഉണ്ട്. ഉടമസ്ഥ മെക്കാനോ ഓണ്‍ ചെയ്യുമ്പോള്‍ റോബോട്ടിക് പൂച്ച വിജയകരമായി ജെറിയെ പിടിക്കുന്നതും വീടിന് വെളിയിലേക്ക് തൂക്കി എറിയുന്നതും കാണാം. വീഡിയോയുടെ അവസാനം നിരാശനായ ടോം തന്റെ ബാഗ് പാക്ക് ചെയ്ത്, തൊഴില്‍ നഷ്ടപ്പെടുന്ന വേദനയോടെ വീടു വിടുന്ന രംഗമാണുള്ളത്.
