സച്ചിൻ ടെൻഡുൽക്കറുമായുള്ള താരതമ്യങ്ങൾ തള്ളിക്കളഞ്ഞ് വിരാട് കോഹ്‌ലി. ക്രിക്കറ്റിനായി സച്ചിൻ നൽകിയ സംഭാവനകളും അദ്ദേഹം ചെലുത്തിയ സ്വാധീനവും കണക്കുകളുടെയും താരതമ്യങ്ങളുടെയും പരിധിക്കപ്പുറമാണെന്ന് കോഹ്‌ലി പറഞ്ഞു. സച്ചിനോടുള്ള തന്റെ ആരാധനയ്ക്കും ബഹുമാനത്തിനും യാതൊരു മാറ്റവുമില്ലെന്നും അദ്ദേഹം വ്യക്തമാക്കി.
“എനിക്ക് സച്ചിൻ പാജി എന്നും സച്ചിൻ പാജി തന്നെയാണ്. എന്റെ ആദ്യ ക്യാപ്റ്റനായിരുന്ന എം.എസ്. ധോണിയും എപ്പോഴും ധോണി തന്നെയാണ്. ഈ കാര്യങ്ങൾക്കൊന്നും എന്റെ മനസിൽ മാറ്റമുണ്ടാകില്ല,” കോഹ്‌ലി പറഞ്ഞു. നേട്ടങ്ങളുടെ പേരിൽ താൻ ഒരിക്കലും ‘ഇത്രയൊക്കെ ചെയ്തു, ഇനി എല്ലാം സ്വന്തമാക്കി’ എന്ന നിലപാടിൽ എത്തിയിട്ടില്ലെന്നും അദ്ദേഹം വ്യക്തമാക്കി.
വിനയത്തോടെ പരിശീലിക്കുകയും മികച്ച പ്രകടനം നടത്തുകയും കായികരംഗത്ത് ശരിയായ കാര്യങ്ങൾ ചെയ്യുകയും ചെയ്യുമ്പോൾ മറ്റുള്ളവരേക്കാൾ മികച്ചവനാണെന്ന് കരുതുന്ന അവസ്ഥയിലേക്ക് ഒരിക്കലും എത്തരുതെന്നും കോഹ്‌ലി പറഞ്ഞു. തന്റെ കാലഘട്ടത്തിൽ സച്ചിൻ ക്രിക്കറ്റിൽ വലിയ മാറ്റം കൊണ്ടുവന്നുവെന്നും ജനങ്ങളിൽ അദ്ദേഹം ചെലുത്തിയ സ്വാധീനം ഒരിക്കലും മറക്കാനാകില്ലെന്നും കോഹ്‌ലി കൂട്ടിച്ചേർത്തു.
വെസ്റ്റ് ഇൻഡീസിനെതിരായ ആദ്യ ഏകദിനത്തിൽ 55-ാം ഏകദിന സെഞ്ചുറി നേടിയതിന് പിന്നാലെയാണ് കോഹ്‌ലിയുടെ പ്രതികരണം. മത്സരത്തിൽ 15000 ഏകദിന റൺസ് പിന്നിട്ട കോഹ്‌ലി, ഈ നേട്ടത്തിലെത്തുന്ന ഏറ്റവും വേഗമേറിയ താരവുമായി. 303-ാം ഇന്നിങ്സിലാണ് കോഹ്‌ലി 15000 റൺസ് പൂർത്തിയാക്കിയത്. സച്ചിൻ ടെൻഡുൽക്കർ 377 ഇന്നിങ്സിലാണ് ഈ നാഴികക്കല്ല് പിന്നിട്ടത്.
അതേസമയം, ആരാധകർ തന്നെ എങ്ങനെയാണ് കാണുന്നതെന്നതിലും കോഹ്‌ലി പ്രതികരിച്ചു. ആരാധകർ തനിക്ക് നൽകുന്ന സ്നേഹത്തെ വിലമതിക്കുന്നുണ്ടെങ്കിലും അവർ കാണുന്ന വ്യക്തിയായി താൻ സ്വയം കാണുന്നില്ലെന്ന് അദ്ദേഹം പറഞ്ഞു. തന്റെ പ്രകടനങ്ങളിലൂടെയും ക്രിക്കറ്റിലൂടെയും മാത്രമാണ് ആളുകൾ തന്നെ അറിയുന്നതെന്നും, എന്നാൽ താൻ എവിടെ നിന്നാണ് വന്നതെന്ന് തനിക്ക് വ്യക്തമായി അറിയാമെന്നും കോഹ്‌ലി വ്യക്തമാക്കി.
