ഭക്ഷണം അമിതമായാൽ ഉണ്ടാകുന്ന ശാരീരിക അസ്വസ്ഥതകൾ ചെറുതല്ല. പലപ്പോഴും നെഞ്ചെരിച്ചിലും വയറെരിച്ചിലും എല്ലാം കൊണ്ട് ഇരിക്കാനും നിൽക്കാനും കിടക്കാനും പറ്റാത്ത അവസ്ഥയായിരിക്കും ഉണ്ടാവുക. ഈ കാരണങ്ങൾ കൊണ്ട് പലപ്പോഴും ഇഷ്ടമുള്ള ആഹാരമാണെങ്കിൽ പോലും നമ്മൾ അധികം കഴിക്കാറില്ല. എന്നാൽ ഇനി പേടി കൂടാതെ ഭക്ഷണം ആവശ്യത്തിനു കഴിച്ചോളൂ. കഴിച്ച ഭക്ഷണം എളുപ്പത്തിൽ ദഹിപ്പിക്കാനുള്ള ചില മാർഗങ്ങൾ നമ്മുടെ വീട്ടിൽ തന്നെയുണ്ട്.
കൂടുതൽ ഭക്ഷണം കഴിച്ചുണ്ടാകുന്ന അസ്വസ്ഥത മാറാൻ ഒരു ആപ്പിൾ കഴിക്കുന്നത് വളരെ ഉത്തമമാണ്. ആപ്പിളിൽ അടങ്ങിയിട്ടുള്ള പെക്റ്റിൻ എന്ന ഫൈബർ ദഹനത്തെ നല്ല രീതിയിൽ പ്രോത്സാഹിപ്പിക്കുന്ന ഒന്നാണ്. അതിനാൽ ഭക്ഷണം കഴിച്ച ശേഷം ഒരു ആപ്പിൾ കഴിച്ചാൽ നല്ല രീതിയിൽ ദഹനം നടക്കുന്നതാണ്. അതുപോലെതന്നെയാണ് ഭക്ഷണശേഷം അൽപം പെരുംജീരകം വായിലിട്ട് ചവയ്ക്കുന്നത്. പെരുംജീരകവും ദഹനത്തിന് ഏറെ സഹായിക്കുന്നതാണ്.
ഭക്ഷണം പെട്ടെന്ന് ദഹിക്കാനായി പണ്ടുകാലം മുതൽക്ക് തന്നെ ഉപയോഗിച്ചിരുന്ന ഒന്നാണ് തൈര്. വയറിനുള്ളിൽ നല്ലയിനം ബാക്ടീരിയകളെ വളർത്താനും ദഹനം എളുപ്പത്തിൽ ആക്കാനും തൈര് സഹായിക്കുന്നതാണ്. ഇഞ്ചിയും ദഹനത്തിനും മികച്ച ഒരു ഔഷധമാണ്. വയറു നിറയെ ഭക്ഷണം കഴിച്ച് ഉണ്ടാകുന്ന അസ്വസ്ഥതകൾ നീങ്ങാനായി ഒരു സ്പൂൺ ഇഞ്ചിനീര് ഭക്ഷണശേഷം കഴിച്ചാൽ മതി. ഇഞ്ചി തൈരിൽ അരച്ച് ചേർത്ത് കഴിക്കുന്നതും ദഹനത്തിന് ഏറെ സഹായകരമാണ്.
