ഇന്ത്യൻ ടീമിലെ നിരന്തരമായ മാറ്റങ്ങളും പരീക്ഷണങ്ങളും ടീമിന്റെ പൂർണ്ണശേഷി പുറത്തെടുക്കുന്നതിന് തടസ്സമാകുന്നുവെന്ന വിമർശനവുമായി കൊൽക്കത്ത നൈറ്റ് റൈഡേഴ്സ് പരിശീലകനും മുൻ ഓസ്ട്രേലിയൻ താരവുമായ ഷെയ്ൻ വാട്സൺ. മുഖ്യപരിശീലകൻ ഗൗതം ഗംഭീറിന്റെ കീഴിൽ ടീമിൽ വരുത്തുന്ന നിരന്തരമായ മാറ്റങ്ങൾ കളിക്കാരുടെ സ്ഥിരതയെ ബാധിക്കുന്നുണ്ടെന്നും, കൂടുതൽ സ്ഥിരതയുള്ള ഒരു ടീമിനെ വാർത്തെടുത്താൽ ഇന്ത്യയെ തോൽപ്പിക്കുക അസാധ്യമായി മാറുമെന്നും അദ്ദേഹം അഭിപ്രായപ്പെട്ടു.
വെസ്റ്റ് ഇൻഡീസിനെതിരായ മത്സരത്തിൽ 250 റൺസ് നേടിയിട്ടും തോൽവി വഴങ്ങേണ്ടി വന്നതിന് പിന്നാലെയാണ് വാട്സണിന്റെ ഈ പ്രതികരണം. തുടർച്ചയായ മത്സരങ്ങൾ കാരണം താരങ്ങൾക്ക് വിശ്രമം നൽകേണ്ടതുണ്ടെന്ന കാര്യം സമ്മതിക്കുമ്പോഴും ബാറ്റിങ് ഓർഡറിലും പ്ലേയിങ് ഇലവനിലും കൂടുതൽ സ്ഥിരത പുലർത്തേണ്ടതുണ്ടെന്ന് ‘ഇൻ ദി മിഡിൽ വിത്ത് വാട്ടോ’ എന്ന പോഡ്‌കാസ്റ്റിൽ വാട്സൺ വ്യക്തമാക്കി.
അതേസമയം, ബാറ്റിങ് ലൈനപ്പിലെ മാറ്റങ്ങളെയും പരീക്ഷണങ്ങളെയും ന്യായീകരിച്ച് ഗൗതം ഗംഭീർ രംഗത്തെത്തി. ടി20 ക്രിക്കറ്റിൽ ഓപ്പണർമാരുടെ സ്ഥാനം മാത്രമാണ് സ്ഥിരമെന്നും മറ്റുള്ളവർ സാഹചര്യത്തിനനുസരിച്ച് ബാറ്റിങ് ഓർഡറിൽ മാറിക്കളിക്കേണ്ടി വരുമെന്നും അദ്ദേഹം വ്യക്തമാക്കി. ദുബെയെ നാലാം നമ്പറിലിറക്കിയത് നേരത്തെയും വിജയം കണ്ട തന്ത്രമാണെന്ന് റാഞ്ചിയിലെ തോൽവിക്ക് ശേഷമുള്ള വാർത്താസമ്മേളനത്തിൽ ഗംഭീർ ഓർമ്മിപ്പിച്ചു.
ഗംഭീർ ചുമതലയേറ്റ ശേഷം 63 ടി20 മത്സരങ്ങളിൽ 45 ജയങ്ങളോടെ മികച്ച റെക്കോർഡാണ് ഇന്ത്യയ്ക്കുള്ളത്. 2026-ലെ ടി20 ലോകകപ്പ് കിരീടം നിലനിർത്തിയത് ഉൾപ്പെടെയുള്ള നേട്ടങ്ങൾ ഗംഭീറിന്റെ തന്ത്രങ്ങൾക്ക് കരുത്തുപകരുന്നുണ്ടെങ്കിലും, സമീപകാലത്തെ തോൽവികളും കളിക്കാരുടെ റോളുകളിലെ അസ്ഥിരതയും ക്രിക്കറ്റ് ലോകത്ത് വലിയ ചർച്ചകൾക്ക് വഴിവെച്ചിരിക്കുകയാണ്.
