ഇന്നലെ ഭാരതത്തിന് നഷ്ടമായത് 4 പാരാ സ്പെഷ്യൽ ഫോഴ്സിലെ അഞ്ച് ധീര പോരാളികളെയാണ്. സുബേദാർ സഞ്ജീവ് കുമാർ, ഹവിൽദാർ ദേവേന്ദ്ര സിംഗ് , പാരാട്രൂപ്പർമാരായ ബാൽ കിഷൻ , അമിത് കുമാർ , ഛത്രപാൽ സിംഗ് എന്നിവരാണ് ഇന്നലെ വീരമൃത്യു വരിച്ചത്. നുഴഞ്ഞു കയറിയ അഞ്ച് ഭീകരരേയും കാലപുരിക്കയച്ചതിനു ശേഷമാണ് അവർ വീരമൃത്യു വരിച്ചത്.
ഏപ്രിൽ 1-2 തീയതികളിലാണ് അഞ്ച് ഭീകരർ ഇന്ത്യയിലേക്ക് നുഴഞ്ഞുകയറിയതെന്ന് സംശയിക്കപ്പെടുന്നു. ആ സമയത്ത് പാക് സൈന്യത്തിന്റെ ശക്തമായ വെടിനിർത്തൽ ലംഘനം നടന്നിരുന്നു. ഭീകരർ നുഴഞ്ഞു കയറിയ വിവരം അറിഞ്ഞ സൈന്യം അപ്പോൾ തന്നെ ഡ്രോണിലൂടെ അവരുടെ ഏകദേശ സ്ഥാനം കണ്ടെത്തിയിരുന്നു.
മഞ്ഞുമൂടിയ മലനിരകളിൽ സാധാരണ സൈനികർക്ക് ഭീകരരെ നേരിടൽ അത്ര എളുപ്പമല്ലാത്തതിനാൽ സൈന്യം അപ്പോൾ തന്നെ പാരാ സ്പെഷ്യൽ ഫോഴ്സിന്റെ സഹായം തേടി. ഉടൻ തന്നെ 4 പാരാ എസ്.എഫ്ന്റെ രണ്ട് ടീമിനെ ഭീകരരെ നേരിടാൻ നിയോഗിച്ചു.
സുബേദാർ സഞ്ജീവ് കുമാറിന്റെ നേതൃത്വത്തിലുള്ള ടീം ഭീകരരെ നേരിടാൻ എയർ ഡ്രോപ്പ് ചെയ്യപ്പെട്ടു. കൃത്യമായ സ്ഥലത്ത് തന്നെ അവർ എത്തി. ഭീകരരുടെ കാലടിപ്പാടുകൾ കണ്ടെത്തിയ ടീം ലീഡർ സഞ്ജീവ് കുമാർ അത് നോക്കി മുന്നോട്ടു പോയി. തൊട്ടുമുന്നിലുള്ളവരെ പോലും കാണാൻ കഴിയാത്തത്ര കൊടും മഞ്ഞ്. പക്ഷേ പിന്മാറുക എന്ന വാക്ക് നിഘണ്ഡുവിൽ ഇല്ലാത്ത പാരാ.എസ്.എഫ് ടീം മുന്നോട്ട് തന്നെ പോയി. പെട്ടെന്ന് മഞ്ഞുമൂടിയ ഒരു ചെറിയ നീർച്ചാലിലേക്ക് അവരിൽ മൂന്നു പേർ പതിച്ചു.ഭീകരരും അവിടെത്തന്നെയായിരുന്നു ഒളിച്ചിരുന്നത്.
സൈനികർ പിറകെ ഉണ്ടെന്ന് അറിയാമായിരുന്ന ഭീകരർ അവരെ പ്രതീക്ഷിച്ചാണിരുന്നത്. പോയിന്റ് ബ്ലാങ്കിലായിരുന്നു വെടിവെപ്പ്. വെടിയൊച്ച് കേട്ട് യൂണിറ്റിലെ മറ്റ് രണ്ട് സൈനികരും നീർച്ചാലിലേക്ക് എടുത്ത് ചാടി ഭീകരരെ നേരിട്ടു. നാലുപേരെ വധിച്ചു. ഓടി രക്ഷപ്പെടാൻ നോക്കിയ ഒരു ഭീകരനെ അവർ വെടിവെച്ചിട്ടു. പക്ഷേ ഇന്ത്യയുടെ ധീരസൈനികർക്ക് മാരകമായി മുറിവേറ്റിരുന്നു. കാലാവസ്ഥയും ദുർഘടമായ പ്രദേശവും രക്ഷാപ്രവർത്തനം തടസ്സപ്പെടുത്തി. മൂന്ന് പേർ സംഭവസ്ഥലത്ത് തന്നെ വീരമൃത്യു വരിച്ചു. രണ്ടു പേർ സൈനിക ആശുപത്രിയിലും.
നേരിട്ടുള്ള യുദ്ധമായിരുന്നു നടന്നതെന്നതിന്റെ ഏറ്റവും വലിയ ഉദാഹരണം ഏറ്റുമുട്ടൽ നടന്ന സ്ഥലത്ത് കാണാനുണ്ടായിരുന്നു. ഒരു ഭീകരന്റെ ശവത്തിനു മുകളിലായിരുന്നു ഒരു പാരാട്രൂപ്പറിന്റെ മൃതദേഹം കിടന്നത്. അവസാന ശ്വാസം വരെ പോരാടി രാജ്യത്തിന്റെ ശത്രുക്കളെ പൂർണമായും ഇല്ലാതാക്കാൻ പാരാ എസ്.എഫിന്റെ പോരാളികൾക്ക് കഴിഞ്ഞു.
സർജിക്കൽ സ്ട്രൈക്ക് നടത്തിയ പാരാ എസ്.എഫ് ആണ് നാലാം പാര എസ്.എഫ്. ബറ്റാലിയൻ. പർവ്വതങ്ങളിലെ ഓപ്പറേഷനുകൾക്കും ഭീകര വിരുദ്ധ നീക്കങ്ങൾക്കും സ്പെഷ്യലൈസ് ചെയ്ത ബറ്റാലിയനാണിത്.
രാഷ്ട്രത്തിനു വേണ്ടി വീരമൃത്യു വരിച്ച ധീര ജവാന്മാർക്ക് പ്രണാമം
പാരാ എസ്.എഫിനെപ്പറ്റി കൂടുതൽ വിവരങ്ങൾ അറിയാൻ വീഡിയോ കാണൂ..
