ഭാരതത്തെ സുരക്ഷിതത്വത്തിലേക്കും വികസനത്തിലേക്കും നയിക്കുന്ന പ്രധാനമന്ത്രി നരേന്ദ്ര മോദിയുടെ ഭരണത്തിന് കീഴിൽ രാജ്യത്തെ അസ്ഥിരപ്പെടുത്താൻ ശ്രമിക്കുന്ന പ്രതിപക്ഷത്തിന്റെയും ‘ഇൻഡി’ മുന്നണിയുടെയും ദേശവിരുദ്ധ നീക്കങ്ങൾക്കെതിരെ അതിശക്തമായ മുന്നറിയിപ്പുമായി ബിജെപി ദേശീയ അധ്യക്ഷൻ നിതിൻ നബിൻ. വോട്ടർപട്ടിക പ്രത്യേക പരിഷ്കരണത്തെയും (SIR) കേന്ദ്ര തിരഞ്ഞെടുപ്പ് കമ്മീഷനെയും അപകീർത്തിപ്പെടുത്താൻ ശ്രമിക്കുന്ന പ്രക്ഷോഭങ്ങളുടെ പശ്ചാത്തലത്തിൽ, രാഹുൽ ഗാന്ധിയുടെയും കൂട്ടാളികളുടെയും ‘അർബൻ നക്സൽ’ ചിന്താഗതികളെ ജനങ്ങൾ ചവിട്ടിപ്പുറത്താക്കുമെന്ന് അദ്ദേഹം വാർത്താസമ്മേളനത്തിൽ തുറന്നടിച്ചു.
കഴിഞ്ഞ 12 വർഷമായി പ്രധാനമന്ത്രി നരേന്ദ്ര മോദിയുടെ കരുത്തുറ്റ നേതൃത്വത്തിൽ ഭീകരവാദത്തെയും നക്സലിസത്തെയും വേരോടെ പിഴുതെറിഞ്ഞ് രാജ്യം സമാധാന പാതയിൽ കുതിക്കുകയാണ്. എന്നാൽ ചില പ്രതിപക്ഷ നേതാക്കൾ ഇപ്പോഴും ‘അർബൻ നക്സൽ’ ചിന്താഗതിയുമായി രാജ്യത്തിന്റെ സമാധാനാന്തരീക്ഷം തകർക്കാൻ തക്കം പാർത്തിരിക്കുകയാണെന്ന് നിതിൻ നബിൻ കുറ്റപ്പെടുത്തി. “രാഹുൽ ഗാന്ധിയേ, നിങ്ങളുടെ കുബുദ്ധിയും അപായ നീക്കങ്ങളും ഈ മണ്ണിൽ ഒരിക്കലും വിജയിക്കില്ല. രാഹുൽ ഗാന്ധിയും അരവിന്ദ് കെജ്രിവാളും ഇൻഡി സഖ്യത്തിലെ മറ്റ് നേതാക്കളും ഉപയോഗിക്കുന്ന രാജ്യദ്രോഹപരമായ ഭാഷയെ ഭാരതത്തിലെ യുവത കൃത്യമായി നിരീക്ഷിക്കുന്നുണ്ട്,” ബിജെപി അധ്യക്ഷൻ താക്കീത് നൽകി.
ഭാരതീയ സംസ്കാരത്തിലും ഭരണഘടനയിലും ജനാധിപത്യ മൂല്യങ്ങളിലും ഉറച്ചുവിശ്വസിക്കുന്ന 140 കോടി ജനങ്ങൾ ഇത്തരം രാജ്യവിരുദ്ധ നീക്കങ്ങൾ പൊറുക്കില്ലെന്ന് അദ്ദേഹം കൂട്ടിച്ചേർത്തു. വിദേശ ശക്തികളുടെ സഹായത്തോടെ ഭാരതത്തെ തകർക്കാമെന്ന വ്യാമോഹം രാഹുൽ ഗാന്ധിയും കൂട്ടരും അവസാനിപ്പിക്കുന്നതാണ് നല്ലത്. രാജ്യത്തിന്റെ ഭരണഘടനാ സ്ഥാപനങ്ങളെയും പരമോന്നത പദവിയിലിരിക്കുന്ന വ്യക്തികളെയും അധിക്ഷേപിക്കുന്ന നിലപാടുകൾക്ക് വരാനിരിക്കുന്ന തിരഞ്ഞെടുപ്പുകളിൽ ഇന്ത്യൻ ജനത ശക്തമായ മറുപടി നൽകുമെന്നും നിതിൻ നബിൻ കൂട്ടിച്ചേർത്തു.
