ശ്രീകാര്യം പാങ്ങപ്പാറയിൽ പ്ലസ് വൺ വിദ്യാർത്ഥി അഭിരാമിനെ അതിക്രൂരമായി കൊലപ്പെടുത്തിയ കേസിൽ പൊലീസിനെ വഴിതെറ്റിക്കാൻ പ്രതികൾ നടത്തിയത് കൃത്യമായ പദ്ധതികളെന്ന് വെളിപ്പെടുത്തൽ. സംഭവസമയത്ത് പ്രതി സ്ഥലത്തില്ലെന്ന് വരുത്തിതീർക്കാൻ ഉമർ എന്ന രണ്ടാം പ്രതി ഫോൺ തന്ത്രം ഉപയോഗിച്ചപ്പോൾ, തെളിവുകൾ നശിപ്പിക്കാനും വ്യാജ തെളിവുകൾ ഉണ്ടാക്കാനും സഹായിച്ചതിന് കാമുകി ഐശ്വര്യയും പൊലീസ് പിടിയിലായി. കൊലപാതകത്തെക്കുറിച്ച് കൃത്യമായ ധാരണയുണ്ടായിരുന്ന ഐശ്വര്യയുടെ അറസ്റ്റ് പൊലീസ് രേഖപ്പെടുത്തിയിട്ടുണ്ട്.
കൊലപാതകം നടന്ന ഞായറാഴ്ച തന്റെ ഫോൺ വീട്ടിൽ വെച്ച ശേഷമാണ് രണ്ടാം പ്രതിയായ ഉമർ സംഭവസ്ഥലത്തേക്ക് പോയത്. ഈ സമയം ഉമർ വീട്ടിലുണ്ടെന്ന് ടവർ ലൊക്കേഷൻ വഴി വരുത്തിതീർക്കാൻ കാമുകിയായ ഐശ്വര്യ നിരന്തരം ഈ ഫോണിലേക്ക് വിളിച്ചുകൊണ്ടിരുന്നു. കൃത്യം നടത്തി തിരികെ വീട്ടിലെത്തിയ ശേഷം ‘പതിനേഴുകാരൻ അഭിരാമിനെ അവൻ കൊന്നു, അവൻ അനുഭവിക്കട്ടെ’ എന്ന സന്ദേശം ഉമർ സ്വന്തം ഇൻസ്റ്റഗ്രാം അക്കൗണ്ട് വഴി ഐശ്വര്യക്ക് അയച്ചു നൽകുകയും ചെയ്തു. പ്രായപൂർത്തിയാകാത്ത ഒന്നാം പ്രതി മാത്രമാണ് കൊലപാതകം നടത്തിയത് എന്ന് വരുത്തിതീർത്ത് ശിക്ഷയിൽ നിന്ന് രക്ഷപ്പെടാനായിരുന്നു ഈ നീക്കം.
എന്നാൽ പ്രതികളുടെ ആസൂത്രിത നീക്കങ്ങളെല്ലാം പൊലീസിന്റെ ചോദ്യം ചെയ്യലിൽ പൊളിയുകയായിരുന്നു. ഉമറിന് രണ്ട് ഫോണുകൾ ഉണ്ടായിരുന്നുവെന്നും, കേസിലെ നിർണ്ണായക ദൃശ്യങ്ങളും ഡിജിറ്റൽ തെളിവുകളും അടങ്ങിയ ഒരു ഫോൺ നശിപ്പിച്ചു കളഞ്ഞിരിക്കാൻ സാധ്യതയുണ്ടെന്നുമാണ് അന്വേഷണ സംഘത്തിന്റെ വിലയിരുത്തൽ. കേസിൽ ഉൾപ്പെട്ട മറ്റ് പ്രതികൾക്കായി തെരച്ചിൽ ഊർജ്ജിതമാക്കിയ പൊലീസ്, സംഭവത്തിലെ ഗൂഢാലോചനയെക്കുറിച്ച് കൂടുതൽ അന്വേഷണം നടത്തിവരികയാണ്.
