നഗരത്തിൽ യുവനടിയും സംഘവും ചേർന്ന് ഡോക്ടറെ തടങ്കലിലാക്കി മർദ്ദിച്ച സംഭവത്തിലും തുടർന്നുണ്ടായ ബലാത്സംഗ കേസിലും വീണ്ടും ഞെട്ടിക്കുന്ന വഴിത്തിരിവ്. ലൈംഗിക പീഡനക്കേസിൽ പ്രതിയായ ഡോക്ടറുടെ മൊബൈൽ ഫോണിൽ നിന്ന് പന്ത്രണ്ടോളം സ്ത്രീകൾക്കൊപ്പമുള്ള അശ്ലീല ദൃശ്യങ്ങൾ ഇൻഫോപാർക്ക് പൊലീസ് കണ്ടെടുത്തു. കേസിൽ അന്വേഷണം ഊർജ്ജിതമാക്കിയതോടെ പ്രധാന പ്രതിയായ ഡോ. ജോൺസൺ കെ. വർഗീസ് നിലവിൽ ഒളിവിലാണ്.
യുവനടിയുടെ അടുത്ത ബന്ധു നൽകിയ പരാതിയിലാണ് ഇൻഫോപാർക്ക് പൊലീസ് ഡോക്ടർക്കെതിരെ ബലാത്സംഗ കുറ്റം ചുമത്തി കേസ് രജിസ്റ്റർ ചെയ്തത്. ചികിത്സയ്ക്കും സൗഹൃദത്തിനും ശേഷം ഹോട്ടലിലെത്തിച്ച് മദ്യം നൽകി അവശയാക്കി ലൈംഗികമായി പീഡിപ്പിക്കുകയും ദൃശ്യങ്ങൾ പകർത്തി ഭീഷണിപ്പെടുത്തുകയും ചെയ്തുവെന്നാണ് യുവതിയുടെ പരാതി. കേസിൽ പൊലീസ് കസ്റ്റഡിയിലെടുത്ത ഡോക്ടറുടെ ഫോൺ വിശദമായി പരിശോധിച്ചപ്പോഴാണ് 12 ഓളം സ്ത്രീകളുടെ സ്വകാര്യ ദൃശ്യങ്ങൾ ഫോണിൽ സൂക്ഷിച്ചിട്ടുണ്ടെന്ന് തെളിഞ്ഞത്.
ഡോക്ടറെ കൊച്ചിയിലെ അപ്പാർട്ട്‌മെന്റിൽ വിളിച്ചുവരുത്തി മർദ്ദിക്കുകയും ഒരു കോടി രൂപ തട്ടിയെടുക്കാൻ ശ്രമിക്കുകയും ചെയ്തെന്ന പരാതിയിൽ യുവനടിയും സുഹൃത്തുക്കളും ഉൾപ്പെടെയുള്ളവരെ കടവന്ത്ര പൊലീസ് നേരത്തെ അറസ്റ്റ് ചെയ്തിരുന്നു. എന്നാൽ പീഡന വിവരവും സ്വകാര്യ ദൃശ്യങ്ങൾ പകർത്തിയതിലുള്ള പകയുമാണ് മർദ്ദനത്തിന് പിന്നിലെന്ന ആരോപണം ഉയർന്നതോടെ കേസ് പുതിയ മാനങ്ങളിലേക്ക് കടന്നിരിക്കുകയാണ്. സംഭവത്തെ തുടർന്ന് ഡോക്ടറെ ജോലി ചെയ്തിരുന്ന പ്രമുഖ സ്വകാര്യ ആശുപത്രി മാനേജ്‌മെന്റ് പുറത്താക്കിയിട്ടുണ്ട്. ഒളിവിലുള്ള ഡോക്ടറെ കണ്ടെത്താൻ പൊലീസ് തെരച്ചിൽ ലുക്കൗട്ട് നോട്ടീസ് ഉൾപ്പെടെയുള്ള നടപടികളിലേക്ക് കടക്കുകയാണ്.
