ദുബായ്: യുഎഇയിൽ എത്തിയ പ്രധാനമന്ത്രി നരേന്ദ്രമോദിയ്ക്ക് ലഭിച്ചത് ഉജ്ജ്വല സ്വീകരണം.രാവിലെ പ്രാദേശികസമയം 9.15-ന് അബുദാബിയിലിറങ്ങിയ പ്രധാനമന്ത്രിയെ അബുദാബി കിരീടാവകാശി ശൈഖ് ഖാലിദ് ബിൻ മുഹമ്മദ് ബിൻ സായിദ് അൽ നഹ്യാൻ നേരിട്ടെത്തി സ്വകരിച്ചു.
നരേന്ദ്രമോദിയുടെ സന്ദർശനത്തിന്റെ ഭാഗമായി ബുർജ് ഖലീഫയിൽ പ്രത്യേക ലൈറ്റ് ഷോയും സംഘടിപ്പിച്ചു. ത്രിവർണവും അശോകചക്രവും ബുർജ് ഖലീഫയിൽ തെളിഞ്ഞു. പ്രധാനമന്ത്രിയോടുള്ള ആദരസൂചകമായി അംബരചുംബിയിൽ നരേന്ദ്രമോദിയുടെ ചിത്രവും പ്രദർശിപ്പിച്ചു. ബഹുമാനപ്പെട്ട പ്രധാനമന്ത്രി നരേന്ദ്രമോദിയെ സ്വാഗതം ചെയ്യുന്നു എന്ന വാചകവും ബുർജ് ഖലീഫയിൽ തെളിഞ്ഞു.
യു.എ.ഇ. പ്രസിഡന്റ് ശൈഖ് മുഹമ്മദ് ബിൻ സായിദ് അൽ നഹ്യാനുമായി വിവിധ വിഷയങ്ങളിൽ പ്രധാനമന്ത്രി ചർച്ച നടത്തും. രൂപയിൽ വ്യാപാരം ആരംഭിക്കുന്നതിനുള്ള സുപ്രധാന ധാരണാപത്രം പ്രധാനമന്ത്രിയുടെ സാന്നിധ്യത്തിൽ ഒപ്പുവെക്കും. ഡൽഹി ഇന്ത്യൻ ഇൻസ്റ്റിറ്റ്യൂട്ട് ഓഫ് ടെക്‌നോളജി ക്യാമ്പസ് തുറക്കുന്നതിനുള്ള ധാരണാപത്രവും ഒപ്പിടും.
