ഈ മാസം എട്ടിന് നടന്ന ഇൻഡി സഖ്യത്തിന്റെ യോഗത്തിൽ രാഹുൽ ഗാന്ധി നടത്തിയ പ്രസംഗം പുറത്തുവിട്ട് കോൺഗ്രസ്. കേരളത്തിലെ രാഷ്ട്രീയ സാഹചര്യങ്ങളെയും മുൻ മുഖ്യമന്ത്രി പിണറായി വിജയനെയും പരാമർശിച്ചുകൊണ്ട് രാഹുൽ നടത്തിയ തുറന്നുപറച്ചിൽ ഇതിനോടകം തന്നെ സോഷ്യൽ മീഡിയയിലും രാഷ്ട്രീയ വൃത്തങ്ങളിലും വലിയ ചർച്ചയായി മാറിക്കഴിഞ്ഞു.
ബിജെപിയെയും നരേന്ദ്ര മോദി സർക്കാരിനെയും താഴെയിറക്കാൻ ഇൻഡി സഖ്യത്തിന് സാധിക്കുമെന്ന ശക്തമായ ആത്മവിശ്വാസമാണ് രാഹുൽ ഗാന്ധി യോഗത്തിൽ പങ്കുവെച്ചത്. വരാനിരിക്കുന്ന പോരാട്ടത്തിൽ ബിജെപി പരാജയപ്പെടുമെന്ന് താൻ ഉറപ്പ് നൽകുന്നുവെന്ന് അദ്ദേഹം സഖ്യകക്ഷികളോട് വ്യക്തമാക്കി. എന്നാൽ മുന്നണിക്കുള്ളിൽ പ്രാദേശികമായ രാഷ്ട്രീയ വിയോജിപ്പുകൾ നിലനിൽക്കുമ്പോൾ എങ്ങനെ മുന്നോട്ട് പോകണം എന്നതിനെക്കുറിച്ചും രാഹുൽ വ്യക്തമാക്കി. കേരളത്തിലെ രാഷ്ട്രീയ സാഹചര്യങ്ങൾ ചൂണ്ടിക്കാണിച്ചായിരുന്നു രാഹുലിന്റെ ഈ പരാമർശം. രാഷ്ട്രീയ വിയോജിപ്പുകൾ ഉള്ളത് കൊണ്ട് കേരളത്തിലെ മുൻ മുഖ്യമന്ത്രി (പിണറായി വിജയൻ)യെ കെട്ടിപ്പിടിക്കാൻ തനിക്ക് കഴിയില്ലെന്നും എന്നാൽ ബിജെപിക്കെതിരെ ഒന്നുച്ചുനിൽക്കേണ്ടതുണ്ടെന്നും രാഹുൽ പ്രസംഗത്തിൽ പറയുന്നുണ്ട്
നേരത്തെയും കേരളത്തിലെത്തിയ രാഹുൽ ഗാന്ധി പിണറായി വിജയനെതിരെ കടുത്ത വിമർശനങ്ങൾ ഉന്നയിച്ചിരുന്നു. ഇതിന് പിന്നാലെയാണ് ഇൻഡി സഖ്യത്തിന്റെ അടച്ചിട്ട മുറിയിൽ നടന്ന യോഗത്തിലും രാഹുൽ വിമർശനം ആവർത്തിച്ചത്.
