സന്നിധാനം: ചിത്തിര ആട്ടവിശേഷ പൂജകൾക്കായി നട തുറന്ന ശബരിമല സന്നിധാനത്ത് തിരുവിതാംകൂർ ദേവസ്വം ബോർഡിന്റെ ഒരുക്കങ്ങളെല്ലാം പാളിയെന്ന ആരോപണവുമായി ഭക്തജനങ്ങളും തീർഥാടകരും. പൂജകൾക്കായി നടതുറന്ന് ഒറ്റ ദിവസം കൊണ്ട് തന്നെ സന്നിധാനത്ത് അപ്പത്തിന്റെ സ്റ്റോക്ക് പൂർണ്ണമായും തീർന്നു. ഇതോടെ പമ്പയിൽ നിന്നും മരക്കൂട്ടത്തുനിന്നും എത്തിയ ആയിരക്കണക്കിന് അയ്യപ്പഭക്തരാണ് അപ്പവും അരവണയും ലഭിക്കാതെ മണിക്കൂറുകളോളം വരിനിന്ന് കടുത്ത ദുരിതത്തിലായത്.
മണ്ഡല-മകരവിളക്ക് തീർഥാടനത്തിന് മുന്നോടിയായി എല്ലാ ക്രമീകരണങ്ങളും സജ്ജമാണെന്ന ദേവസ്വം ബോർഡിന്റെ അവകാശവാദങ്ങൾ ഇതോടെ കടുത്ത വിമർശനത്തിനിടയാക്കിയിരിക്കുകയാണ്. ആട്ടവിശേഷത്തിനായി വെള്ളിയാഴ്ച വൈകീട്ട് നട തുറന്നതുമുതൽ പ്രസാദവിതരണ കൗണ്ടറുകളിൽ അനിയന്ത്രിതമായ ജനത്തിരക്കാണ് അനുഭവപ്പെട്ടത്.ഭക്തരുടെ നീണ്ട നിര നീണ്ടിട്ടും ഓൺലൈൻ ബുക്കിങ് കൗണ്ടറുകൾ ഉൾപ്പെടെ വെറും ആറ് കൗണ്ടറുകൾ മാത്രമാണ് പ്രവർത്തനസജ്ജമാക്കിയത്. തിരക്ക് വർദ്ധിച്ച സാഹചര്യത്തിൽ കൂടുതൽ കൗണ്ടറുകൾ തുറക്കാനോ അധിക ജീവനക്കാരെ നിയോഗിക്കാനോ ബോർഡിന്റെ ഭാഗത്തുനിന്ന് യാതൊരു നടപടിയുമുണ്ടായില്ലെന്ന് ഭക്തർ കുറ്റപ്പെടുത്തുന്നു.
കഴിഞ്ഞ മൂന്നുവർഷമായി ചിത്തിര ആട്ടവിശേഷ സമയത്ത് ശബരിമലയിൽ എത്തുന്ന അയ്യപ്പഭക്തരുടെ എണ്ണത്തിൽ വലിയ വർധനവാണുണ്ടാകുന്നത്. പ്രത്യേകിച്ച് തമിഴ്‌നാട്, കർണാടക, ആന്ധ്രപ്രദേശ് തുടങ്ങിയ ഇതര സംസ്ഥാനങ്ങളിൽ നിന്നുള്ള ഭക്തരുടെ വരവ് ഇത്തവണയും മുൻകൂട്ടി പ്രവചിക്കപ്പെട്ടിരുന്നു. എന്നാൽ തീർഥാടകരുടെ ഈ കുത്തൊഴുക്ക് കണക്കിലെടുത്ത് മതിയായ അളവിൽ അപ്പം നിർമ്മിച്ച് സൂക്ഷിക്കാനോ പ്രസാദ വിതരണം വേഗത്തിലാക്കാനോ അധികൃതർക്ക് കഴിഞ്ഞില്ല.
കൗണ്ടറുകളിലെ ജീവനക്കാരുടെ മെല്ലെപ്പോക്കും പ്രതിസന്ധി രൂക്ഷമാക്കി. പ്രധാന തീർഥാടന കാലമായ മണ്ഡല-മകരവിളക്ക് മഹോത്സവത്തിന് ദിവസങ്ങൾ മാത്രം ശേഷിക്കെ, ഒരു ദിവസം മാത്രം നട തുറന്നപ്പോൾ പോലുമുണ്ടായ ഈ വലിയ ആസൂത്രണമില്ലായ്മ വരും ദിവസങ്ങളിൽ കൂടുതൽ വെല്ലുവിളിയാകുമെന്ന ആശങ്കയിലാണ് ഭക്തർ.
