ലോകമെമ്പാടും ഭയപ്പെടുത്തുന്ന രീതിയിൽ വർദ്ധിച്ചുവരുന്ന രോഗങ്ങളിലൊന്നാണ് തൈറോയ്ഡ് കാൻസർ. ഇന്ത്യയിലും പ്രത്യേകിച്ച് ദക്ഷിണേന്ത്യൻ സംസ്ഥാനങ്ങളിലും തൈറോയ്ഡ് കാൻസർ കേസുകൾ ഉയർന്നുവരുന്നതായാണ് പഠനങ്ങൾ വ്യക്തമാക്കുന്നത്. എന്നാൽ സമയബന്ധിതമായി തിരിച്ചറിഞ്ഞാൽ പൂർണ്ണമായി മാറ്റിയെടുക്കാവുന്ന ഒന്നാണ് ഈ രോഗം. രോഗത്തിന്റെ പ്രാരംഭ ലക്ഷണങ്ങൾ വളരെ നിസ്സാരമായതിനാലും വേദനയില്ലാത്തതിനാലും പലപ്പോഴും ആളുകൾ ഇത് തിരിച്ചറിയാൻ വൈകുന്നുവെന്നാണ് മാക്സ് സൂപ്പർ സ്പെഷ്യാലിറ്റി ആശുപത്രിയിലെ സർജിക്കൽ ഓങ്കോളജി വിഭാഗം സീനിയർ ഡയറക്ടർ ഡോ. നിതിൻ ലീഖ വ്യക്തമാക്കുന്നത്. കഴുത്തിന്റെ മുൻഭാഗത്തായി ചിത്രശലഭത്തിന്റെ ആകൃതിയിലുള്ള ചെറിയൊരു ഗ്രന്ഥിയാണെങ്കിലും ശരീരത്തിലെ ഉപാപചയ പ്രവർത്തനങ്ങളെയും ഹൃദയമിടിപ്പിനെയും താപനിലയെയും നിയന്ത്രിക്കുന്നതിൽ തൈറോയ്ഡ് വലിയ പങ്കാണ് വഹിക്കുന്നത്.
തൈറോയ്ഡ് കാൻസറിന്റെ ഏറ്റവും പ്രധാനപ്പെട്ട ആദ്യ ലക്ഷണം കഴുത്തിലുണ്ടാകുന്ന വേദനയില്ലാത്ത തടപ്പോ വീക്കമോ ആണ്. ഷേവ് ചെയ്യുമ്പോഴോ കണ്ണാടിയിൽ നോക്കുമ്പോഴോ ആഭരണങ്ങൾ അണിയുമ്പോഴോ ആണ് പലരും കഴുത്തിലെ ഇത്തരം മുഴകൾ ശ്രദ്ധിക്കുന്നത്. വിട്ടുമാറാത്ത ശബ്ദമാറ്റം അല്ലെങ്കിൽ ശബ്ദത്തിലെ ഇടർച്ചയും രോഗത്തിന്റെ പ്രധാന ലക്ഷണങ്ങളിൽ ഒന്നാണ്. ശബ്ദതന്തുക്കളെ നിയന്ത്രിക്കുന്ന ഞരമ്പുകളെ കാൻസർ കോശങ്ങൾ ബാധിക്കുമ്പോഴാണ് ഇത്തരം മാറ്റങ്ങൾ സംഭവിക്കുന്നത്. കൂടാതെ തൊണ്ടയിൽ എന്തോ കുടുങ്ങിയിരിക്കുന്നതായുള്ള തോന്നൽ, ആഹാരം ഇറക്കാനുള്ള ബുദ്ധിമുട്ട്, ശ്വാസമെടുക്കാനുള്ള പ്രയാസം, കഴുത്തിൽ നിന്ന് കാതുകളിലേക്ക് പടരുന്ന വേദന എന്നിവയും നിസ്സാരമാക്കരുത്.
കഴുത്തിലെ ലിംഫ് നോഡുകൾ വീങ്ങുന്നത്, അലർജിയോ മറ്റ് അണുബാധകളോ ഇല്ലാതെ വിട്ടുമാറാതെ നിൽക്കുന്ന വരണ്ട ചുമ എന്നിവയും തൈറോയ്ഡ് കാൻസറിന്റെ നിശബ്ദ ലക്ഷണങ്ങളാണ്. ഈ ലക്ഷണങ്ങൾ പ്രകടമാകുന്നത് രോഗം ഉണ്ടെന്നതിന്റെ ഉറപ്പല്ലെങ്കിലും അസ്വസ്ഥതകൾ നീണ്ടുനിൽക്കുകയാണെങ്കിൽ ഉടൻ തന്നെ ഡോക്ടറെ കണ്ട് പരിശോധനകൾക്ക് വിധേയമാകേണ്ടതുണ്ട്. അൾട്രാസൗണ്ട് സ്കാനിംഗ്, രക്തപരിശോധന, എഫ്എൻഎസി ബയോപ്സി എന്നിവയിലൂടെ രോഗം വളരെ വേഗത്തിൽ കണ്ടെത്താനാകും. ആദ്യ ഘട്ടങ്ങളിൽ തന്നെ രോഗം തിരിച്ചറിഞ്ഞാൽ ശസ്ത്രക്രിയയിലൂടെയോ റേഡിയോ ആക്ടീവ് അയഡിൻ തെറാപ്പിയിലൂടെയോ തൈറോയ്ഡ് കാൻസറിനെ പൂർണ്ണമായും ഭേദമാക്കാൻ സാധിക്കും.
