കോഴിക്കോട് : തിരുവമ്പാടിയിൽ ഉറുമി പവർ ഹൗസിനുള്ളിൽ വെള്ളം കയറി നാശനഷ്ടങ്ങളുണ്ടായി. വൈദ്യുതി പദ്ധതിയുടെ പെൻ സ്റ്റോക്ക് പൈപ്പ് പൊട്ടിയാണ് പവർ ഹൗസിൽ വെള്ളം കയറിയത്. ഓഫീസ് റൂമിലും കൺട്രോൾ റൂമിലും ജനറേറ്റർ റൂമിലും വെള്ളം കയറി നാശനഷ്ടങ്ങൾ ഉണ്ടായി. വൈദ്യുതി ഉല്പാദിപ്പിച്ചു കൊണ്ടിരിക്കെ ആണ് അപകടമുണ്ടായത്. വെള്ളത്തിന്റെ ശക്തമായ സമ്മർദ്ദമാണ് പെൻ സ്റ്റോക്ക് പൈപ്പ് പൊട്ടാൻ കാരണമായതെന്നാണ് പറയപ്പെടുന്നത്.
സാധാരണഗതിയിൽ വൈദ്യുതി ഉല്പാദിപ്പിക്കുന്ന അവസരത്തിൽ ജനറേറ്റർ ഡ്രിപ്പ് ആയാൽ വെള്ളം ഓവർഫ്ലോ ആയി പുഴയിലേക്ക് പോകുകയാണ് ചെയ്യാറുള്ളത്. എന്നാൽ നിലവിൽ വെള്ളത്തിലുണ്ടായിരുന്ന ശക്തമായ സമ്മർദ്ദം മൂലം പെൻ സ്റ്റോക്ക് പൈപ്പിന്റെ വെൽഡിങ് ഉള്ള ഭാഗം പൊട്ടുകയായിരുന്നു. പൈപ്പിന്റെ കാലപ്പഴക്കമാണ് അപകടകാരണമെന്നാണ് കരുതപ്പെടുന്നത്.
2004ൽ ആയിരുന്നു കോഴിക്കോട് ഉറുമിയിൽ ഉറുമി ജലവൈദ്യുത പദ്ധതി ആരംഭിക്കുന്നത്. ഒരു തടയണയും പവർഹൗസും ഉൾപ്പെടുന്ന ഈ പദ്ധതി പ്രതിവർഷം 9.72 ദശലക്ഷം യൂണിറ്റ് വൈദ്യുതി ഉത്പാദിപ്പിക്കാൻ ശേഷിയുള്ളതാണ്.












