കൊൽക്കത്ത: ഐപിഎല്ലിൽ കൊൽക്കത്ത നൈറ്റ് റൈഡേഴ്സിനെതിരെ ഗുജറാത്ത് ടൈറ്റൻസിന് തകർപ്പൻ ജയം. 7 വിക്കറ്റിനാണ് ഗുജറാത്ത് കൊൽക്കത്തയെ തകർത്തത്. ടോസ് നഷ്ടമായി ബാറ്റിംഗിനിറങ്ങിയ കൊൽക്കത്ത 20 ഓവറിൽ 7 വിക്കറ്റ് നഷ്ടത്തിൽ 179 റൺസ് എടുത്തു. മറുപടി ബാറ്റിംഗിൽ ഗുജറാത്ത് 17.5 ഓവറിൽ 3 വിക്കറ്റ് നഷ്ടത്തിൽ ലക്ഷ്യം കാണുകയായിരുന്നു.
39 പന്തിൽ 81 റൺസ് അടിച്ചുകൂട്ടിയ ഓപ്പണർ ഗുർബാസ് ആണ് കൊൽക്കത്തയ്ക്ക് മികച്ച സ്കോർ സമ്മാനിച്ചത്. മദ്ധ്യനിര പതറിയെങ്കിലും 19 പന്തിൽ 34 റൺസ് നേടിയ ആന്ദ്രെ റസൽ അവസാന നിമിഷം കൊൽക്കത്തക്ക് വേണ്ടി പൊരുതി. ഗുജറാത്തിന് വേണ്ടി മുഹമ്മദ് ഷമി 3 വിക്കറ്റ് വീഴ്ത്തി. നൂർ അഹമ്മദ് 4 ഓവറിൽ 21 റൺസ് വഴങ്ങിയും ജോഷ്വാ ലിറ്റിൽ 4 ഓവറിൽ 21 റൺസ് വഴങ്ങിയും 2 വീതം വിക്കറ്റുകൾ വീഴ്ത്തി.
മറുപടി ബാറ്റിംഗിൽ ഗുജറാത്തിന് ഭേദപ്പെട്ട തുടക്കമാണ് ലഭിച്ചത്. ഓപ്പണിംഗ് വിക്കറ്റിൽ വൃദ്ധിമാൻ സാഹയും ശുഭ്മാൻ ഗില്ലും ചേർന്ന് 4.1 ഓവറിൽ 41 റൺസ് ചേർത്തു. അവസാന നിമിഷം കൂറ്റൻ അടികളിലൂടെ 24 പന്തിൽ 51 റൺസുമായി പുറത്താകാതെ നിന്ന ഓൾ റൗണ്ടർ വിജയ് ശങ്കർ ആണ് ഗുജറാത്തിന്റെ ടോപ് സ്കോറർ. ശുഭ്മാൻ ഗിൽ 49 റൺസെടുത്തു. ഡേവിഡ് മില്ലർ 32 റൺസുമായി പുറത്താകാതെ നിന്നു.
