ബംഗളൂരു : കർണാടകയിലെ പോലീസ് പരീക്ഷാ തട്ടിപ്പുമായി ബന്ധപ്പെട്ട് ഉദ്യോഗാർത്ഥികളും പ്രതിപക്ഷവും രാജി ആവശ്യപ്പെടുന്ന സാഹചര്യത്തിൽ പരിഹാസവുമായി മന്ത്രി പ്രിയങ്ക് ഖാർഗെ. തന്റെ രാജി ആഗ്രഹിക്കുന്നവർ വേണമെങ്കിൽ 25 ദിവസം നിരാഹാരം കിടക്കുകയും തെരുവിൽ പോലീസിന്റെ ലാത്തിയടി നേരിടാൻ തയ്യാറാകണമെന്നുമുള്ള അദ്ദേഹത്തിന്റെ വെല്ലുവിളി വൻ ജനരോഷത്തിന് വഴിവെച്ചിരിക്കുകയാണ്. ഒരു ജനപ്രതിനിധിക്കും ഭരണഘടനയ്ക്കും ചേരാത്ത വിധത്തിൽ അഹങ്കാരപൂർവ്വമായ പ്രസ്താവനയാണ് പ്രിയങ്ക് ഖാർഗെയുടെ ഭാഗത്തുനിന്നും ഉണ്ടായത്. പരീക്ഷാ തട്ടിപ്പിൽ വഞ്ചിക്കപ്പെട്ട ഉദ്യോഗാർത്ഥികളുടെ ചോദ്യങ്ങൾക്ക് വ്യക്തമായ മറുപടി നൽകുന്നതിന് പകരം, ജനാധിപത്യപരമായി പ്രതിഷേധിക്കുന്ന യുവാക്കളെ പരസ്യമായി അധിക്ഷേപിക്കുകയും പരിഹസിക്കുകയും ചെയ്യുന്ന നിലപാടാണ് മന്ത്രി സ്വീകരിച്ചത്.
സബ് ഇൻസ്പെക്ടർ (പിഎസ്ഐ) പരീക്ഷാ ക്രമക്കേടിൽ വഞ്ചിക്കപ്പെട്ട ആയിരക്കണക്കിന് ഉദ്യോഗാർത്ഥികൾ നീതിക്കായി തെരുവിൽ സമരം ചെയ്തുകൊണ്ടിരിക്കുമ്പോഴാണ് മന്ത്രിയുടെ ഈ നിരുത്തരവാദപരമായ പ്രതികരണം പുറത്തുവന്നത്. വർഷങ്ങളോളം കഠിനാധ്വാനം ചെയ്ത് മത്സരപരീക്ഷ എഴുതിയ യുവാക്കളുടെ ഭാവിയെ അനിശ്ചിതത്വത്തിലാക്കിയ സർക്കാരിന്റെ വീഴ്ച മറച്ചുവെക്കാൻ ശ്രമിക്കുന്ന ഖാർഗെ, പ്രതിഷേധിക്കാനുള്ള ജനാധിപത്യ അവകാശത്തെയാണ് നിസ്സാരവൽക്കരിക്കുന്നത്. ഭരണകൂടത്തിന്റെ പരാജയങ്ങൾ ചൂണ്ടിക്കാട്ടി പ്രതിപക്ഷവും യുവജന സംഘടനകളും രംഗത്തെത്തിയപ്പോൾ, ഉദ്യോഗാർത്ഥികളുടെ കണ്ണീരിനെ കണ്ടില്ലെന്ന് നടിക്കുകയും സമരം ചെയ്യുന്നവരെ ക്രൂരമായ പോലീസ് നടപടികളിലേക്ക് തള്ളിവിടാൻ ആഹ്വാനം ചെയ്യുകയുമാണ് അദ്ദേഹം ചെയ്തത്.
പ്രിയങ്ക് ഖാർഗെയുടെ ജനവിരുദ്ധവും ക്രൂരവുമായ പരാമർശത്തിനെതിരെ കർണാടകയിലുടനീളം വൻ പ്രതിഷേധ തരംഗമാണ് അലയടിക്കുന്നത്. തൊഴിൽരഹിതരായ അനേകം യുവാക്കളെയും അവരുടെ കുടുംബങ്ങളെയും അവഹേളിച്ച മന്ത്രിയെ എത്രയും വേഗം മന്ത്രിസഭയിൽ നിന്ന് പുറത്താക്കണമെന്ന് ആവശ്യപ്പെട്ട് പ്രതിപക്ഷ കക്ഷികളും യുവജന പ്രസ്ഥാനങ്ങളും ശക്തമായ പ്രതിഷേധവുമായി രംഗത്തുണ്ട്. മാപ്പ് പറയാനോ സ്വയം തിരുത്താനോ തയ്യാറാകാത്ത മന്ത്രിയുടെ ധാർഷ്ട്യം കോൺഗ്രസ് സർക്കാരിന്റെ യഥാർത്ഥ മുഖമാണ് പുറത്തുകൊണ്ടുവന്നതെന്നും, ഭരണഘടനാ പദവിയിലിരുന്ന് പോലീസിന്റെ അതിക്രമങ്ങളെ ന്യായീകരിക്കുന്ന ഖാർഗെയുടെ നിലപാട് ജനാധിപത്യത്തിന് കളങ്കമാണെന്നും ഉദ്യോഗാർത്ഥികൾ കുറ്റപ്പെടുത്തുന്നു.
