പ്രതിരോധ മേഖലയിൽ ആത്മനിർഭരത കൈവരിക്കുന്നത് വെറുമൊരു സാമ്പത്തിക ലക്ഷ്യമല്ലെന്നും രാജ്യത്തിന്റെ സുരക്ഷയ്ക്കും തന്ത്രപ്രധാനമായ സ്വാതന്ത്ര്യത്തിനും അത്യാവശ്യമാണെന്നും പ്രതിരോധ മന്ത്രി രാജ്‌നാഥ് സിങ്. നൂതന സാങ്കേതികവിദ്യകൾ ഉപയോഗിക്കുന്ന രാജ്യം എന്നതിൽ നിന്ന് അവ വികസിപ്പിക്കുകയും പുതിയ കണ്ടുപിടിത്തങ്ങൾ നടത്തുകയും ആഗോളതലത്തിൽ നേതൃത്വം നൽകുകയും ചെയ്യുന്ന രാജ്യമായി ഇന്ത്യ മാറണമെന്നും അദ്ദേഹം പറഞ്ഞു. നവംബർ 15ന് ഹൈദരാബാദിൽ നടന്ന 36-ാമത് നോൺ ഡിസ്ട്രക്ടീവ് ഇവാലുവേഷൻ ആൻഡ് എനേബ്ലിങ് ടെക്നോളജീസ് സമ്മേളനത്തെയും 15-ാമത് എയ്‌റോസ്‌പേസ് നോൺ ഡിസ്ട്രക്ടീവ് ടെസ്റ്റിങ് അന്താരാഷ്ട്ര സിമ്പോസിയത്തെയും ഓൺലൈനായി അഭിസംബോധന ചെയ്യുകയായിരുന്നു അദ്ദേഹം. പ്രതിരോധ മേഖലയിലെ സാങ്കേതിക ആശ്രിതത്വം കുറയ്ക്കാനും രാജ്യത്തിന്റെ പ്രതിരോധ ശേഷി വർധിപ്പിക്കാനും തദ്ദേശീയ സാങ്കേതികവിദ്യകൾ വികസിപ്പിക്കേണ്ടതിന്റെ ആവശ്യകതയും അദ്ദേഹം ചൂണ്ടിക്കാട്ടി.
പ്രതിരോധ ഉപകരണങ്ങളുടെ ഗുണനിലവാരവും സുരക്ഷയും ഉറപ്പാക്കുന്നതിൽ നോൺ ഡിസ്ട്രക്ടീവ് ടെസ്റ്റിങ് (NDT) നിർണായകമാണെന്ന് രാജ്‌നാഥ് സിങ് വ്യക്തമാക്കി. ഉപകരണങ്ങളോ അവയുടെ ഭാഗങ്ങളോ കേടുപാടുകൾ വരുത്താതെ അവയ്ക്കുള്ളിലെ തകരാറുകൾ കണ്ടെത്താൻ ഈ സാങ്കേതികവിദ്യ സഹായിക്കും. മനുഷ്യശരീരത്തിലെ പ്രശ്നങ്ങൾ കണ്ടെത്താൻ അൾട്രാസൗണ്ടും എക്സ്‌റേയും ഉപയോഗിക്കുന്നതുപോലെയാണ് ഇത് പ്രവർത്തിക്കുന്നതെന്നും അദ്ദേഹം വിശദീകരിച്ചു. മിസൈലുകൾ, വിമാനങ്ങൾ, നാവിക കപ്പലുകൾ, ബഹിരാകാശ വാഹനങ്ങൾ എന്നിവയുടെ നിർമാണത്തിൽ ഓരോ ഘടകത്തിന്റെയും ഗുണനിലവാരം ഉറപ്പാക്കണം. പരിശോധനയിലെ ചെറിയ പിഴവുകൾ പോലും ഉപകരണങ്ങളുടെ പ്രവർത്തനത്തെ ബാധിക്കുകയും അറ്റകുറ്റപ്പണികൾ വർധിപ്പിക്കുകയും ചെയ്യാം. അതിനാൽ തകരാറുകൾ കണ്ടെത്തുന്നതിൽ മാത്രം ഒതുങ്ങാതെ നിർമാണത്തിന്റെ ഓരോ ഘട്ടത്തിലും അവ തടയാനുള്ള സംവിധാനങ്ങൾ ഒരുക്കണമെന്നും അദ്ദേഹം ആവശ്യപ്പെട്ടു. ഇതിനായി പ്രത്യേക സെൻസറുകൾ, പരിശോധനാ ഉപകരണങ്ങൾ, സോഫ്റ്റ്‌വെയറുകൾ എന്നിവ രാജ്യത്തിനുള്ളിൽ തന്നെ വികസിപ്പിക്കണം. പൊതുമേഖലാ സ്ഥാപനങ്ങൾ, സ്വകാര്യ കമ്പനികൾ, സ്റ്റാർട്ടപ്പുകൾ, ചെറുകിട വ്യവസായങ്ങൾ എന്നിവയുടെ സഹകരണവും അദ്ദേഹം ആവശ്യപ്പെട്ടു.
ഇന്ത്യയുടെ പ്രതിരോധ സ്വയംപര്യാപ്തതയുടെ ഭാഗമായി മിസൈൽ നിർമാണം, നാവിക സാങ്കേതികവിദ്യ, എയ്‌റോസ്‌പേസ് എൻജിനീയറിങ്, റഡാർ സംവിധാനങ്ങൾ, ബഹിരാകാശ ഗവേഷണം തുടങ്ങിയ മേഖലകളിൽ കൈവരിച്ച പുരോഗതിയും മന്ത്രി എടുത്തുപറഞ്ഞു. തദ്ദേശീയമായി നിർമിച്ച ആദ്യ വിമാനവാഹിനിക്കപ്പലായ ഐഎൻഎസ് വിക്രാന്തിന്റെ കമ്മീഷനിങ് ഈ യാത്രയിലെ പ്രധാന നേട്ടമാണെന്നും അദ്ദേഹം പറഞ്ഞു. പ്രതിരോധ മേഖലയിലെ ഗവേഷണവും നൂതന ആശയങ്ങളും പ്രോത്സാഹിപ്പിക്കുന്നതിനായി നടപ്പാക്കിയ iDEX, ടെക്നോളജി ഡെവലപ്‌മെന്റ് ഫണ്ട് (TDF) പദ്ധതികളുടെ പ്രാധാന്യവും അദ്ദേഹം വിശദീകരിച്ചു. ആർട്ടിഫിഷ്യൽ ഇന്റലിജൻസ്, മെഷീൻ ലേണിങ്, റോബോട്ടിക്സ്, ഡിജിറ്റൽ ട്വിൻസ്, നൂതന സെൻസറുകൾ, പ്രവചന വിശകലനം തുടങ്ങിയ സാങ്കേതികവിദ്യകൾ പരിശോധനാ സംവിധാനങ്ങളെ കൂടുതൽ കൃത്യതയുള്ളതാക്കുമെന്നും അദ്ദേഹം ചൂണ്ടിക്കാട്ടി. ഇത്തരം സാങ്കേതികവിദ്യകൾ വിദേശത്തുനിന്ന് സ്വീകരിക്കുന്നതിൽ മാത്രം ഒതുങ്ങാതെ ഇന്ത്യയുടെ ആവശ്യങ്ങൾക്കനുസരിച്ചുള്ള സ്വന്തം സംവിധാനങ്ങൾ വികസിപ്പിക്കണമെന്നും ഗവേഷണത്തിലും പരിശീലനത്തിലും കൂടുതൽ നിക്ഷേപം നടത്തണമെന്നും രാജ്‌നാഥ് സിങ് ആവശ്യപ്പെട്ടു.
