കോട്ടയം: സ്‌കൂള്‍ വിദ്യാര്‍ഥികള്‍ക്കായി ഇനിയും രുചി സദ്യയൊരുക്കാന്‍ പാചക വിദഗ്ദ്ധന്‍ പഴയിടം മോഹനന്‍ നമ്പൂതിരി. സ്‌കൂള്‍ കലോത്സവങ്ങളും കായിക, ശാസ്ത്രീയ മേളകള്‍ ഉള്‍പ്പടെയുള്ള സ്‌കൂള്‍ മേളകളിലേക്ക് ഇനി ഉണ്ടാകില്ലെന്ന കടുത്ത നിലപാടാണ് തല്‍ക്കാലത്തേക്ക് മാറ്റിവച്ച് കുട്ടികള്‍ക്കായി പഴയിടം തിരികെ എത്തുന്നത്. തീരുമാനങ്ങള്‍ പുനഃപരിശോധിക്കപ്പെടേണ്ട സാഹചര്യം വന്നതായും ഇതൊരു തുടക്കമായി കരുതിക്കോളൂ എന്നും അദ്ദേഹം പറഞ്ഞു.
എറണാകുളം റവന്യൂ ജില്ലാ ശാസ്ത്രമേളയുടെ പാചകമാണ് പഴയിടം ഏറ്റെടുത്തത്. കൂടാതെ കളമശ്ശേരില്‍ വച്ച് നടക്കുന്ന സംസ്ഥാന സ്‌പെഷ്യല്‍ സ്‌കൂള്‍ കലോത്സവത്തിനും അദ്ദേഹത്തിന്റെ പാചകസംഘം സദ്യയൊരുക്കും.
“നമ്മുടെ തീരുമാനങ്ങള്‍ പുനഃപരിശോധിക്കപ്പെടേണ്ട സാഹചര്യം വന്നു. കഴിഞ്ഞ ദിവസം എറണാകുളത്തെത്തി പാചകപ്പുരയില്‍ അടുപ്പ് കത്തിച്ചത് ഞാനാണ്. സ്‌കൂള്‍ കലോത്സവത്തില്‍ മടങ്ങിയെത്തുമോ എന്ന് ഇപ്പോള്‍ പറയാനില്ല. എന്നാലും ഇതൊരു തുടക്കമാണെന്ന് കരുതിക്കോളൂ”, പഴയിടം മോഹനന്‍ നമ്പൂതിരി പറഞ്ഞു.
വിവാദങ്ങളെ തുടര്‍ന്ന് കഴിഞ്ഞ ജനുവരിയില്‍ കോഴിക്കോട് വച്ച് നടന്ന സംസ്ഥാന സ്‌കൂള്‍ കലോത്സവത്തിന്റെ പാചക്കപ്പുരയില്‍ നിന്നാണ് പഴയിടം പടിയിറങ്ങിയത്. 2000ല്‍ കോട്ടയത്തെ റവന്യൂ ജില്ലാ കലോത്സവത്തിലാണ് അദ്ദേഹം ആദ്യമായി സ്‌കൂള്‍ മേളകളുടെ പാചക ചുമതല ഏറ്റെടുക്കുന്നത്. ഇത് വരെ രണ്ടേകാല്‍ കോടി കുട്ടികള്‍ക്ക് താന്‍ ഭക്ഷണം വിളമ്പിയതായി അദ്ദേഹം പറയുന്നു.
സ്‌പെഷ്യല്‍ സ്‌കൂള്‍ കലോത്സവത്തിന്റെ സംഘാടകരുടെ നിര്‍ബന്ധത്തെ തുടര്‍ന്നാണ് താന്‍ ഇപ്പോള്‍ നിലപാട് മാറ്റിയതെന്ന് അദ്ദേഹം വ്യക്തമാക്കി. നവംബര്‍ എട്ടു മുതല്‍ പത്തു വരെ കളമശ്ശേരിയിലാണ് സ്‌പെഷ്യല്‍ സ്‌കൂള്‍ കലോത്സവം നടക്കുന്നത്. ശാസ്ത്രമേളയുടെ സംഘാടകര്‍ കൂടി വിളിച്ചപ്പോള്‍ രണ്ടും കൂടി ചെയ്യാമല്ലോ എന്നു കരുതിയാണ് പാചകം ഏറ്റെടുത്തതെന്ന് പഴയിടം കൂട്ടിച്ചര്‍ത്തു.
കോഴിക്കോട് ഉണ്ടായ വിവാദങ്ങള്‍ മനസ്സില്‍ ആഴത്തിലുള്ള മുറിവാണ് ഏല്‍പ്പിച്ചതെങ്കിലും അതൊക്കെ ഉണങ്ങി. അന്ന് ഒട്ടേറെ പേര്‍ തന്നോടൊപ്പം നിന്നതില്‍ സന്തോഷമുണ്ടെന്നും അദ്ദേഹം വ്യക്തമാക്കി. ഇതോടെ കുട്ടികള്‍ക്ക് രുചികരവും ആരോഗ്യപരവുമായ ഭക്ഷണം കിട്ടുമെന്ന ആശ്വാസത്തിലാണ് മാതാപിതാക്കളും.
