ലാഹോറിൽ നടക്കുന്ന ലോക പഞ്ചാബി കോൺഫറൻസിൽ പങ്കെടുക്കാൻ താല്പര്യമുണ്ടെങ്കിൽ പഞ്ചാബ് മുഖ്യമന്ത്രിയും ആം ആദ്മി പാർട്ടി നേതാവുമായ ഭഗവന്ത് മന്നിന് വിസ നൽകുന്നത് പരിഗണിക്കുമെന്ന് പാകിസ്ഥാൻ. പാകിസ്ഥാൻ വിദേശകാര്യ മന്ത്രാലയ വക്താവ് സജ്ജാദ് ഹൈദർ ഖാനാണ് വാരാന്ത്യ മാധ്യമ സമ്മേളനത്തിൽ രാജ്യത്തിന്റെ നിലപാട് വ്യക്തമാക്കിയത്.
നവംബർ 27 മുതൽ 29 വരെ ലാഹോറിൽ നടക്കുന്ന ലോക പഞ്ചാബി കോൺഫറൻസിലേക്ക് (World Punjabi Conference) പങ്കാളിയാകാൻ തനിക്ക് ക്ഷണമുണ്ടെന്ന് ഒക്ടോബർ 23-ന് പഞ്ചാബ് നിയമസഭയിൽ ഭഗവന്ത് മന്ന് വ്യക്തമാക്കിയിരുന്നു. എന്നാൽ കേന്ദ്ര സർക്കാർ തനിക്ക് രാഷ്ട്രീയാനുമതി (Political Clearance) നൽകുമോ എന്ന കാര്യത്തിൽ അദ്ദേഹം സംശയം പ്രകടിപ്പിക്കുകയും ചെയ്തു. “ഫ്രാൻസിലും ജപ്പാനിലും പോകാൻ എനിക്ക് കേന്ദ്രം അനുമതി നൽകിയിരുന്നില്ല, അപ്പോൾ പിന്നെ പാകിസ്ഥാനിൽ പോകാൻ എങ്ങനെ അനുമതി തരും?” എന്നായിരുന്നു മന്നിന്റെ പരാമർശം.
ഇതിന് മറുപടിയായാണ് പാകിസ്ഥാൻ മണ്ണ് സന്ദർശിക്കാൻ മന്ന് താല്പര്യം പ്രകടിപ്പിക്കുകയാണെങ്കിൽ വിസ അനുവദിക്കുന്നത് പരിഗണിക്കാമെന്ന് പാകിസ്ഥാൻ വിദേശകാര്യ മന്ത്രാലയം അറിയിച്ചത്. എന്നാൽ ഭഗവന്ത് മന്നിന് യാത്രാാനുമതി നൽകേണ്ടതുണ്ടോ എന്നത് പൂർണ്ണമായും ഇന്ത്യയുടെ ആഭ്യന്തര വിഷയമാണെന്നും വക്താവ് കൂട്ടിച്ചേർത്തു. ഇതോടൊപ്പം സിഖ്, ഹിന്ദു തീർത്ഥാടകർ ഉൾപ്പെടെ പതിനായിരക്കണക്കിന് ഇന്ത്യൻ തീർത്ഥാടകർക്ക് ബാബ ഗുരു നാനാക് ദേവ്ജിയുടെ പ്രകാശ് പർവിനോടനുബന്ധിച്ച് വിസ അനുവദിച്ചിട്ടുണ്ടെന്നും ടാക്സിലയിലെയും തഖ്ത്-ഇ-ബാഹിയിലെയും ബുദ്ധ പാരമ്പര്യ കേന്ദ്രങ്ങൾ സംരക്ഷിക്കാൻ പ്രത്യേക ടാസ്ക് ഫോഴ്സ് രൂപീകരിച്ചിട്ടുണ്ടെന്നും പാകിസ്ഥാൻ വ്യക്തമാക്കി.
