തിരുവനന്തപുരം: സംസ്ഥാനത്ത് വരും മണിക്കൂറുകളിൽ മഴയ്ക്ക് സാദ്ധ്യതയെന്ന് കാലാവസ്ഥാ നിരീക്ഷണ കേന്ദ്രം. എറണാകുളം, ഇടുക്കി എന്നീ ജില്ലകളിലാണ് മഴയ്ക്ക് സാദ്ധ്യതയുള്ളത്. ഇതോടെ ഇരു ജില്ലകളിലും ചൂടിന് നേരിയ ആശ്വാസം ലഭിക്കും.
വരുന്ന മൂന്ന് മണിക്കൂറിനുള്ളിൽ മഴ ലഭിക്കുമെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്. ചിലയിടങ്ങളിൽ കാറ്റ് വീശിയേക്കാം. ഇടിമിന്നലിനും സാദ്ധ്യതയുണ്ട്. അതിനാൽ ആളുകൾ ജാഗ്രത പുലർത്തണമെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു.
സംസ്ഥാനത്ത് കഴിഞ്ഞ ദിവസം മുതലാണ് വേനൽ മഴ ആരംഭിച്ചത്. വരും ദിവസങ്ങളിലും മഴ തുടരും. ചൊവ്വാഴ്ച കൊല്ലം, പത്തനംതിട്ട, ഇടുക്കി, എറണാകുളം എന്നീ ജില്ലകളിലെ ഒറ്റപ്പെട്ടയിടങ്ങളിൽ മഴ ലഭിച്ചേക്കാം. ബുധനാഴ്ച തെക്കൻ കേരളത്തിലാണ് മഴയ്ക്ക് സാദ്ധ്യതയുള്ളത്. വ്യാഴാഴ്ച തെക്കൻ- മദ്ധ്യ കേരളത്തിൽ മഴ ലഭിക്കുമെന്നും കാലാവസ്ഥാ നിരീക്ഷണ കേന്ദ്രം അറിയിച്ചു.












