ടി20 ലോകകപ്പിന് മുന്നോടിയായി നടന്ന ‘ക്യാപ്റ്റൻസ് കാർണിവലിൽ’ ഇന്ത്യൻ ക്യാപ്റ്റൻ സൂര്യകുമാർ യാദവ് സഹതാരം രോഹിത് ശർമ്മയെ അനുകരിച്ചത് ആരാധകർക്കിടയിൽ വൻ ചിരി പടർത്തുകയാണ്. ലോകകപ്പിന് മുന്നോടിയായി നടന്ന ക്യാപ്റ്റന്മാരുടെ ഒത്തുചേരലിനിടെ മുൻ ക്യാപ്റ്റൻ രോഹിത് ശർമ്മയുടെ ശബ്ദവും ശൈലിയും അനുകരിച്ചാണ് സൂര്യ തരംഗമായത്.
രോഹിത് ശർമ്മയുടെ ഏറെ പ്രശസ്തമായ ‘ഗാർഡൻ’ ഡയലോഗാണ് സൂര്യകുമാർ യാദവ് വേദിക്കായി പുനരാവിഷ്കരിച്ചത്. 2024-ൽ ഇംഗ്ലണ്ടിനെതിരായ ടെസ്റ്റ് മത്സരത്തിനിടെ ഫീൽഡിംഗിൽ അലസത കാണിച്ച സഹതാരങ്ങളെ രോഹിത് ശർമ്മ ശകാരിച്ച വരികളാണിത്. “Stop roaming around the garden ഫസ്റ്റ്” എന്ന രോഹിത്തിന്റെ ശബ്ദം അതേപടി സൂര്യകുമാർ അനുകരിച്ചതോടെ സദസ്സിൽ വൻ ചിരി ഉയർന്നു.
തമാശകൾക്കിടയിലും ടീമിന്റെ പുതിയ ശൈലിയെക്കുറിച്ച് സൂര്യ ഗൗരവത്തോടെ സംസാരിച്ചു. ഹെഡ് കോച്ച് ഗൗതം ഗംഭീറിന് കീഴിൽ ടീമിലുണ്ടായ മാറ്റങ്ങളെ അദ്ദേഹം പ്രശംസിച്ചു. “ഗൗതം ഗംഭീർ വന്നതിന് ശേഷം ഡ്രസ്സിംഗ് റൂമിലെ അന്തരീക്ഷം തന്നെ മാറി. വ്യക്തിപരമായ നേട്ടങ്ങളേക്കാൾ ടീമിന്റെ ലക്ഷ്യത്തിനാണ് ഞങ്ങൾ ഇപ്പോൾ മുൻഗണന നൽകുന്നത്. ഓരോ കളിക്കാരനും സ്വന്തം റെക്കോർഡുകൾ മറന്ന് ടീമിനായി കളിക്കുന്നു,” സൂര്യകുമാർ പറഞ്ഞു.
സ്വന്തം മണ്ണിൽ ലോകകപ്പ് നടക്കുമ്പോൾ കിരീടം നിലനിർത്തുക എന്ന വലിയ ദൗത്യമാണ് ഇന്ത്യക്ക് മുന്നിലുള്ളത്. 2024-ൽ രോഹിത്തിന് കീഴിൽ നേടിയ വിജയം ആവർത്തിക്കാൻ സൂര്യകുമാറും സംഘവും ലക്ഷ്യമിടുന്നു. ഇത്തവണ കിരീടം നേടിയാൽ ടി20 ലോകകപ്പ് കിരീടം വിജയകരമായി പ്രതിരോധിക്കുന്ന ആദ്യ ടീമായും, സ്വന്തം നാട്ടിൽ കിരീടം ഉയർത്തുന്ന ടീമായും ഇന്ത്യക്ക് മാറാൻ സാധിക്കും.
