കൊൽക്കത്ത നൈറ്റ് റൈഡേഴ്സ് താരം ഹർഷിത് റാണ ബിസിസിഐ സെന്റർ ഓഫ് എക്സലൻസിലെ പരിക്കിൽ നിന്നുള്ള പുനരധിവാസം വിജയകരമായി പൂർത്തിയാക്കി ഇന്ത്യൻ ടീമിനൊപ്പം ചേർന്നതായി ബിസിസിഐ ഔദ്യോഗികമായി അറിയിച്ചു. ചെന്നൈയിൽ വെച്ച് നടക്കുന്ന അഫ്ഗാനിസ്ഥാനെതിരെയുള്ള മൂന്ന് മത്സരങ്ങളടങ്ങിയ ഏകദിന പരമ്പരയിലെ അവസാന പോരാട്ടത്തിനുള്ള സ്ക്വാഡിലാണ് താരത്തെ ഉൾപ്പെടുത്തിയിരിക്കുന്നത്.
എന്നാൽ പരിക്കേറ്റ് പുറത്തിരിക്കുന്ന സ്റ്റാർ ഓൾറൗണ്ടർ ഹാർദിക് പാണ്ഡ്യയുടെ ഔദ്യോഗിക പകരക്കാരനായാണോ ഹർഷിത് റാണയെ ടീമിലെടുത്തിരിക്കുന്നത് എന്ന കാര്യത്തിൽ ബിസിസിഐ വ്യക്തത വരുത്തിയിട്ടില്ല. എങ്കിലും കാൽമുട്ടിനേറ്റ പരിക്കിനെ തുടർന്ന് ശസ്ത്രക്രിയയ്ക്ക് വിധേയനായതിനാൽ ടി20 ലോകകപ്പും ഐപിഎൽ 2026-ഉം നഷ്ടമായ റാണയ്ക്ക് അന്താരാഷ്ട്ര ക്രിക്കറ്റിലേക്ക് തിരിച്ചുവരാനുള്ള മികച്ച അവസരമാണിത്.
“അഫ്ഗാനിസ്ഥാനെതിരെയുള്ള മൂന്നാമത്തെയും അവസാനത്തെയും ഏകദിന മത്സരത്തിനുള്ള ഇന്ത്യൻ ടീമിലേക്ക് പുരുഷ സെലക്ഷൻ കമ്മിറ്റി മിസ്റ്റർ ഹർഷിത് റാണയെ ഉൾപ്പെടുത്തിയിട്ടുണ്ട്. ബിസിസിഐ സെന്റർ ഓഫ് എക്സലൻസിൽ പുനരധിവാസം പൂർത്തിയാക്കിയ റാണ ചെന്നൈയിലെ ഏകദിന ടീമിനൊപ്പം ചേർന്നു കഴിഞ്ഞു.”
ഈ മാസം അവസാനം ആരംഭിക്കാനിരിക്കുന്ന അയർലൻഡ്, ഇംഗ്ലണ്ട് പര്യടനങ്ങൾക്കുള്ള ടി20 ഇന്ത്യൻ ടീമിലും ഹർഷിത് റാണയെ നേരത്തെ തിരഞ്ഞെടുത്തിട്ടുണ്ട്. ഭാവിയിൽ ഹാർദിക് പാണ്ഡ്യയ്ക്ക് ബാക്ക്-അപ്പായി നിതീഷ് കുമാർ റെഡ്ഡിക്കൊപ്പം ഒരു പേസ് ബോളിംഗ് ഓൾറൗണ്ടറായി റാണയെയും വളർത്തിയെടുക്കാനാണ് ടീം മാനേജ്മെന്റ് ലക്ഷ്യമിടുന്നത്. വരാനിരിക്കുന്ന വിദേശ പര്യടനങ്ങൾക്ക് മുൻപ് ചെന്നൈയിലെ മൂന്നാം ഏകദിനം റാണയ്ക്ക് ആവശ്യമായ മാച്ച് പ്രാക്ടീസ് നൽകും.
അഫ്ഗാനിസ്ഥാനെതിരെയുള്ള ആദ്യ രണ്ട് ഏകദിനങ്ങളും ജയിച്ച് ഇന്ത്യ ഇതിനകം തന്നെ പരമ്പരയിൽ 2-0 ത്തിന് അജയ്യമായ ലീഡ് സ്വന്തമാക്കിയിട്ടുണ്ട്. ബാറ്റിംഗിലും ബോളിംഗിലും ഒരുപോലെ അഫ്ഗാനെ നിഷ്പ്രഭമാക്കിയ ഇന്ത്യൻ നിരയിൽ നിരവധി യുവതാരങ്ങൾ മികച്ച പ്രകടനമാണ് കാഴ്ചവെച്ചത്.
അയർലൻഡ്, ഇംഗ്ലണ്ട് പര്യടനങ്ങളും ഏഷ്യൻ ഗെയിംസും ഉൾപ്പെടെ വരാനിരിക്കുന്ന തിരക്കേറിയ അന്താരാഷ്ട്ര മത്സരക്രമം പരിഗണിച്ച്, അവസാന ഏകദിനത്തിൽ ചില മുതിർന്ന താരങ്ങൾക്ക് വിശ്രമം നൽകാൻ മാനേജ്മെന്റ് തീരുമാനിച്ചേക്കും. സ്ക്വാഡിലുള്ള മറ്റ് യുവതാരങ്ങൾക്ക് അന്താരാഷ്ട്ര വേദികളിൽ അവസരം നൽകാൻ ഈ മത്സരം ഇന്ത്യ ഉപയോഗപ്പെടുത്തിയേക്കും.
