ഇന്ത്യയിലെ യുഎഇയുടെ ആദ്യത്തെ അംബാസഡറായിരുന്ന ഹുസൈൻ ഹസൻ മിർസ ഇറാൻ-ഇസ്രായേൽ സംഘർഷത്തിൽ പ്രധാനമന്ത്രി നരേന്ദ്ര മോദിയുടെ പങ്കിനെക്കുറിച്ച് നടത്തിയ പ്രസ്താവന അന്താരാഷ്ട്ര തലത്തിൽ വലിയ ശ്രദ്ധ നേടിയിരിക്കുകയാണ്.അമേരിക്കയോ മറ്റ് പാശ്ചാത്യ രാജ്യങ്ങളോ ഇടപെടുന്നതിനേക്കാൾ ഫലപ്രദമായി, നരേന്ദ്ര മോദിയുടെ ഇടപെടലിലൂടെ പശ്ചിമേഷ്യയിൽ സമാധാനം കൊണ്ടുവരാൻ കഴിയുമെന്നാണ് മുൻ യുഎഇ അംബാസഡറുടെ നിരീക്ഷണം.
പ്രധാനമന്ത്രി നരേന്ദ്ര മോദിക്ക് ഇറാൻ, ഇസ്രായേൽ എന്നീ രാജ്യങ്ങളുമായുള്ള അടുത്ത സൗഹൃദം ഉപയോഗിച്ച് ഈ യുദ്ധം അവസാനിപ്പിക്കാൻ കഴിയുമെന്ന് മിർസ വ്യക്തമാക്കുന്നു. മോദി ഒന്ന് ഫോൺ ചെയ്ത് ആവശ്യപ്പെട്ടാൽ ഇരുരാജ്യങ്ങളും യുദ്ധം നിർത്താൻ തയ്യാറായേക്കും എന്നാണ് അദ്ദേഹം അഭിപ്രായപ്പെട്ടത്.
ലോകരാജ്യങ്ങൾക്കിടയിൽ ഇന്ത്യയ്ക്കുള്ള വലിയ സ്വാധീനത്തെയും മോദിയുടെ വ്യക്തിപരമായ വിശ്വാസ്യതയെയും അദ്ദേഹം പുകഴ്ത്തി. പശ്ചിമേഷ്യൻ രാജ്യങ്ങളുമായും ഇസ്രായേലുമായും ഒരേപോലെ നല്ല ബന്ധം പുലർത്തുന്ന ചുരുക്കം ലോകനേതാക്കളിൽ ഒരാളാണ് മോദി എന്ന് അദ്ദേഹം ചൂണ്ടിക്കാട്ടി.
യുഎഇ ഒരിക്കലും ഈ യുദ്ധത്തിന്റെ ഭാഗമാകാൻ ആഗ്രഹിക്കുന്നില്ലെന്നും തങ്ങളുടെ മണ്ണ് മറ്റൊരു രാജ്യത്തെ ആക്രമിക്കാൻ വിട്ടുനൽകില്ലെന്നും അദ്ദേഹം വ്യക്തമാക്കി. മേഖലയിലെ സമാധാനത്തിന് ഇന്ത്യയുടെ ഇടപെടൽ അനിവാര്യമാണെന്നാണ് അദ്ദേഹത്തിന്റെ പക്ഷം.
ഗൾഫ് രാജ്യങ്ങളിൽ ദശലക്ഷക്കണക്കിന് ഇന്ത്യൻ പ്രവാസികൾ താമസിക്കുന്നുണ്ട്. മേഖലയിലെ അസ്ഥിരത ഇവരെ ബാധിക്കുമെന്നതിനാൽ, സ്വന്തം ജനതയുടെ സുരക്ഷ മുൻനിർത്തിയെങ്കിലും ഇന്ത്യ സമാധാന ശ്രമങ്ങൾക്ക് മുൻകൈ എടുക്കണമെന്ന് അദ്ദേഹം ആവശ്യപ്പെട്ടു.
ഇറാനും ഇസ്രായേലും തമ്മിലുള്ള നേരിട്ടുള്ള ആക്രമണങ്ങൾ തുടങ്ങിയപ്പോൾ തന്നെ, ഇരുരാജ്യങ്ങളും പരമാവധി സംയമനം പാലിക്കണമെന്ന് ഇന്ത്യ ഔദ്യോഗികമായി ആവശ്യപ്പെട്ടിരുന്നു. മേഖലയിലെ സമാധാനം തകരുന്നത് ആഗോള സമ്പദ്‌വ്യവസ്ഥയെയും സുരക്ഷയെയും ബാധിക്കുമെന്ന് ഇന്ത്യ മുന്നറിയിപ്പ് നൽകിയിരുന്നു.
