ഇന്ത്യൻ ക്രിക്കറ്റിന്റെ സുവർണ്ണ കാലഘട്ടത്തെ അടയാളപ്പെടുത്തിയ രണ്ട് ഇതിഹാസ താരങ്ങളായിരുന്നു എം.എസ്. ധോണിയും വീരേന്ദർ സേവാഗും. എന്നാൽ ഇവർക്കിടയിൽ ഡ്രസ്സിങ് റൂമിൽ നടന്നിട്ടുണ്ടെന്ന് ഊഹാപോഹങ്ങൾ പ്രചരിച്ച ചില ഭിന്നതകളുടെയും ശീതസമരത്തിന്റെയും കഥകൾ എന്നും ക്രിക്കറ്റ് ആരാധകർക്കിടയിൽ ചർച്ചയായിരുന്നു. 2021-ലെ അവസാന പാദത്തിൽ വിരാട് കോലിയും രോഹിത് ശർമ്മയും തമ്മിലുണ്ടെന്ന് പറയപ്പെട്ട ക്യാപ്റ്റൻ-വൈസ് ക്യാപ്റ്റൻ തർക്കത്തിന് സമാനമായ ഒരു സാഹചര്യമാണ് ഇതിന് കൃത്യം ഒരു ദശാപ്തത്തിന് മുൻപും ഇന്ത്യൻ ക്രിക്കറ്റിൽ അരങ്ങേറിയിരുന്നത്. 2009 മുതൽ 2012 വരെയുള്ള കാലഘട്ടത്തിൽ ധോണി നായകനും സേവാഗ് ഉപനായകനുമായിരുന്ന സമയത്ത് ടീമിനുള്ളിൽ അത്തരത്തിലുള്ള ചില പുകച്ചിലുകൾ ഉണ്ടായിരുന്നു.
2009-ലെ ടി20 ലോകകപ്പിന് തൊട്ടുമുമ്പ് വലിയൊരു വിവാദത്തിലാണ് ധോണി അകപ്പെട്ടത്. ടൂർണമെന്റിന് തൊട്ടുമുമ്പ് തോളിലെ പരിക്കിനെ തുടർന്ന് സേവാഗ് അവസാന നിമിഷം പിന്മാറിയത് വലിയ ദുരൂഹതയ്ക്ക് ഇടയാക്കിയിരുന്നു. മത്സരത്തിന് മുമ്പുള്ള പത്രസമ്മേളനത്തിൽ മാധ്യമപ്രവർത്തകർ ഈ പരിക്കിനെക്കുറിച്ച് ചോദിച്ചപ്പോൾ, സേവാഗിന്റെ ഫിസിയോയോട് ഒരു പ്രസ് റിലീസ് ഇറക്കാൻ ആവശ്യപ്പെടൂ എന്നായിരുന്നു ധോണിയുടെ ചുരുങ്ങിയ മറുപടി. മുതിർന്ന താരങ്ങൾ തമ്മിൽ അഭിപ്രായവ്യത്യാസങ്ങളുണ്ടെന്ന സൂചന നൽകാൻ മാധ്യമങ്ങൾക്ക് ഈ ഒറ്റ മറുപടി തന്നെ ധാരാമായിരുന്നു. ടീമിൽ ഐക്യമുണ്ടെന്ന് തെളിയിക്കാൻ ധോണിക്ക് പിന്നീട് മുഴുവൻ താരങ്ങളെയും അണിനിരത്തി ഒരു പത്രസമ്മേളനം നടത്തേണ്ടി വരുന്ന സാഹചര്യത്തിലേക്ക് വരെ കാര്യങ്ങൾ എത്തി. ആ നീക്കം ഫലം കണ്ടതോടെ തർക്കങ്ങളെക്കുറിച്ചുള്ള വാർത്തകൾ കെട്ടടങ്ങിയെങ്കിലും ആരാധകരുടെ മനസ്സിൽ നിന്ന് ആ കാലഘട്ടം മാഞ്ഞുപോയിട്ടില്ല.
1999-ൽ അരങ്ങേറ്റം കുറിച്ച സേവാഗ്, ധോണിയെക്കാൾ കരിയറിൽ സീനിയറായിരുന്നു എന്നതാണ് ഈ അഭിപ്രായവ്യത്യാസങ്ങൾക്ക് കാരണമെന്ന് കരുതപ്പെടുന്നു. ടീമിലെ മുതിർന്ന താരമെന്ന നിലയിൽ 2007-ൽ ധോണിക്ക് പകരം താൻ ക്യാപ്റ്റനാകുമെന്ന് സേവാഗ് പ്രതീക്ഷിച്ചിരിക്കാമെന്നും എന്നാൽ അത് സംഭവിക്കാതെ പോയത് അദ്ദേഹത്തിന് വിഷമമുണ്ടാക്കിയിരിക്കാമെന്നും വിലയിരുത്തപ്പെടുന്നുണ്ട്. ഒപ്പം ധോണിക്ക് പെട്ടെന്ന് ലഭിച്ച വൻ വിജയങ്ങളും സേവാഗിന് ചില അസ്വസ്ഥതകൾ ഉണ്ടാക്കിയിരിക്കാം. ഈ സംഭവവുമായി ബന്ധപ്പെട്ട് എന്തുതന്നെ ഊഹാപോഹങ്ങൾ നിലനിന്നാലും, ഇന്ത്യൻ ക്രിക്കറ്റ് ചരിത്രം കണ്ട എക്കാലത്തെയും മികച്ച ഇതിഹാസ താരങ്ങൾ തന്നെയാണ് ഇരുവരും എന്നതിൽ യാതൊരു സംശയവുമില്ല.
