അബുദാബി: ഫാസ്റ്റ് 5 ഡ്രോയിൽ പ്രവാസി ഇന്ത്യക്കാരന് വൻ നേട്ടം. 25 വർഷത്തേക്ക് പ്രതിമാസം 25,000 യുഎഇ ദിർഹം ലഭിക്കുന്ന ഒന്നാം സമ്മാനത്തിനാണ് പ്രവാസി ഇന്ത്യക്കാരൻ അർഹനായത്. ഉത്തർപ്രദേശ് അസംഗഡ് സ്വദേശിയായ മുഹമ്മദ് ആദിൽ ഖാനാണ് സമ്മാനം. ദുബായിൽ റിയൽ എസ്റ്റേറ്റ് മേഖലയിലുള്ള കമ്പനിയിൽ ഇന്റീരിയർ ഡിസൈൻ കൺസൾട്ടന്റായി ജോലി ചെയ്ത് വരികയാണ് ആദിൽ ഖാൻ. സമ്മാനത്തിൻറെ ആദ്യ ഗഡു അദ്ദേഹത്തിന് കൈമാറി. ആദ്യത്തെ എട്ട് ആഴ്ചകൾക്ക് ശേഷമാണ് എമിറേറ്റ്സ് ഡ്രോയുടെ ഫാസ്റ്റ് 5 നറുക്കുടെപ്പിൻറെ ഈ ഗ്രാൻഡ് പ്രൈസ് ഒരാൾക്ക് ലഭിക്കുന്നത്.
കുടുംബത്തിന്റെ ഏക ആശ്രയമാണ് ഞാൻ. കൊവിഡ് സമയത്ത് എന്റെ സഹോദരൻ മരണപ്പെട്ടിരുന്നു. ഞാനാണ് എന്റെ കുടുംബത്തെ നോക്കിയിരുന്നത്. എനിക്ക് പ്രായമായ മാതാപിതാക്കളും അഞ്ച് വയസുള്ള ഒരു മകളുമുണ്ട്. അവരുടെയെല്ലാം ആശ്രയമാണ് ഞാൻ. അതുകൊണ്ട് തന്നെ ഇപ്പോൾ കിട്ടിയ ഈ പണം തനിക്ക് ഏറെ പ്രധാനപ്പെട്ടതാണെന്ന് സമ്മാനർഹനായ ശേഷം യുവാവ് പറഞ്ഞു.
25 ദിർഹം വീതം വിലവരുന്ന അഞ്ച് ടിക്കറ്റുകളെടുത്തിരുന്നെങ്കിലും അക്കാര്യം മറന്നുപോയിരുന്നു. തുടർന്ന് എമിറേറ്റ്സ് നറുക്കെടുപ്പ് സംഘാടകനിൽ നിന്ന് ഫോൺവിളി എത്തിയപ്പോഴാണ് അക്കാര്യം ഓർത്തത്. വീട്ടുകാരോടും കൂട്ടുകാരോടും കാര്യം പറഞ്ഞെങ്കിലും ആരും വിശ്വസിച്ചില്ല. രണ്ടുതവണ പരിശോധിക്കാൻ അവർ പറഞ്ഞുവെന്നും ആദിൽ പറയുന്നു.
