ന്യൂഡൽഹി: 1996-ൽ ഒപ്പുവെച്ച ചരിത്രപ്രസിദ്ധമായ ഫറക്ക ഗംഗാ ജല പങ്കുവെക്കൽ കരാറിന്റെ (Farakka Ganga Water Sharing Treaty) മുപ്പത് വർഷത്തെ കാലാവധി 2026 ഡിസംബർ 12-ന് അവസാനിക്കാനിരിക്കെ, ബംഗ്ലാദേശിന് കർശന നിലപാടുകളുമായി ഇന്ത്യ. കരാർ അതേപടി പുതുക്കണമെന്ന ധാക്കയുടെ ആവശ്യം തള്ളിയ ഇന്ത്യ, രാജ്യത്തിന്റെ ആഭ്യന്തര ജലസുരക്ഷയ്ക്കും സംസ്ഥാനങ്ങളുടെ താല്പര്യങ്ങൾക്കുമാണ് ഒന്നാമതായി മുൻഗണന നൽകുന്നതെന്ന് വ്യക്തമാക്കി.
മുൻ ഭരണാധികാരി ഷെയ്ഖ് ഹസീനയുടെ കാലത്ത് നിലനിന്നിരുന്ന നയതന്ത്ര സൗഹൃദ അന്തരീക്ഷത്തിന് പകരം, നിലവിലെ ബംഗ്ലാദേശ് നാഷണൽ പാർട്ടി (BNP) സർക്കാരും മറ്റ് രാഷ്ട്രീയ പ്രതിപക്ഷ ഗ്രൂപ്പുകളും സ്വീകരിക്കുന്ന ഇന്ത്യ വിരുദ്ധ നിലപാടുകൾ ഉഭയകക്ഷി ചർച്ചകളെ സങ്കീർണ്ണമാക്കിയിട്ടുണ്ട്. കൃഷിക്ക് വെള്ളം കുറയുന്ന വരണ്ട മാസങ്ങളിൽ 80 ശതമാനം വരെ സ്ഥിരമായ കുറഞ്ഞ ജലപ്രവാഹം വേണമെന്ന ബംഗ്ലാദേശിന്റെ 1977-ലെ മാതൃകയിലുള്ള പിടിവാശി ഇന്ത്യ പൂർണ്ണമായും തള്ളി. അതിന് പകരം, നദിയിലെ യഥാർത്ഥ ജലലഭ്യതയ്ക്ക് അനുസൃതമായി മാറ്റിമറിക്കാവുന്ന വഴക്കമുള്ള (Flexible Formula) ക്രമീകരണം മാത്രമേ അംഗീകരിക്കൂവെന്ന് ന്യൂഡൽഹി വ്യക്താമാക്കി. ഇത് ബംഗാൾ, ബിഹാർ തുടങ്ങിയ ഇന്ത്യൻ സംസ്ഥാനങ്ങളുടെ കുടിവെള്ള, കാർഷിക, വ്യവസായ ആവശ്യങ്ങൾക്ക് സുരക്ഷ ഉറപ്പാക്കും.
ഇതുകൂടാതെ, ദീർഘകാലത്തേക്ക് ഒരു കരാറുണ്ടാക്കുന്നതിന് പകരം വളരെ ചുരുങ്ങിയ കാലാവധിയുള്ള പുതിയൊരു ചട്ടക്കൂട് നിർമ്മിക്കാനാണ് ഇന്ത്യ താല്പര്യപ്പെടുന്നത്. നദിയിലെ ജലപ്രവാഹ വ്യതിയാനങ്ങളും അയൽരാജ്യത്തെ രാഷ്ട്രീയ മാറ്റങ്ങളും നിരന്തരം വിലയിരുത്താൻ ഇത് ഇന്ത്യക്ക് അധികാരം നൽകും. വ്യാപാരം, അതിർത്തി സുരക്ഷ, ട്രാൻസിറ്റ് ഇടനാഴികൾ എന്നിവയിലുള്ള പരസ്പര സഹകരണം മുൻനിർത്തി മാത്രമേ ജല കരാറിൽ ഇന്ത്യ അന്തിമ തീരുമാനമെടുക്കൂവെന്നും നയതന്ത്ര വൃത്തങ്ങൾ അറിയിച്ചു.
