പാകിസ്ഥാനിലെ വടക്കുപടിഞ്ഞാറൻ പ്രവിശ്യയായ ഖൈബർ പഖ്തുൺഖ്വയിലെ ദേരാ ഇസ്മായിൽ ഖാൻ ജില്ലയിൽ പോലീസിനെ ലക്ഷ്യമിട്ടുണ്ടായ ശക്തമായ ചാവേർ ബോംബ് സ്ഫോടനത്തിൽ 12 പേർ കൊല്ലപ്പെട്ടു. ആക്രമണത്തിൽ മുപ്പതോളം പേർക്ക് പരിക്കേൽക്കുകയും ചെയ്തിട്ടുണ്ട്. ദാറാസിന്ദ തഹസീൽ അതിർത്തിക്ക് സമീപമുള്ള അമൻ മേള പോലീസ് ചെക്ക്‌പോസ്റ്റിന് നേരെ സ്ഫോടകവസ്തുക്കൾ നിറച്ച ട്രക്റ്ററുമായി എത്തിയ ചാവേർ വാഹനം ഇടിപ്പിച്ചുകയറ്റുകയായിരുന്നു. കൊല്ലപ്പെട്ടവരിൽ രണ്ട് സ്ത്രീകളും രണ്ട് കുട്ടികളും ഉൾപ്പെട്ടിട്ടുണ്ടെന്ന് ദുരന്തനിവാരണ സേന ഔദ്യോഗികമായി അറിയിച്ചു.
ആക്രമണത്തിന്റെ ഉത്തരവാദിത്തം നിരോധിത ഭീകര സംഘടനയായ തഹ്‌രീക്-ഇ-താലിബാൻ പാകിസ്ഥാൻ (ടിടിപി) ഏറ്റെടുത്തിട്ടുണ്ട്. ചെക്ക്‌പോസ്റ്റ് പൂർണ്ണമായും തകർത്ത ഈ ആക്രമണത്തിൽ പരിക്കേറ്റ പലരുടെയും നില അതീവ ഗുരുതരമായി തുടരുകയാണെന്ന് ആശുപത്രി അധികൃതർ വ്യക്തമാക്കുന്നു. സ്ഫോടനത്തിൽ സമീപത്തുണ്ടായിരുന്ന വാഹനങ്ങൾക്കും കെട്ടിടങ്ങൾക്കും വൻ നാശനഷ്ടങ്ങൾ സംഭവിച്ചിട്ടുണ്ട്. വിവരമറിഞ്ഞ് സുരക്ഷാ സേനയും രക്ഷാപ്രവർത്തകരും സ്ഥലത്തെത്തി മൃതദേഹങ്ങളും പരിക്കേറ്റവരെയും അടുത്തുള്ള ആശുപത്രിയിലേക്ക് മാറ്റി.
കഴിഞ്ഞ ഏതാനും മാസങ്ങളായി പാകിസ്ഥാനും താലിബാനും തമ്മിലുള്ള സംഘർഷം രൂക്ഷമായിരിക്കുകയാണ്. പ്രവിശ്യയിൽ ക്രമസമാധാനം പുനഃസ്ഥാപിക്കാൻ സുരക്ഷാ സേന പരിശോധന ശക്തമാക്കിയിരുന്നെങ്കിലും അതിർത്തി പ്രദേശങ്ങളിലെ സുരക്ഷാ തടസ്സങ്ങൾ മറികടന്നാണ് ഭീകരർ വീണ്ടും ആക്രമണം നടത്തിയത്. സംഭവസ്ഥലം പൂർണ്ണമായി വട്ടമിട്ട് സൈന്യവും പോലീസും ചേർന്ന് പ്രദേശം വളഞ്ഞ് പരിശോധന ആരംഭിച്ചിട്ടുണ്ട്. പ്രവിശ്യയിൽ കൂടുതൽ സുരക്ഷാ ജാഗ്രതാ നിർദ്ദേശം നൽകിയതായി ഭരണകൂടം അറിയിച്ചു.
