ദില്ലി: ജീവനക്കാര്‍ക്ക് നല്‍കുന്ന തുച്ഛ ശമ്പളത്തിന്റെ പേരില്‍ വലിയ വിമര്‍ശനങ്ങള്‍ നേരിടുകയാണ് പ്രമുഖ ഐടി കമ്പനിയായ കോഗ്‌നിസന്റ്. സോഷ്യല്‍മീഡിയയില്‍ തങ്ങള്‍ക്കെതിരെ ട്രോളുകള്‍ ശക്തമായതോടെ വിശദീകരണവുമായി രംഗത്തുവന്നിരിക്കുകയാണ് ഇവര്‍.
കമ്പനി രണ്ടര ലക്ഷം രൂപ വാര്‍ഷിക ശമ്പളം നല്‍കുന്നത് എഞ്ചിനീയറിങ് ഇതര വിഭാഗങ്ങളിലെത്തുന്ന ഡിഗ്രി ബിരുദധാരികള്‍ക്കാണ്. എഞ്ചിനീയറിങ് വിഭാഗത്തില്‍ തുടക്കാര്‍ക്ക് 4 ലക്ഷം മുതല്‍ 12 ലക്ഷം വരെയാണ് വാര്‍ഷിക ശമ്പളമെന്നുമാണ് കമ്പനി വിശദമാക്കുന്നത്. ഞായറാഴ്ചയാണ് വിഷയത്തില്‍ കമ്പനി വിശദീകരണവുമായി എത്തിയത്.
എന്‍ജിനിയറിംഗ് പശ്ചാത്തലത്തില്‍ നിന്ന് അല്ലാതെയുള്ള തുടക്കക്കാര്‍ക്കായുള്ള റിക്രൂട്ട്‌മെന്റിലെ വിവരങ്ങളാണ് വലിയ രീതിയില്‍ തെറ്റിധരിക്കപ്പെട്ടതെന്നും കോഗ്‌നിസന്റ് അമേരിക്കാസ് പ്രസിഡന്റ് സൂര്യ ഗുമ്മാടി വിശദമാക്കുന്നു. ബിരുദവിദ്യാര്‍ത്ഥികളുടെ പരിശീലനത്തിനും മറ്റുമായി ആദ്യ വര്‍ഷങ്ങളില്‍ 2 മുതല്‍ 3 ലക്ഷം രൂപ വരെ ചെലവിടുന്നുവെന്നും കമ്പനി വിശദമാക്കി.
നേരത്ത 1 ശതമാനത്തില്‍ താഴെ ഇന്‍ക്രിമെന്റ് പ്രഖ്യാപിച്ചതിനും സ്ഥാപനം രൂക്ഷ വിമര്‍ശനം നേരിട്ടിരുന്നു. മാസം 20,000 രൂപ ശമ്പളം രൂപ നികുതിയും പിഎഫും കഴിഞ്ഞ് കയ്യില്‍ കിട്ടുക 18,000 രൂപ മുതല്‍ 19,000 രൂപ വരെ എന്നാണ് അടുത്തിടെ നടത്തിയ റിക്രൂട്ട്‌മെന്റുകളുടെ ശമ്പള പാക്കേജായി സ്ഥാപനം പുറത്ത് വിട്ട പരസ്യം തന്നെയാണ് കമ്പനിയ്ക്ക് വിനയായത്.
കാരണം രാജ്യത്ത് ഏറ്റവുമധികം ശമ്പളം ലഭിക്കുന്നവരില്‍ ഒരാളാണ് കോഗ്‌നിസന്റിന്റെ സിഇഒ എന്നുള്ളത് തന്നെ. 186 കോടി രൂപയാണ് കോഗ്‌നിസന്റ് സിഇഒ രവികുമാറിന്റെ വാര്‍ഷിക ശമ്പളം.
