മാങ്ങ ഇഷ്ടമില്ലാത്തവര്‍ വളരെ ചുരുക്കമായിരിക്കും. കുട്ടികള്‍ക്കും മുതിര്‍ന്നവര്‍ക്കും ഒരുപോലെ പ്രിയപ്പെട്ട പഴമാണ്, ഫലങ്ങളുടെ രാജാവായ മാമ്പഴം. കാത്തിരുന്ന മാമ്പഴ സീസണ്‍ വന്നെത്തിയിരിക്കുകയാണ്. നിരവധി മാമ്പഴ ഇനങ്ങളാണ് ഇത്തവണയും വിപണി കയ്യടക്കാന്‍ എത്തിയിരിക്കുന്നത്. സൂപ്പര്‍ മാര്‍ക്കറ്റുകളിലെല്ലാം മാമ്പഴ ഫെസ്റ്റ് പൊടിപൊടിക്കുകയാണ്. കഠിന ചൂടിന് ആശ്വസമായി വെറുതെ മുറിച്ചുകഴിച്ചും ജ്യൂസടിച്ചും ഷെയ്ക്ക് ആക്കിയും സ്മൂത്തി ആയും എല്ലാം ആളുകള്‍ മാമ്പഴ സീസണ്‍ ശരിക്കും ആഘോഷിക്കുകയാണ്.
നാടന്‍ ഇനങ്ങള്‍ക്ക് പുറമേ, പേരിലും കാഴ്ചയിലുമെല്ലാം പുതുമയുമായി പല ഇനങ്ങളിലുള്ള മാമ്പഴങ്ങള്‍ വിപണിയില്‍ കിട്ടാനുണ്ട്. ഓരോ വെറൈറ്റിയുടെയും രുചിയും വ്യത്യസ്തമാണ്. ശരീരത്തിന് ആവശ്യമായ വൈറ്റമിനുകളും ധാതുക്കളും ആന്റിഓക്‌സിഡന്റുകളും അടങ്ങിയ മാമ്പഴം വേനല്‍ക്കാലത്ത് ശരീരത്തിലെ ജലാംശം നിലനിര്‍ത്തിയും മറ്റുപല രോഗങ്ങളെ അകറ്റിനിര്‍ത്തി ആരോഗ്യത്തെ സംരക്ഷിക്കുകയും ചെയ്യുന്നു.
പക്ഷേ, ഏവരുടെയും പ്രിയപ്പെട്ട പഴമാണ് മാമ്പഴമെങ്കിലും അധികമായാല്‍ മാമ്പഴവും പ്രശ്‌നക്കാരനാണ്. അധികമായി മാമ്പഴം കഴിക്കുന്നത് ഉദരപ്രശ്‌നങ്ങള്‍ അടക്കം പല ആരോഗ്യപ്രശ്‌നങ്ങളും ഉണ്ടാക്കും.വയറ് സ്തംഭനം, അതിസാരം, വയറുവേദന, പുണ്ണ്, ദഹനക്കേട് തുടങ്ങിയ പ്രശ്‌നങ്ങളാണ് സാധാരണയായി അമിതമായി മാങ്ങ കഴിച്ചാലുണ്ടാകുന്ന പ്രശ്‌നങ്ങള്‍. ഇതിന് പുറമേ, പെട്ടെന്ന് പഴുക്കാനും കേടുകൂടാതെ ഇരിക്കാനുമായി മാങ്ങയില്‍ അടിക്കുന്ന കീടനാശിനികള്‍ മാമ്പഴത്തെ വിഷലിപ്തമാക്കുന്നു. അതിനാല്‍ കടയില്‍ നിന്ന് വാങ്ങിക്കുന്ന മാങ്ങ കുറഞ്ഞത് 2 മണിക്കൂറെങ്കിലും വെള്ളത്തില്‍ ഇട്ടുവെച്ച ശേഷമേ ഉപയോഗിക്കാവൂ എന്ന് ആരോഗ്യവിദഗ്ധര്‍ മുന്നറിയിപ്പ് നല്‍കുന്നു.
വിഷമടിക്കാത്ത മാമ്പഴം കഴിച്ചാലും ആരോഗ്യപ്രശ്‌നങ്ങള്‍ ഉണ്ടാകാം
നിരവധി പോഷകങ്ങളും ശരീരത്തിന് വേണ്ട വൈറ്റമിനുകളും മാമ്പഴത്തില്‍ അടങ്ങിയിട്ടുണ്ടെങ്കിലും ഫ്രക്ടോസ് എന്ന പേരിലുള്ള കാര്‍ബോഹൈഡ്രേറ്റും മാങ്ങയില്‍ അടങ്ങിയിരിക്കുന്നു. രക്തത്തിലെ പഞ്ചസാരയുടെ അളവ് കൂട്ടുന്ന വസ്തുവാണ് ഫ്രക്ടോസ്. ചിലയാളുകളില്‍ മാങ്ങ അലര്‍ജിക്ക് കാരണമാകും. മാങ്ങ കഴിക്കുമ്പോള്‍ അവരുടെ തൊണ്ടയില്‍ പ്രശ്‌നങ്ങള്‍ അനുഭവപ്പെടുന്നത് ഇതുകൊണ്ടാണ്.
ഇതിനെല്ലാം പുറമേ, കൃത്രിമമായി പഴുപ്പിക്കുന്ന മാങ്ങകളില്‍ അടിക്കുന്ന കീടനാശിനികള്‍ രക്തത്തിലെ ഗ്ലൂക്കോസിന്റെയും ട്രൈഗ്ലിസറൈഡുകളുടെയും സന്തുലിതാവസ്ഥ താറുമാറാക്കുന്നു. ഇക്കാരങ്ങള്‍ കൊണ്ട് തന്നെ മാങ്ങ അധികമായി കഴിക്കുന്നത് ഒഴിവാക്കണമെന്ന് ആരോഗ്യവിദഗ്ധര്‍ നിര്‍ദ്ദേശിക്കുന്നു.
ഒരു ദിവസം എത്ര മാങ്ങ
ഒറ്റയടിക്ക് ഒരു മാങ്ങ മുഴുവന്‍ കഴിക്കാതെ അത് രണ്ടായി ഭാഗിച്ച് രണ്ടുതവണയായി കഴിക്കുന്നതാണ് ആരോഗ്യത്തിന് ഏറ്റവും നല്ലതെന്ന് ബെംഗളൂരുവിലെ ആസ്റ്റര്‍ സിഎംഐ ആശുപത്രിയിലെ ക്ലിനിക്കല്‍ ന്യൂട്രീഷന്‍ ഡയറ്റെറ്റിക്‌സ് വിഭാഗം മേധാവിയായ ഡോ. എഡ്വിന രാജ് പറയുന്നു. ഫ്രക്ടോസ് ധാരാളമായി അടങ്ങിയിരിക്കുന്നത് കൊണ്ട് മാങ്ങ കഴിക്കുന്നത് മൂലം രക്തത്തിലെ പഞ്ചസാരയുടെ അളവ് കൂടാതിരിക്കാന്‍ ഭക്ഷണത്തിനൊപ്പം കഴിക്കാതെ ഇടനേരങ്ങളില്‍ മാങ്ങ മാത്രമായി കഴിക്കുന്നതാണ് നല്ലത്.
മാങ്ങ കൊണ്ടുള്ള ആരോഗ്യപ്രശ്‌നങ്ങള്‍- പ്രതിവിധിയെന്ത്?
അമിതമായി മാങ്ങ കഴിച്ച് ഏതെങ്കിലും രീതിയിലുളള ശാരീരിക അസ്വസ്ഥതകള്‍ ഉണ്ടായാല്‍ ഉടനൊരു ഡോക്ടറെ കാണുക. അത്തരം സാഹചര്യങ്ങളില്‍ തൈര്, മോര് തുടങ്ങിയ പ്രോബയോട്ടിക് ഭക്ഷണങ്ങളും ധാരാളം വെള്ളവും കുടിക്കണം. മാങ്ങ അമിതമായി കഴിച്ചത് കൊണ്ട് അതിസാരമോ വയറിനുള്ളില്‍ അണുബാധയോ ഉണ്ടായെങ്കില്‍ ഫൈബര്‍ അധികമുള്ള ഭക്ഷണപദാര്‍ത്ഥങ്ങളും പഴങ്ങളും ഒഴിവാക്കണം.
