ന്യൂഡൽഹി : 2036ലെ ഒളിമ്പിക്സിന് ആതിഥേയത്വം വഹിക്കാൻ കഴിയണം എന്നുള്ളത് ഇന്ത്യയുടെ സ്വപ്നമാണെന്ന് പ്രധാനമന്ത്രി നരേന്ദ്രമോദി. ഈ ലക്ഷ്യത്തിനായുള്ള തയ്യാറെടുപ്പുകളിൽ ആണ് ഇപ്പോൾ കേന്ദ്രസർക്കാർ എന്നും അദ്ദേഹം സൂചിപ്പിച്ചു. സ്വാതന്ത്ര്യ ദിനത്തിൽ ചെങ്കോട്ടയിൽ നടത്തിയ പ്രസംഗത്തിലാണ് പ്രധാനമന്ത്രി നരേന്ദ്രമോദി 2036 ഒളിമ്പിക്സിന് ആതിഥേയത്വം വഹിക്കാൻ ഇന്ത്യ തയ്യാറപ്പുകൾ നടത്തുന്നതായി സൂചന നൽകിയത്.
ജി20 ഉച്ചകോടി പോലെയുള്ള വലിയ പരിപാടികൾക്ക് ആതിഥേയത്വം വഹിക്കാൻ കഴിഞ്ഞ ഇന്ത്യയ്ക്ക് ഇനി അടുത്ത സ്വപ്നം 2036 ഒളിമ്പിക്സ് മത്സരങ്ങൾ നമ്മുടെ രാജ്യത്ത് നടത്തുക എന്നുള്ളതാണ്. ആ ലക്ഷ്യം സാക്ഷാത്കരിക്കുന്നതിനായി കൂടുതൽ മെച്ചപ്പെട്ട അടിസ്ഥാന സൗകര്യങ്ങൾ ഒരുക്കുന്ന തയ്യാറെടുപ്പിലാണ് ഇന്ന് ഇന്ത്യ എന്നും പ്രധാനമന്ത്രി സ്വാതന്ത്ര്യദിന പ്രസംഗത്തിൽ സൂചിപ്പിച്ചു.
2024ലെ പാരിസ് ഒളിമ്പിക്സിൽ ഇന്ത്യയെ പ്രതിനിധീകരിച്ച് പങ്കെടുത്ത എല്ലാ കായിക താരങ്ങൾക്കും പ്രധാനമന്ത്രി സ്വാതന്ത്ര്യ ദിനത്തിൽ ആശംസകൾ അറിയിച്ചു. വരാനിരിക്കുന്ന പാരാലിക്സിനായി തയ്യാറെടുക്കുന്ന കായികതാരങ്ങൾക്കും അദ്ദേഹം ആശംസകൾ നേർന്നു.
