ഉത്തർപ്രദേശിൽ പ്രകൃതിദുരന്തങ്ങളിൽ ഇരയാകുന്ന കർഷകർക്കും അവരുടെ കുടുംബങ്ങൾക്കും വലിയ ആശ്വാസവുമായി മുഖ്യമന്ത്രി യോഗി ആദിത്യനാഥ്. പ്രകൃതിദുരന്തങ്ങളിൽ ജീവൻ നഷ്ടപ്പെടുന്നവരുടെ കുടുംബങ്ങൾക്കുള്ള സാമ്പത്തിക സഹായ തുക സർക്കാർ ഇരട്ടിയാക്കി പ്രഖ്യാപിച്ചു. ഇതോടൊപ്പം കർഷകരുടെ വിളനാശത്തിനുള്ള ധനസഹായത്തിൽ 25 മുതൽ 30 ശതമാനം വരെ വർദ്ധനവും വരുത്തിയിട്ടുണ്ട്. സംസ്ഥാനത്തെ പത്ത് ലക്ഷത്തിലധികം കർഷകർക്ക് ഈ തീരുമാനത്തിന്റെ നേരിട്ടുള്ള പ്രയോജനം ലഭിക്കുമെന്നാണ് വിലയിരുത്തപ്പെടുന്നത്.
പുതിയ പരിഷ്കരണമനുസരിച്ച് പ്രകൃതിദുരന്തങ്ങളിൽ മരിക്കുന്നവരുടെ ആശ്രിതർക്ക് ഇനി മുതൽ എട്ട് ലക്ഷം രൂപ ധനസഹായമായി ലഭിക്കും. മുൻപ് ഇത് നാല് ലക്ഷം രൂപയായിരുന്നു. ഏപ്രിൽ 1 മുതൽ നവംബർ 4 വരെയുണ്ടായ പ്രകൃതിദുരന്തങ്ങൾ മൂലം നാശനഷ്ടമുണ്ടായ മുഴുവൻ കർഷകരെയും ഈ പദ്ധതിയുടെ പരിധിയിൽ ഉൾപ്പെടുത്തിയിട്ടുണ്ട്. കനത്ത മഴ, ചുഴലിക്കാറ്റ്, വെള്ളപ്പൊക്കം, മിന്നൽ എന്നിവ മൂലം വ്യാപകമായി വിളനാശം നേരിട്ട കർഷകരുടെ ബാങ്ക് അക്കൗണ്ടുകളിലേക്ക് തുക നേരിട്ട് എത്തിക്കാനാണ് നിർദ്ദേശം നൽകിയിരിക്കുന്നത്.
കർഷകരുടെ ക്ഷേമവും സുരക്ഷയും ഉറപ്പാക്കാൻ സർക്കാർ പ്രതിജ്ഞാബദ്ധമാണെന്ന് മുഖ്യമന്ത്രി യോഗി ആദിത്യനാഥ് അറിയിച്ചു. ധനസഹായ വിതരണം വേഗത്തിലാക്കാൻ ബന്ധപ്പെട്ട ഉദ്യോഗസ്ഥർക്ക് കർശന നിർദ്ദേശം നൽകിയിട്ടുണ്ട്. വിളനാശത്തിന് പുറമെ പ്രകൃതിദുരന്തങ്ങളിൽ വീടുകൾ തകർന്നവർക്കും കന്നുകാലികൾ നഷ്ടപ്പെട്ടവർക്കും അർഹമായ ധനസഹായം വേഗത്തിൽ ലഭ്യമാക്കാൻ പ്രത്യേക സർവേകൾ നടന്നുവരികയാണ്. സർക്കാരിന്റെ ഈ നിർണ്ണായക തീരുമാനം സാമ്പത്തിക പ്രതിസന്ധിയിലായ കർഷക സമൂഹത്തിന് വലിയ ആശ്വാസമായി മാറി.
