ന്യൂഡൽഹി : പുതു ചരിത്രം കുറിക്കാൻ ഒരുങ്ങി ഇന്ത്യൻ റെയിവേ. രാജ്യത്തെ ആദ്യ ഹൈഡ്രജൻ ട്രെയിനിൻറെ പരീക്ഷണ ഓട്ടം ഡിസംബറിൽ നടത്താനാണ് തീരുമാനം. ഇതിനായുള്ള പുത്തൻ ട്രെയിൻ തമിഴ്നാട്ടിലെ ഇൻറഗ്രൽ കോച്ച് ഫാക്ടറിയിൽ സജ്ജമായിക്കഴിഞ്ഞു.
പരീക്ഷണ ഓട്ടം എന്നാണ് എന്ന് തീരുമാനമായിട്ടില്ല. എന്നിരുന്നാലും ഡിസംബറിൽ തന്നെ പരീക്ഷണ ഓട്ടം നടത്തും. ഹരിയാനയിലെ ജിൻഡ്-സോനിപത് റൂട്ടിലെ 90 കിലോമീറ്ററിലാവും ഓട്ടമാവും നടക്കുക .
രാജ്യത്തെ ഫോസിൽ ഇന്ധനങ്ങളിൽ നിന്നും വിമുക്തമാക്കുന്നതിന്റെ ഭാഗമായാണ് ഇന്ത്യയിലെ ആദ്യത്തെ ഹൈഡ്രജൻ ട്രെയിൻ അവതരിപ്പിച്ചിരിക്കുന്നത്. അടുത്ത ഇരുപത് വർഷത്തിനുള്ളിൽ 50 ഹൈഡ്രജൻ ട്രെയിനുകൾ ട്രാക്കിലിറക്കാനാണ് ഇന്ത്യൻ റെയിവേയുടെ ലക്ഷ്യം . പരമാവധി ചിലവ് കുറച്ച് ഇന്ത്യയുടെ തദ്ദേശീയമായ സാങ്കേതികതയിലൂടെയാണ് ഹൈഡ്രജൻ ട്രെയിനുകൾ വികസിപ്പിച്ചെടുത്തിരിക്കുന്നത്. സാധാരണ ഡീസൽ ട്രെയിനുകളെക്കാൾ 12 ഇരട്ടി ചെലവാണ് ഹൈഡ്രജൻ ഫ്യുവൽ സെൽ ട്രെയിൻ നിർമ്മിക്കാൻ വരുന്നത്. ഇത് തദ്ദേശീയമായ സാങ്കേതികതകളിലൂടെ ചുരുക്കി കൊണ്ടുവരാൻ ശ്രമം നടക്കുകയാണ്.
പ്രകൃതിയിൽ വളരെയധികം ലഭ്യമായ ഹൈഡ്രജൻ ഇന്ധനം ഉപയോഗിച്ച് പ്രവർത്തിക്കുന്ന ട്രെയിനുകളാണ് ഹൈഡ്രജൻ ട്രെയിനുകൾ എന്നറിയപ്പെടുന്നത്. അൽപ്പം പോലും കാർബൺ ബഹിർഗ്ഗമനം ഇല്ലാത്തതിനാൽ ഭാവിയുടെ ഇന്ധനങ്ങളുടെ കൂട്ടത്തിൽ ഹൈഡ്രജന് ഒരു പ്രധാന സ്ഥാനമുണ്ട്. ഹൈഡ്രജൻ ഫ്യുവൽ സെല്ലുകൾ ഉപയോഗിച്ചും, ഹൈഡ്രജൻ ഇന്റേണൽ കംമ്പുസ്റ്റിൻ എൻജിൻ ഉപയോഗിച്ചുമെല്ലാം ഇത്തരം ട്രെയിനുകൾക്ക് പ്രവർത്തിക്കാൻ കഴിയും.
പെട്രോളിയം ഇറക്കുമതിയിൽ ഭീമമായ തുകയാണ് ഇന്ത്യ ഓരോ വർഷവും ചെലവിടുന്നത്. ഫോസിൽ ഇതര ഇന്ധനങ്ങൾ വ്യാപകമാകുന്നതോടെ പെട്രോളിയം ആശ്രിതത്വം കുറക്കാനുള്ള പദ്ധതികളിലാണ് ഭാരതം .
