അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ നടന്ന ഗുജറാത്ത് ടൈറ്റൻസ് – മുംബൈ ഇന്ത്യൻസ് പോരാട്ടത്തിന് പിന്നാലെ ഇന്ത്യൻ പേസർമാരായ മുഹമ്മദ് സിറാജും ജസ്പ്രീത് ബുമ്രയും തമ്മിലുള്ള രസകരമായ സൗഹൃദ നിമിഷങ്ങൾ അടങ്ങുന്ന വീഡിയോ സോഷ്യൽ മീഡിയ ഏറ്റെടുത്തിരിക്കുകയാണ്. ഇന്നലെ നടന്ന മുംബൈ – ഗുജറാത്ത് പോരാട്ടത്തിന് പിന്നാലെയാണ് ഈ നിമിഷം. മുംബൈ ഇന്ത്യൻസ് പങ്കുവെച്ച വീഡിയോയിൽ ബുമ്രയെ ട്രോളുന്ന സിറാജിനെയാണ് കാണുന്നത്.
ധുരന്ധർ’ എന്ന സിനിമയിലെ വൈറലായ ഡയലോഗ് കടമെടുത്താണ് സിറാജ് ബുമ്രയെ കളിയാക്കിയത്. “ഘർ കി യാദ് നഹി ആയി തുജെ, ജസ്സി?” (നിനക്ക് വീടിന്റെ ഓർമ്മയൊന്നും വന്നില്ലേ ജസ്സി?) എന്ന സിറാജിന്റെ ചോദ്യം കേട്ട് ചിരിയടക്കാൻ ബുമ്രയ്ക്കായില്ല. സിറാജിനെ കെട്ടിപ്പിടിച്ച ബുമ്ര നൽകിയ മറുപടിയും രസകരമായിരുന്നു. “ആദ്യം പോയി നിന്റെ മുടി ഒന്ന് വെട്ടിക്കൂ” എന്നായിരുന്നു ബുമ്രയുടെ പരിഹാസം.
ബുമ്രയെ എപ്പോഴും പുകഴ്ത്താറുള്ള സിറാജിന്റെ പഴയ ഡയലോഗായ “എനിക്ക് ജസ്സി ഭായിയെ മാത്രമേ വിശ്വാസമുള്ളൂ” എന്ന വാചകവും വീഡിയോയിൽ പരാമർശിക്കുന്നുണ്ട്. ഐപിഎൽ 2026 സീസണിലെ ആദ്യ അഞ്ച് മത്സരങ്ങളിലും വിക്കറ്റ് ലഭിക്കാതെ വിഷമിച്ചിരുന്ന ബുമ്ര, ഗുജറാത്തിനെതിരായ മത്സരത്തിലെ ആദ്യ പന്തിൽ തന്നെ സായ് സുദർശനെ പുറത്താക്കി തന്റെ ഫോം വീണ്ടെടുത്തു. ബുമ്രയുടെ വരവും തിലക് വർമ്മയുടെ വെടിക്കെട്ട് സെഞ്ച്വറിയും (45 പന്തിൽ 101*) മുംബൈയ്ക്ക് 99 റൺസിന്റെ കൂറ്റൻ വിജയം സമ്മാനിച്ചു.
ആദ്യം ബാറ്റ് ചെയ്ത മുംബൈ 199/5 എന്ന സ്കോർ ഉയർത്തിയപ്പോൾ, മറുപടിക്കിറങ്ങിയ ഗുജറാത്തിന് 100 റൺസ് എടുക്കാനേ സാധിച്ചുള്ളൂ. ശുഭ്മൻ ഗിൽ, ജോസ് ബട്ട്‌ലർ തുടങ്ങിയ വമ്പന്മാരെ പവർപ്ലേയിൽ തന്നെ നഷ്ടപ്പെട്ട ഗുജറാത്തിനെ അശ്വിനി കുമാറിന്റെ 4 വിക്കറ്റ് പ്രകടനമാണ് തകർത്തത്. ഈ വിജയത്തോടെ മുംബൈ പോയിന്റ് പട്ടികയിൽ നില മെച്ചപ്പെടുത്തി.
DSP believes only in Jassi bhai! 🫂💙 pic.twitter.com/A0rOa56V3l
— Mumbai Indians (@mipaltan) April 21, 2026
