ഒറ്റ സ്കൂട്ടറിൽ അഞ്ചുപേർ കയറി അപകടകരമായ രീതിയിൽ യാത്ര ചെയ്ത കോളേജ് വിദ്യാർത്ഥികൾക്കെതിരെ കർശന നടപടിയുമായി മോട്ടോർ വാഹന വകുപ്പ് (MVD). തൃക്കാക്കര പൈപ്പ് ലൈൻ റോഡിലൂടെയായിരുന്നു വിദ്യാർത്ഥികളുടെ നിയമലംഘനവും സാഹസിക യാത്രയും. സംഭവത്തിന്റെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിച്ചതോടെയാണ് എൻഫോഴ്സ്മെന്റ് വിഭാഗം ഇടപെട്ട് പിഴ ചുമത്തുകയും തുടർനടപടികൾ സ്വീകരിക്കുകയും ചെയ്തത്.
ഒരാൾ സ്കൂട്ടർ ഓടിക്കുകയും മറ്റ് നാല് പേർ പിന്നിലും മുന്നിലുമായി തിങ്ങിനിറഞ്ഞിരിക്കുകയും ചെയ്യുന്ന വീഡിയോയാണ് സോഷ്യൽ മീഡിയയിൽ വൈറലായത്. യാത്രക്കാരിൽ പലരും ഹെൽമറ്റ് ധരിച്ചിരുന്നില്ല. ദൃശ്യങ്ങൾ ശ്രദ്ധയിൽപ്പെട്ട മോട്ടോർ വാഹന വകുപ്പ് ഉദ്യോഗസ്ഥർ വാഹനത്തിന്റെ രജിസ്ട്രേഷൻ നമ്പർ കേന്ദ്രീകരിച്ച് നടത്തിയ അന്വേഷണത്തിലാണ് തൃക്കാക്കരയിലെ പ്രമുഖ സ്വകാര്യ കോളേജിലെ വിദ്യാർത്ഥികളാണ് ഇവരെന്ന് തിരിച്ചറിഞ്ഞത്.
തുടർന്ന് അഞ്ച് വിദ്യാർത്ഥികളെയും എറണാകുളം ആർ.ടി. ഓഫീസിലേക്ക് വിളിച്ചുവരുത്തി. സ്കൂട്ടർ ഓടിച്ചിരുന്ന വിദ്യാർത്ഥിയുടെ ഡ്രൈവിംഗ് ലൈസൻസ് സസ്പെൻഡ് ചെയ്യുന്നതിന് മുന്നോടിയായി കാരണം കാണിക്കൽ നോട്ടീസ് നൽകിയിട്ടുണ്ട്. അനുവദനീയമായതിലും അധികം ആളുകളെ വാഹനത്തിൽ കയറ്റിയതിന് വാഹന ഉടമ 1,000 രൂപയും, ഹെൽമറ്റ് ധരിക്കാതെ യാത്ര ചെയ്ത മൂന്ന് വിദ്യാർത്ഥികൾ 500 രൂപ വീതവും പിഴയൊടുക്കണം.
എന്നാൽ കേവലം പിഴയൊടുക്കി നിയമനടപടികളിൽ നിന്ന് തലയൂരാൻ അനുവദിക്കില്ലെന്ന കർശന നിലപാടിലാണ് മോട്ടോർ വാഹന വകുപ്പ്. മക്കളുടെ ഇത്തരം അപകടകരമായ പ്രവണതകളെക്കുറിച്ച് രക്ഷിതാക്കളെയും ബോധ്യപ്പെടുത്താൻ ഉദ്യോഗസ്ഥർ തീരുമാനിച്ചു. ഇതിന്റെ ഭാഗമായി അഞ്ച് വിദ്യാർത്ഥികളും മാതാപിതാക്കൾക്കൊപ്പം മോട്ടോർ വാഹന വകുപ്പിന്റെ പ്രത്യേക റോഡ് സുരക്ഷാ ബോധവത്കരണ ക്ലാസിൽ നിർബന്ധമായും പങ്കെടുക്കണമെന്ന് എൻഫോഴ്സ്മെന്റ് വിഭാഗം നിർദ്ദേശം നൽകിയിട്ടുണ്ട്. സമൂഹമാധ്യമങ്ങളിൽ ലൈക്കുകൾക്കും റീച്ചിനും വേണ്ടി യുവാക്കൾ നടത്തുന്ന ഇത്തരം അപകടയാത്രകൾക്കെതിരെ വരും ദിവസങ്ങളിലും കർശന പരിശോധന തുടരുമെന്ന് അധികൃതർ മുന്നറിയിപ്പ് നൽകി.
