റാഞ്ചി : ജാർഖണ്ഡിൽ ഐഇഡി സ്ഫോടനത്തിൽ രണ്ട് സുരക്ഷാ ഉദ്യോഗസ്ഥർക്ക് ഗുരുതര പരിക്ക്. പശ്ചിമ സിംഗ്ഭും ജില്ലയിലെ ചോട്ടനാഗ്ര പോലീസ് സ്റ്റേഷൻ പരിധിയിലുള്ള മരങ്‌പോംഗയിലെ വനമേഖലയിൽ ആണ് ഐഇഡി സ്ഫോടനം ഉണ്ടായത്. സിആർപിഎഫ് 193-ാം ബറ്റാലിയനിലെ സബ് ഇൻസ്‌പെക്ടർ ഉൾപ്പെടെ രണ്ട് സുരക്ഷാ ഉദ്യോഗസ്ഥർക്കാണ് സ്ഫോടനത്തിൽ പരിക്കേറ്റത്.
പരിക്കേറ്റവരെ മെച്ചപ്പെട്ട ചികിത്സയ്ക്കായി ഹെലികോപ്റ്ററിൽ റാഞ്ചിയിലേക്ക് കൊണ്ടുപോയി.
സ്ഫോടനത്തെത്തുടർന്ന് സുരക്ഷാ സേന പ്രദേശത്ത് തിരച്ചിൽ ശക്തമാക്കിയിട്ടുണ്ട്. ശനിയാഴ്ച സാരന്ദ വനത്തിൽ സുരക്ഷാ സേന തിരച്ചിൽ നടത്തുന്നതിനിടയിലാണ് സ്ഫോടനം ഉണ്ടായത്. ഒരു സബ് ഇൻസ്പെക്ടർക്കും ഒരു ജവാനും ആണ് സ്ഫോടനത്തിൽ പരിക്കേറ്റത്.
കമ്മ്യൂണിസ്റ്റ് ഭീകരരുടെ ഒളിത്താവളങ്ങളിൽ ഒന്നായ ഈ മേഖലയിൽ ഇതിനുമുമ്പ് പലതവണ ഐഇഡി സ്ഫോടനങ്ങൾ ഉണ്ടായിട്ടുണ്ട്. ഇതിൽ പോലീസുകാർക്കും സാധാരണക്കാർക്കും ഒരുപോലെ പരിക്കുകൾ സംഭവിച്ചിട്ടുണ്ട്. അടുത്തിടെ സുരക്ഷാ സേന 20 കിലോഗ്രാം ഭാരമുള്ള ഒരു ഐഇഡി ബോംബ് ഈ പ്രദേശത്തു നിന്നും കണ്ടെടുത്തിരുന്നു.
