ഹാംസ്ട്രിങ് പരിക്കിൽ നിന്ന് മോചിതനായി വിരാട് കോഹ്‌ലി ഇംഗ്ലണ്ടിനെതിരായ ഏകദിന പരമ്പരയ്ക്കുള്ള ഇന്ത്യൻ ടീമിലേക്ക് തിരിച്ചെത്തുന്നു. റോയൽ ചലഞ്ചേഴ്‌സ് ബംഗളൂരുവിനെ കിരീടവിജയത്തിലേക്ക് നയിച്ച ഐപിഎൽ 2026 സീസണിൽ 600-ലധികം റൺസ് അടിച്ചുകൂട്ടിയ കോഹ്‌ലിക്ക്, പരിക്ക് മൂലം അഫ്ഗാനിസ്ഥാനെതിരെയുള്ള ഏകദിന പരമ്പര നഷ്ടമായിരുന്നു. എന്നാൽ പരിക്ക് പൂർണ്ണമായും മാറിയ താരം ജൂലൈ 14-ന് ബർമിംഗ്ഹാമിൽ ആരംഭിക്കുന്ന ഇംഗ്ലണ്ടിനെതിരെയുള്ള ആദ്യ ഏകദിന മത്സരത്തിൽ തന്നെ കളിക്കുമെന്നാണ് പ്രതീക്ഷിക്കപ്പെടുന്നത്. ആദ്യ മത്സരത്തിന് മുന്നോടിയായി, ലണ്ടനിൽ വെച്ച് കോഹ്‌ലിയെ അപ്രതീക്ഷിതമായി കണ്ടുമുട്ടിയതിനെക്കുറിച്ചുള്ള രസകരമായ ഒരു അനുഭവം പങ്കുവെച്ചിരിക്കുകയാണ് ഇംഗ്ലണ്ട് താരം ജോർദാൻ കോക്സ്.
ഐപിഎല്ലിൽ ആർസിബിയിൽ കോഹ്‌ലിയുടെ സഹതാരമായിരുന്ന കോക്സ് കഴിഞ്ഞ മാസം ലണ്ടനിൽ വെച്ചാണ് അദ്ദേഹത്തെ കണ്ടത്. ഇരുവരും ഒന്നിച്ചുള്ള ചിത്രം അക്കാലത്ത് സോഷ്യൽ മീഡിയയിൽ വൻതോതിൽ പ്രചരിച്ചിരുന്നു. ആ കൂടിക്കാഴ്ച തികച്ചും സ്വകാര്യമായി വെക്കാൻ ഇരുവരും പരമാവധി ശ്രമിച്ചെങ്കിലും, തങ്ങൾ പോലുമറിയാതെ ആരോ എടുത്ത ചിത്രങ്ങൾ പുറത്തുവന്നത് തന്നെ അത്ഭുതപ്പെടുത്തിയെന്ന് കോക്സ് വെളിപ്പെടുത്തി. തങ്ങൾ സംസാരിച്ചുകൊണ്ടിരുന്നപ്പോൾ നൂറുകണക്കിന് ആളുകൾ അതിലൂടെ കടന്നുപോയെന്നും ആരും തന്നെ തങ്ങളെ തിരിച്ചറിയുകയോ ശല്യപ്പെടുത്തുകയോ ചെയ്തിരുന്നില്ലെന്നും കോക്സ് പറഞ്ഞു.
എന്നാൽ രണ്ട് മണിക്കൂറുകൾക്ക് ശേഷം ഈ ചിത്രങ്ങൾ കണ്ടോ എന്ന് ചോദിച്ച് കോഹ്‌ലി തനിക്ക് സന്ദേശമയച്ചപ്പോൾ താൻ ആകെ അമ്പരന്നുപോയതായി അദ്ദേഹം ദ ഗാർഡിയന് നൽകിയ അഭിമുഖത്തിൽ വ്യക്തമാക്കി. വിരാട് കോഹ്‌ലിയെപ്പോലൊരു വലിയ താരത്തിന്റെ വ്യക്തിജീവിതത്തിലേക്ക് കടന്നുകയറാൻ ആളുകൾ എത്രത്തോളം ആഗ്രഹിക്കുന്നു എന്നത് കഷ്ടമാണെന്നും, ആരുടെയും ശ്രദ്ധയിൽപ്പെടാതെ തികച്ചും സാധാരണക്കാരനെപ്പോലെ ജീവിക്കാനും ആസ്വദിക്കാനും ആഗ്രഹിക്കുന്ന അദ്ദേഹത്തിന് പലപ്പോഴും അതിന് സാധിക്കാറില്ലെന്നും കോക്സ് കൂട്ടിച്ചേർത്തു.
ഐപിഎൽ 2026-ൽ ആർസിബിയിൽ കളിക്കുന്ന സമയത്ത് മുൻ ഇന്ത്യൻ ക്യാപ്റ്റനായ കോഹ്‌ലിയിൽ നിന്ന് തനിക്ക് ലഭിച്ച പിന്തുണയെയും മാർഗ്ഗനിർദ്ദേശങ്ങളെയും 25-കാരനായ ഈ ഇംഗ്ലണ്ട് താരം വാനോളം പുകഴ്ത്തി. ക്രിക്കറ്റിൽ ഇത്രയധികം നേട്ടങ്ങൾ കൈവരിച്ചിട്ടും ഒരു യുവതാരമെന്ന നിലയിൽ തനിക്കായി കോഹ്‌ലി ഒരുപാട് സമയം മാറ്റിവെച്ചുവെന്നും, മറ്റുള്ളവരെ സഹായിക്കാൻ അദ്ദേഹം കാണിക്കുന്ന മനസ്സ് അങ്ങേയറ്റം സവിശേഷമാണെന്നും കോക്സ് ഓർത്തെടുത്തു. ചില കളിക്കാർ സ്വന്തം പ്രകടനത്തിൽ മാത്രം ശ്രദ്ധ കേന്ദ്രീകരിക്കുമ്പോൾ, കോഹ്‌ലി സ്വന്തം കാര്യത്തിന് മുൻപ് മറ്റുള്ളവരെ സഹായിക്കാൻ താല്പര്യം കാണിക്കുന്ന അപൂർവ്വം വ്യക്തിത്വങ്ങളിൽ ഒരാളാണെന്നും അദ്ദേഹം വിലയിരുത്തി. നിലവിൽ ഇംഗ്ലണ്ടിനെതിരായ അഞ്ച് മത്സരങ്ങളുടെ ടി20 പരമ്പര കളിക്കുന്ന ഇന്ത്യൻ ടീം ഇതിനകം തന്നെ 3-0 ന് പരമ്പര കൈവിട്ടുകഴിഞ്ഞു. പരമ്പരയിലെ അവസാന മത്സരം ശനിയാഴ്ച സൗതാംപ്ടണിൽ വെച്ചാണ് നടക്കുന്നത്.
