ഐആർസിടിസി (IRCTC) ആപ്പിലൂടെയോ വെബ്‌സൈറ്റിലൂടെയോ തത്കാൽ ടിക്കറ്റുകൾ ബുക്ക് ചെയ്യാൻ ശ്രമിച്ച് നിരാശരായവർക്ക് ആശ്വാസമായി ഇന്ത്യൻ റെയിൽവേയുടെ പുത്തൻ പരിഷ്‌കാരം. ടിക്കറ്റ് ബുക്കിങ് സമയത്ത് സെർവർ സ്ലോ ആകുന്നത് തടയാൻ തങ്ങളുടെ പാസഞ്ചർ റിസർവേഷൻ സിസ്റ്റം (PRS) റെയിൽവേ പൂർണ്ണമായും നവീകരിക്കുന്നു. ഇതോടെ ടിക്കറ്റ് ബുക്കിങ് വേഗത അഞ്ചിരട്ടിയായി വർദ്ധിക്കും. നിലവിൽ ഒരു മിനിറ്റിൽ 25,000 ടിക്കറ്റുകൾ മാത്രം ബുക്ക് ചെയ്യാൻ ശേഷിയുണ്ടായിരുന്ന സിസ്റ്റം, പുതിയ അപ്‌ഗ്രേഡേഷനിലൂടെ മിനിറ്റിൽ 1.25 ലക്ഷം ടിക്കറ്റുകൾ വരെ ബുക്ക് ചെയ്യാൻ സാധിക്കുന്ന തരത്തിലേക്ക് മാറും. റെയിൽവേയുടെ സാങ്കേതിക വിഭാഗമായ ക്രിസ് (CRIS – Centre for Railway Information Systems) തങ്ങളുടെ 41-ാം സ്ഥാപക ദിനത്തിലാണ് യാത്രക്കാർക്ക് ഏറെ ഉപകാരപ്പെടുന്ന ഈ നിർണായക പ്രഖ്യാപനം നടത്തിയത്.
സാധാരണക്കാരായ ദീർഘദൂര യാത്രക്കാർക്കാണ് ഈ പുതിയ സംവിധാനം ഏറ്റവും കൂടുതൽ പ്രയോജനം ചെയ്യുക. നിലവിൽ തത്കാൽ ബുക്കിങ് ആരംഭിക്കുന്ന രാവിലെ 10, 11 സമയങ്ങളിൽ ലക്ഷക്കണക്കിന് ആളുകൾ ഒരേസമയം വെബ്‌സൈറ്റിലേക്ക് പ്രവേശിക്കുമ്പോൾ സെർവർ ഹാങ് ആകുകയോ ലോഗ് ഔട്ട് ആയിപ്പോകുകയോ ചെയ്യുന്നത് പതിവാണ്. പണം നഷ്ടമാവുകയും എന്നാൽ ടിക്കറ്റ് ലഭിക്കാതിരിക്കുകയും ചെയ്യുന്ന അവസ്ഥയ്ക്ക് ഇതോടെ ശാശ്വത പരിഹാരമാകും. എത്ര വലിയ തിരക്കുകളെയും ഒരേസമയം കൈകാര്യം ചെയ്യാൻ പുതിയ സെർവറുകൾക്ക് സാധിക്കുമെന്ന് റെയിൽവേ അധികൃതർ വ്യക്തമാക്കുന്നു. വിശേഷദിവസങ്ങളിലെയും ഉത്സവകാലങ്ങളിലെയും കടുത്ത തിരക്കിൽ ടിക്കറ്റ് എടുക്കാൻ ഇനി ബുദ്ധിമുട്ടേണ്ടി വരില്ല.
കഴിഞ്ഞ നാല് പതിറ്റാണ്ടായി ഇന്ത്യൻ റെയിൽവേയുടെ ഡിജിറ്റലൈസേഷന് പിന്നിൽ പ്രവർത്തിക്കുന്ന ക്രിസ്, സുരക്ഷാ സംവിധാനങ്ങൾ ശക്തമാക്കുന്നതിന്റെ ഭാഗമായി നിർമ്മിത ബുദ്ധി (AI) സാങ്കേതികവിദ്യയും ഇതിലേക്ക് കൊണ്ടുവരുന്നുണ്ട്. റെയിൽവേയുടെ എല്ലാ സേവനങ്ങളും ഒരൊറ്റ പ്ലാറ്റ്‌ഫോമിൽ ലഭ്യമാക്കുന്ന പുതിയ സൂപ്പർ ആപ്പായ ‘റെയിൽ വൺ’ (RailOne) വിജയകരമായി മുന്നേറുന്ന പശ്ചാത്തലത്തിലാണ് ഈ നവീകരണം. സൈബർ സുരക്ഷ ശക്തമാക്കുന്നതോടെ തത്കാൽ ടിക്കറ്റുകൾ അനധികൃത സോഫ്റ്റ്‌വെയറുകൾ ഉപയോഗിച്ച് തട്ടിയെടുക്കുന്ന മാഫിയകൾക്ക് കടുത്ത പ്രഹരമേൽക്കും. വരും മാസങ്ങളിൽ തന്നെ ഈ പുതിയ അതിവേഗ ബുക്കിങ് സംവിധാനം പൂർണ്ണ സജ്ജമാകുമെന്നും ഓൺലൈൻ ടിക്കറ്റ് ബുക്കിങ്ങിലെ കാത്തിരിപ്പിന് ഇതോടെ അറുതിയാകുമെന്നും ക്രിസ് മാനേജിങ് ഡയറക്ടർ ജി.വി.എൽ സത്യകുമാർ അറിയിച്ചു.
