ഹിമാലയൻ മലനിരകളെ കീഴടക്കി ലോകത്തിലെ ഏറ്റവും ഉയർന്ന റെയിൽവേ സ്റ്റേഷനും അതിവേഗ ബുള്ളറ്റ് ട്രെയിൻ ഇടനാഴിയും ഒരുക്കാൻ ഇന്ത്യ സജ്ജമാകുന്നു. ഹിമാചൽ പ്രദേശിലെ ബിലാസ്പൂറിനെ ലഡാക്കിലെ ലേയുമായി ബന്ധിപ്പിക്കുന്ന തന്ത്രപ്രധാനമായ ബിലാസ്പൂർ-മണാലി-ലേ (Bilaspur-Manali-Leh) റെയിൽവേ ലൈ പദ്ധതിയുടെ പ്രധാന വിവരങ്ങൾ പുറത്തുവന്നു. സമുദ്രനിരപ്പിൽ നിന്ന് ഏകദേശം 5,256 മീറ്റർ ഉയരത്തിൽ തങ്‌ലാങ് ലാ (Tanglang La) എന്ന സ്ഥലത്താണ് ഈ റെയിൽവേ സ്റ്റേഷൻ നിർമ്മിക്കാൻ പദ്ധതിയിടുന്നത്. നിലവിൽ 5,068 മീറ്റർ ഉയരത്തിലുള്ള ചൈനയുടെ തങ്ഗൂള (Tanggula) റെയിൽവേ സ്റ്റേഷനെ മറികടന്ന് ഇത് ലോകത്തിലെ ഏറ്റവും ഉയർന്ന റെയിൽവേ സ്റ്റേഷനായി മാറും.
ഏകദേശം 489 കിലോമീറ്റർ നീളമുള്ള ഈ പാത സുന്ദർനഗർ, മണ്ടി, മണാലി, സിസ്സു, ദാർച്ച, കേലോങ്, സർച്ചു, പങ്, റുംത്സെ, ഉപ്ഷി, ഖാരു തുടങ്ങി മനോഹരമായ വിനോദസഞ്ചാര-സാഹസിക കേന്ദ്രങ്ങളിലൂടെയാണ് ലേയിലെത്തുന്നത്. അതികഠിനമായ ഭൂപ്രകൃതിയിലൂടെ കടന്നുപോകുന്ന പാതയുടെ 270 കിലോമീറ്ററോളം ദൂരം തുരങ്കങ്ങളിലൂടെയാണ് നിർമ്മിക്കുന്നത്. 1.31 ലക്ഷം കോടി രൂപയോളം ചെലവ് പ്രതീക്ഷിക്കുന്ന ഈ പദ്ധതി യാഥാർത്ഥ്യമാകുന്നതോടെ ലഡാക്കിലേക്കുള്ള യാത്രയിലും രാജ്യത്തിന്റെ അതിർത്തി സുരക്ഷയിലും വലിയ വിപ്ലവമാകും ഉണ്ടാകുക.
ഇതോടൊപ്പം തന്നെ, ദില്ലിയെ ഗുവഹാത്തിയുമായി ബന്ധിപ്പിക്കുന്ന ‘നോർത്തേൺ ബുള്ളറ്റ് ട്രെയിൻ ഇടനാഴിക്ക്’ (Northern Bullet Train Corridor) പ്രധാനമന്ത്രി നരേന്ദ്ര മോദി അംഗീകാരം നൽകിയതായി കേന്ദ്ര റെയിൽവേ മന്ത്രി അശ്വിനി വൈഷ്ണവ് അറിയിച്ചു. ദില്ലി, ആഗ്ര, കാൺപൂർ, ലഖ്‌നൗ, അയോധ്യ, വാരണാസി, പ്രയാഗ്‌രാജ്, പട്‌ന, സിലിഗുരി വഴി ഗുവഹാത്തിയിലെത്തുന്ന ഈ അതിവേഗ പാത ഉത്തർപ്രദേശിലെ ആദ്യ ബുള്ളറ്റ് ട്രെയിൻ സേവനമായിരിക്കും. ഈ പാത നിലവിൽ വരുന്നതോടെ ദില്ലിയിൽ നിന്ന് കാൺപൂരിലേക്ക് 1 മണിക്കൂർ 45 മിനിറ്റും, ആഗ്രയിലേക്ക് 59 മിനിറ്റും, ലഖ്‌നൗവിലേക്ക് 2 മണിക്കൂർ 12 മിനിറ്റും, വാരണാസിയിലേക്ക് 3 മണിക്കൂർ 35 മിനിറ്റും കൊണ്ട് എത്തിച്ചേരാൻ സാധിക്കും.
