ടി20 ലോകകപ്പിലെ ഏറ്റവും ആവേശകരമായ ഇന്ത്യ-പാകിസ്ഥാൻ പോരാട്ടത്തിന് കൊളംബോയിലെ പ്രേമദാസ സ്റ്റേഡിയം ഒരുങ്ങുകയാണ്. ഇതിന് മുന്നോടിയായി ഇന്ത്യൻ നായകൻ സൂര്യകുമാർ യാദവ് നടത്തിയ പരാമർശങ്ങളും പാകിസ്ഥാൻ ഉയർത്തുന്ന വെല്ലുവിളികളും ചർച്ചയാവുകയാണ്.
ഏഷ്യ കപ്പിനിടെ സൂര്യകുമാർ യാദവ് നടത്തിയ ഒരു പരാമർശം വീണ്ടും ചർച്ചകളിലേക്ക് വരികയാണ്. “ഇന്ത്യ-പാകിസ്ഥാൻ മത്സരങ്ങളെ ഇനി ഒരു വൈരികൾ തമ്മിലുള്ള പോരാട്ടം എന്ന് വിളിക്കുന്നത് അവസാനിപ്പിക്കണം” എന്നായിരുന്നു സൂര്യകുമാറിന്റെ പരിഹാസം. 15 മത്സരങ്ങളിൽ 8-7 എന്ന നിലയിലാണെങ്കിൽ അതിനെ പോരാട്ടം എന്ന് വിളിക്കാം, എന്നാൽ ഇവിടെ കണക്കുകൾ 13-1 (12-3) എന്ന നിലയിലാണെന്നും അവിടെ ഒരു മത്സരമേ നടക്കുന്നില്ലെന്നും സൂര്യ ചിരിച്ചുകൊണ്ട് പറഞ്ഞിരുന്നു.
എന്തായാലും മറ്റൊരു ഇന്ത്യ – പാകിസ്ഥാൻ പോരിന് കളമൊരുങ്ങുകയാണ്. മത്സരത്തിന് മുൻപ് നാടകീയമായ സംഭവങ്ങളാണ് അരങ്ങേറിയത്. ഇന്ത്യയുമായുള്ള മത്സരം ബഹിഷ്‌കരിക്കുമെന്ന് പാകിസ്ഥാൻ ഭീഷണി മുഴക്കിയിരുന്നു. എന്നാൽ ഐസിസിയും പാക് ക്രിക്കറ്റ് ബോർഡും തമ്മിലുള്ള ചർച്ചകൾക്ക് ഒടുവിൽ പാകിസ്ഥാൻ സർക്കാർ ടീമിന് കളിക്കാൻ അനുമതി നൽകുകയായിരുന്നു. മത്സരം നടക്കുന്ന കൊളംബോയിലെ പ്രേമദാസ സ്റ്റേഡിയത്തിലെ പിച്ചുകൾ സ്പിന്നിനെ തുണയ്ക്കുന്നവയാണ്. ഇത് മുൻനിർത്തി ശക്തമായ സ്പിൻ നിരയുമായാണ് പാകിസ്ഥാൻ എത്തുന്നത്:
ഉസ്മാൻ താരിഖ്: നിഗൂഢമായ ബൗളിംഗ് ആക്ഷൻ കൊണ്ട് ബാറ്റർമാരെ കുഴപ്പിക്കുന്ന താരമാണ് താരിഖ്. പന്ത് എറിയുന്നതിന് തൊട്ടുമുൻപുള്ള അദ്ദേഹത്തിന്റെ ആ ചെറിയ നിർത്തം ടൈമിംഗ് തെറ്റിക്കാൻ കാരണമാകുന്നു. മണിക്കൂറിൽ 20 കിലോമീറ്റർ വരെ വേഗതയിൽ വ്യത്യാസം വരുത്താൻ താരിഖിന് സാധിക്കും.
ഷദാബ് ഖാൻ: പന്തിന് മികച്ച ഡ്രിഫ്റ്റ് കണ്ടെത്താൻ കഴിയുന്ന ഷദാബ് മികച്ച ഫോമിലാണ്. ഒപ്പം വാലറ്റത്ത് ബാറ്റിംഗിലും താരം തിളങ്ങുന്നു.
മുഹമ്മദ് നവാസ് & അബ്രാർ അഹമ്മദ്: കൃത്യതയാർന്ന ബൗളിംഗിലൂടെ റൺസ് വിട്ടുനൽകാത്ത നവാസും, ഗൂഗ്ലിയും കാരം ബോളും എറിയാൻ മിടുക്കനായ അബ്രാർ അഹമ്മദും ഇന്ത്യൻ ബാറ്റിംഗ് നിരയ്ക്ക് വലിയ വെല്ലുവിളിയാകും.
കണക്കുകൾ പ്രകാരം ഇന്ത്യ തന്നെയാണ് മത്സരത്തിൽ മുൻതൂക്കമുള്ള ടീം. എങ്കിലും കൊളംബോയിലെ സാഹചര്യങ്ങളിൽ പാക് സ്പിന്നർമാർക്ക് അത്ഭുതങ്ങൾ കാണിക്കാൻ കഴിയുമെന്ന് ക്രിക്കറ്റ് നിരീക്ഷകർ വിലയിരുത്തുന്നു.
