ദക്ഷിണാഫ്രിക്കയോടേറ്റ തോൽവിക്ക് പിന്നാലെ ഇന്ത്യൻ ക്രിക്കറ്റ് ലോകത്തെ ഞെട്ടിച്ച് മറ്റൊരു വിവാദം കൂടി. മത്സരത്തിന് ശേഷം ദക്ഷിണാഫ്രിക്കൻ താരം ഡേവിഡ് മില്ലർക്കൊപ്പം വീഡിയോ പങ്കുവെച്ച ഇൻഫ്ലുവൻസർ ആർ.ജെ. പ്രിൻസി പരീഖിന് നേരെ സൈബർ ആക്രമണവും വധഭീഷണിയും.
അഹമ്മദാബാദിലെ മത്സരത്തിന് ശേഷം ‘ഡേവിഡ് മില്ലർ! എന്ത് കളിക്കാരനാണ്’ എന്ന അടിക്കുറിപ്പോടെ പങ്കുവെച്ച റീൽ ആണ് ഒരു വിഭാഗം ആരാധകരെ പ്രകോപിപ്പിച്ചത്. വീഡിയോ വൈറലായതിന് പിന്നാലെ തനിക്ക് നേരെ ബലാത്സംഗ ഭീഷണികളും ശരീരത്തെ അധിക്ഷേപിച്ചുകൊണ്ടുള്ള സന്ദേശങ്ങളും ലഭിച്ചതായി പ്രിൻസി വെളിപ്പെടുത്തി. ആക്രമണം കടുത്തതോടെ ഫേസ്ബുക്കിൽ നിന്ന് വീഡിയോ നീക്കം ചെയ്തെങ്കിലും ഇൻസ്റ്റാഗ്രാമിൽ ഇത് നിലനിർത്തിയിട്ടുണ്ട്. ഭീഷണിപ്പെടുത്തിയവർക്കെതിരെ പോലീസിൽ പരാതി നൽകാനാണ് പ്രിൻസിയുടെ തീരുമാനം.
നരേന്ദ്ര മോദി സ്റ്റേഡിയത്തിൽ നടന്ന മത്സരത്തിൽ ഇന്ത്യ ഉയർത്തിയ വെല്ലുവിളി മറികടന്നാണ് ദക്ഷിണാഫ്രിക്ക 76 റൺസിന്റെ വിജയം നേടിയത്. 20 റൺസിനിടെ 3 വിക്കറ്റ് നഷ്ടമായ ദക്ഷിണാഫ്രിക്കയെ ഡേവിഡ് മില്ലറും (35 പന്തിൽ 63) ഡെവാൾഡ് ബ്രെവിസും (45) ചേർന്നാണ് കരകയറ്റിയത്. ട്രിസ്റ്റൻ സ്റ്റബ്‌സ് 44 റൺസുമായി പുറത്താകാതെ നിന്നു. 188 റൺസ് ലക്ഷ്യമിട്ടിറങ്ങിയ ഇന്ത്യ പവർപ്ലേയിൽ തന്നെ തകർന്നു. 42 റൺസെടുത്ത ശിവം ദുബെ മാത്രമാണ് അല്പമെങ്കിലും പൊരുതിയത്. മാർക്കോ ജാൻസൻ നാലും കേശവ് മഹാരാജ് മൂന്നും വിക്കറ്റുകൾ വീഴ്ത്തി ഇന്ത്യയെ 111 റൺസിൽ ഒതുക്കി. 2023 ഏകദിന ലോകകപ്പ് ഫൈനലിന് ശേഷം ഐസിസി ടൂർണമെന്റുകളിൽ ഇന്ത്യ വഴങ്ങുന്ന ആദ്യ തോൽവിയാണിത്.
ഫെബ്രുവരി 26-ന് ചെന്നൈയിൽ സിംബാബ്‌വെക്കെതിരെയാണ് ഇന്ത്യയുടെ അടുത്ത മത്സരം. അന്നുതന്നെ അഹമ്മദാബാദിൽ ദക്ഷിണാഫ്രിക്ക വെസ്റ്റ് ഇൻഡീസിനെ നേരിടും. സെമി ഫൈനൽ സാധ്യതകൾ നിലനിർത്താൻ ഇന്ത്യയ്ക്ക് അടുത്ത മത്സരത്തിൽ വലിയ മാർജിനിലുള്ള വിജയം അനിവാര്യമാണ്.
