മലയാളികളുടെ ഭക്ഷണ ശീലങ്ങളില്‍ നിന്ന് ഒഴിച്ചുനിര്‍ത്താനാവാത്ത ഒന്നാണ് വെളിച്ചെണ്ണ. എന്നാല്‍ വെളിച്ചെണ്ണ നല്ല കൂടിയ അളവില്‍ വാങ്ങി വെച്ചതിനുശേഷം ചീത്തയാകുന്ന പ്രവണത കാണാറുണ്ട്. അതായത് രുചി വ്യത്യാസം വരുവാന്‍ ആരംഭിക്കും. ഇത് വരാതിരിക്കുവാനും ദീര്‍ഘകാലം എണ്ണ കേടുകൂടാതെ ഇരിക്കാനും എന്തൊക്കെ ചെയ്യാമെന്ന് നോക്കാം.
ആട്ടിച്ചെടുത്ത വെളിച്ചെണ്ണ വെയിലത്ത് വെച്ച് അതിലെ ജലാംശം മൊത്തത്തില്‍ ഇല്ലാതായതിനുശേഷം മാത്രം നന്നായി അടച്ചു സൂക്ഷിക്കക. മാത്രവുമല്ല, എണ്ണ നല്ലപോലെ തെളിഞ്ഞ് കിട്ടുകയും ചെയ്യും. ഇത്തരത്തില്‍ തെളിഞ്ഞുവരുന്ന എണ്ണ വേറെ കുപ്പിയിലാക്കി സൂക്ഷിച്ച് വയ്ക്കാവുന്നതാണ്.
വെളിച്ചെണ്ണ ഒഴിച്ചു വയ്ക്കുന്ന പാത്രം, അല്ലെങ്കില്‍ കുപ്പി നല്ലപോലെ അടച്ചുവയ്ക്കുവാന്‍ സാധിക്കുന്നവയായിരിക്കണം. അല്ലാത്ത പക്ഷം, ഇതിലേയ്ക്ക് വായുസഞ്ചാരം ഉണ്ടാവുകയും ഈര്‍പ്പം തങ്ങി നിന്ന് ചീത്തയാകുവാനുള്ള സാധ്യതയും കൂടുതലാണ്.
ഈര്‍പ്പം തങ്ങി നില്‍ക്കുന്ന സ്ഥലത്ത് അല്ലെങ്കില്‍ വെള്ളം ആകുന്നിടത്ത് വെളിച്ചെണ്ണ സൂക്ഷിച്ചാല്‍ അത്, വേഗത്തില്‍ ചീത്തയാകുന്നതിന് കാരണമാകും. അതിനാല്‍ എപ്പോഴും അടച്ചുറപ്പുള്ള സ്ഥലത്ത് സാധാരണ താപനില ഉള്ള സ്ഥലത്ത് സൂക്ഷിക്കാവുന്നതാണ്.
കുറച്ച് അളവില്‍ മാത്രമാണ് വെളിച്ചെണ്ണ ഉള്ളതെങ്കില്‍ റെഫ്രിജറേറ്റ് ചെയ്ത് സൂക്ഷിക്കാവുന്നതാണ്. ഇത് കേടുകൂടാതെ കുറേകാലം നിലനില്‍ക്കുന്നതിന് സഹായിക്കും.
എണ്ണയില്‍ കുറച്ച് കുരുമുളക് ഇട്ടുവെച്ചാല്‍ വെളിച്ചെണ്ണ കേടാതെ ഇരിക്കുവാന്‍ സഹായിക്കും. അതുകൊണ്ട് കുരുമുളക് ഉപയോഗിക്കാവുന്നതാണ്.
ചിലര്‍ വെളിച്ചെണ്ണയില്‍ കല്ലുപ്പ് ഇട്ട് വയ്ക്കും. എന്നാല്‍ വെളിച്ചെണ്ണയ്ക്ക് ഉപ്പ് രസം വരുമോ എന്ന ഭയമുണ്ടെങ്കില്‍ ഇത് ഒഴിവാക്കാവുന്നതാണ്.
കല്ലുപ്പും കുരുമുളകും പോലെതന്നെ ചെറിയ കഷ്ണം ശര്‍ക്കരയും വെളിച്ചെണ്ണയില്‍ ഇട്ടുവയ്ക്കുന്നത് വെളിച്ചെണ്ണ കേടാകാതിരിക്കുവാന്‍ വളരെയധികം സഹായിക്കുന്നുണ്ട്.
