തിരുവനന്തപുരം: ശ്രീകാര്യം പാങ്ങപ്പാറയിൽ പ്ലസ് വൺ വിദ്യാർഥി അഭിരാം കൊല്ലപ്പെട്ട കേസിൽ പ്രണയപ്പകയ്ക്കപ്പുറം പ്രതികളെ കൊടുംക്രൂരതയിലേക്ക് നയിച്ചതിന്റെ ഞെട്ടിക്കുന്ന വിവരങ്ങൾ പുറത്ത്. ചില സ്വകാര്യ വിഡിയോ ദൃശ്യങ്ങൾ ചോർന്നതുമായി ബന്ധപ്പെട്ട തർക്കങ്ങളാണ് കൊലപാതകത്തിലേക്ക് നയിച്ച പ്രധാന കാരണങ്ങളിലൊന്നെന്നാണ് അന്വേഷണ സംഘത്തിനു ലഭിച്ചിരിക്കുന്ന പ്രാഥമിക സൂചന. കേസിൽ പിടിയിലായവരുടെ വാട്‌സാപ്പ് ചാറ്റുകളും മൊബൈൽ ഫോണുകളിലെ ഫോൾഡറുകളും കേന്ദ്രീകരിച്ച് നടത്തിയ വിശദമായ പരിശോധനയിലാണ് അന്വേഷണത്തിന് നിർണായകമായ ഈ വിവരങ്ങൾ പുറത്തുവന്നത്.
അഭിരാമിനെക്കാൾ ഉപരിയായി അവന്റെ സുഹൃത്തിനെ ലക്ഷ്യമിട്ടാണ് പ്രതികൾ വലവിരിച്ചതെന്നാണ് റിപ്പോർട്ടുകൾ.സ്വകാര്യ വിഡിയോ ചോർന്ന വിഷയം സംസാരിച്ചു തീർക്കാനെന്ന വ്യാജേന അഭിരാമിന്റെ സുഹൃത്തിനെ വിളിച്ചുവരുത്താനാണ് പ്രതികൾ ആദ്യം ശ്രമിച്ചത്. എന്നാൽ ഈ സുഹൃത്ത് വരാൻ കൂട്ടാക്കാതിരുന്നതോടെയാണ് ഇൻസ്റ്റഗ്രാം അക്കൗണ്ട് വഴി അഭിരാമിനെ ബന്ധപ്പെട്ട് തന്ത്രപരമായി നിർ വിജനമായ സ്ഥലത്തേക്ക് വിളിച്ചുവരുത്തിയത്.അവിടെയെത്തിയ അഭിരാമിനോട് സുഹൃത്തിനെ സ്ഥലത്തേക്ക് വിളിച്ചു വരുത്താൻ പ്രതികൾ ആവശ്യപ്പെട്ടെങ്കിലും അഭിരാം അതിന് വഴങ്ങാത്തതാണ് ആക്രമണത്തിൽ കലാശിച്ചത്.
കേസിലെ ഒന്നാം പ്രതിയായ പതിനേഴുകാരൻ, മൂന്നാം പ്രതിയായ ആനന്ദയോട് അഭിരാമിന്റെ സുഹൃത്തിനെ ആക്രമിക്കാൻ പോകുന്ന വിവരം രണ്ടാഴ്ച മുൻപ് തന്നെ പങ്കുവെച്ചിരുന്നതായി പൊലീസിന്റെ അന്വേഷണത്തിൽ തെളിഞ്ഞിട്ടുണ്ട്. ആക്രമണ സന്ദേശമായി പ്രതികൾ മഴുവിന്റെ ചിഹ്നം കൈമാറിയതും ആസൂത്രിതമായ ഗൂഢാലോചനയുടെ വ്യാപ്തി വ്യക്തമാക്കുന്നു. ചോദ്യം ചെയ്യലിൽ യാതൊരു കുറ്റബോധവുമില്ലാതെ പ്രതികൾ സംസാരിക്കുന്നത് പൊലീസിനെയും ഞെട്ടിച്ചിട്ടുണ്ട്. കൊല്ലപ്പെട്ട അഭിരാമിന്റെ ഫോൺ തോട്ടിലേക്ക് എറിഞ്ഞെന്ന മൊഴിയുടെ അടിസ്ഥാനത്തിൽ സ്കൂബ ടീമുകൾ തിരച്ചിൽ നടത്തിയെങ്കിലും അത് ഇതുവരെ കണ്ടെത്താനായിട്ടില്ല.കേസിൽ കൂടുതൽ പേർക്ക് പങ്കുണ്ടോയെന്ന കാര്യത്തിലും ശാസ്ത്രീയ തെളിവുകളുടെ അടിസ്ഥാനത്തിൽ അന്വേഷണം പുരോഗമിക്കുകയാണ്.
