നടൻ ഷൈൻ ടോം ചാക്കോയുടെ അഭിമുഖങ്ങളെല്ലാം സമൂഹമാദ്ധ്യമങ്ങളിൽ വൈറലാകാറുണ്ട്. ചോദ്യങ്ങളോടുള്ള താരത്തിന്റെ അപ്രതീക്ഷിതമായ പ്രതികരണങ്ങളും ശരീര ഭാഷയും സംസാര രീതിയുമെല്ലാമാണ് ഇതിന് കാരണം. ഇടയ്ക്കിടെ അവതാരികമാരെ ഞെട്ടിക്കുന്ന പതിവും ഷൈൻ ടോമിനുണ്ട്.
ഇപ്പോഴിതാ താരം ഒരു തെലുങ്ക് മാദ്ധ്യമത്തിന് നൽകിയ പുതിയ ഇന്റർവ്യൂവാണ് സമൂഹമാദ്ധ്യമങ്ങളിൽ ശ്രദ്ധ നേടുന്നത്. അഭിമുഖത്തിനിടെ അവതാരികയ്ക്ക് മുന്നിൽ വെച്ച് ഷൈൻ ഷർട്ട് ഊരുകയായിരുന്നു. ഷൈനിന്റെ ഷർട്ടിനെക്കുറിച്ച് അവതാരിക പുകഴ്ത്തിയപ്പോഴാണ് താരം അത് ഊരി നൽകാനൊരുങ്ങിയത്.
രാഗബലി എന്ന സിനിമയുടെ പ്രമോഷന്റെ ഭാഗമായി നടന്ന അഭിമുഖത്തിൽ സംവിധായകൻ പവൻ ബസംസെട്ടിയും പങ്കെടുത്തിരുന്നു. ഇതിനിടെ ഷൈനിന്റെ ഷർട്ടിനെക്കുറിച്ച് അവതാരിക പ്രശംസിക്കുകയായിരുന്നു. ഇതോടെ ഷൈൻ ഷർട്ടിന്റെ ബട്ടൻസ് ഊരിമാറ്റി. എന്നാൽ സംവിധായകൻ ഷൈനിനെ ഇതിൽ നിന്ന് വിലക്കി.
ഷർട്ട് വേണമെന്ന് അവതാരിക വീണ്ടും പറഞ്ഞു. നൽകിയാൽ ധരിക്കുമോ എന്ന ഷൈനിന്റെ ചോദ്യത്തിന് ധരിക്കാമെന്ന് അവതാരിക വാക്കുനൽകി. അത് സോഷ്യൽ മീഡിയയിൽ പോസ്റ്റ് ചെയ്യാമെന്നും പറഞ്ഞു. ഭാഗ്യത്തിന് പാന്റ്‌സ് ഇഷ്ടമായെന്ന് പറഞ്ഞില്ല എന്നും അവതാരിക പറയുന്നുണ്ട്.
