രാഷ്ട്രീയമായി കടുത്ത എതിർപ്പുകൾ നിലനിൽക്കെ, രാഷ്ട്രീയ സ്വയംസേവക സംഘത്തെയും അതിന്റെ പ്രവർത്തകരെയും പ്രശംസിച്ച് കോൺഗ്രസ് അധ്യക്ഷൻ മല്ലികാർജുൻ ഖാർഗെയുടെ മകനും കർണാടക മന്ത്രിയുമായ പ്രിയങ്ക് ഖാർഗെ. ആർ.എസ്.എസ് അംഗങ്ങൾ വളരെ നല്ലവരാണെന്നും, എന്നാൽ മാദ്ധ്യമങ്ങൾ സംഘടനയ്‌ക്കെതിരെ ബോധപൂർവ്വമായ തെറ്റായ പ്രചാരണങ്ങൾ അഴിച്ചുവിടുകയാണെന്നും അദ്ദേഹം പറഞ്ഞു.
ബെംഗളൂരുവിൽ മാധ്യമങ്ങളോട് സംസാരിക്കവെയാണ് പ്രിയങ്ക് ഖാർഗെയുടെ ഈ പരാമർശം. ആർ.എസ്.എസിന്റെ റൂട്ട് മാർച്ച് അടക്കമുള്ള പരിപാടികളുമായി ബന്ധപ്പെട്ട് മാദ്ധ്യമങ്ങൾ നൽകിയ മുൻ ധാരണകൾ തെറ്റാണെന്ന് അദ്ദേഹം വ്യക്തമാക്കി.
ആർ.എസ്.എസ് അംഗങ്ങൾ നിയമപ്രകാരമുള്ള വിവരങ്ങൾ അധികാരികൾക്ക് നൽകുകയും റൂട്ട് മാർച്ചിനായി ഔദ്യോഗികമായി അനുമതി തേടുകയും ചെയ്യുന്നുണ്ട്. ചിലയിടങ്ങളിൽ അനുമതി നിഷേധിക്കപ്പെട്ടപ്പോൾ പോലും അവർ നിയമത്തോട് സഹകരിക്കുകയാണ് ചെയ്തത്.
സംഘടന എല്ലാ ഔദ്യോഗിക നടപടിക്രമങ്ങളും നിയമങ്ങളും കൃത്യമായി പാലിക്കുന്നുണ്ടെങ്കിലും, മാധ്യമങ്ങൾ ഇതിനെതിരെ അടിസ്ഥാനരഹിതമായ വ്യാജ പ്രചാരണങ്ങളാണ് നടത്തുന്നതെന്ന് അദ്ദേഹം കുറ്റപ്പെടുത്തി.
സംഘടനാപരമായ വിവരങ്ങൾ കൃത്യമായി നൽകുന്നത് വഴി ശാഖകളുമായി ബന്ധപ്പെട്ടിരിക്കുന്ന വ്യക്തികളെക്കുറിച്ചുള്ള വ്യക്തത സർക്കാരിന് ലഭിക്കാൻ സഹായകരമാകുന്നുണ്ടെന്നും അദ്ദേഹം കൂട്ടിച്ചേർത്തു.
മുൻകാലങ്ങളിൽ ആർ.എസ്.എസിനെതിരെ കടുത്ത വിമർശനങ്ങളും നിയമനപടികൾ ഉൾപ്പെടെയുള്ള ഭീഷണികളും മുഴക്കിയിരുന്ന പ്രിയങ്ക് ഖാർഗെയുടെ ഭാഗത്തുനിന്നും ഇപ്പോൾ വന്നിരിക്കുന്ന ഈ പ്രസ്താവന രാഷ്ട്രീയ കേന്ദ്രങ്ങളിൽ വലിയ ചർച്ചകൾക്ക് വഴിവെച്ചിട്ടുണ്ട്.
