അർജന്റീന ഫുട്ബോൾ ടീമിനെയും ഇതിഹാസ താരം ലയണൽ മെസിയെയും കേരളത്തിലെത്തിക്കാമെന്ന് വാഗ്ദാനം ചെയ്ത് നടത്തിയ സ്പോൺസർഷിപ്പ് തട്ടിപ്പ് കേസിൽ മുൻ കായികമന്ത്രി വി. അബ്ദുറഹ്മാനെ പ്രോസിക്യൂട്ട് ചെയ്യാൻ ഗവർണർ ഓം പ്രകാശ് മാത്തൂർ അനുമതി നൽകി. അഴിമതി നിരോധന നിയമപ്രകാരം മുൻ മന്ത്രിയെ കേസിൽ പ്രതി ചേർത്ത് അന്വേഷണം മുന്നോട്ട് കൊണ്ടുപോകുന്നതിനുള്ള ഫയലിലാണ് ഗവർണർ ഒപ്പുവെച്ചത്. മുൻ ഗവർണർ രാജേന്ദ്ര അർലേക്കറുടെ കാലത്ത് സംസ്ഥാന സർക്കാർ ഈ ആവശ്യമുന്നയിച്ച് രാജ്ഭവനെ സമീപിച്ചിരുന്നെങ്കിലും തീരുമാനം നീണ്ടുപോവുകയായിരുന്നു. പുതിയ ഗവർണർ ചുമതലയേറ്റ ശേഷം ഫയലുകൾ വിശദമായി പരിശോധിക്കുകയും നിയമോപദേശം തേടുകയും ചെയ്ത ശേഷമാണ് അനുമതി നൽകിയത്.
എ.ഡി.ജി.പി പി. വിജയന്റെ നേതൃത്വത്തിലുള്ള പ്രത്യേക അന്വേഷണ സംഘം (എസ്.ഐ.ടി) സമർപ്പിച്ച റിപ്പോർട്ടിന്റെ അടിസ്ഥാനത്തിലാണ് ഈ നിർണ്ണായക നടപടി. ടെൻഡർ നടപടികളും കൃത്യമായ മാനദണ്ഡങ്ങളും പാലിക്കാതെ റിപ്പോർട്ടർ ബ്രോഡ്കാസ്റ്റിംഗ് കമ്പനിക്ക് (ആർ.ബി.സി) അന്യായമായ സാമ്പത്തിക ലാഭമുണ്ടാക്കാൻ അബ്ദുറഹ്മാൻ ഔദ്യോഗിക പദവി ദുരുപയോഗം ചെയ്തുവെന്നാണ് അന്വേഷണ സംഘത്തിന്റെ പ്രധാന കണ്ടെത്തൽ. അർജന്റീന ഇടപാടിന്റെ മറവിൽ നടന്ന വഴിവിട്ട നീക്കങ്ങളിലൂടെ സർക്കാരിന് കോടികളുടെ സാമ്പത്തിക നഷ്ടമുണ്ടായെന്നും സർക്കാർ രേഖകൾ ദുരുപയോഗം ചെയ്തെന്നും റിപ്പോർട്ടിൽ വ്യക്തമാക്കുന്നു.
വി. അബ്ദുറഹ്മാനെ കൂടാതെ അദ്ദേഹത്തിന്റെ മുൻ പ്രൈവറ്റ് സെക്രട്ടറി സി. സത്യപാലൻ, കേരള സ്പോർട്സ് കൗൺസിൽ മുൻ പ്രസിഡന്റ് യു. ഷറഫലി, റിപ്പോർട്ടർ ബ്രോഡ്കാസ്റ്റിംഗ് കമ്പനി, കമ്പനി ഉടമ ആന്റോ അഗസ്റ്റിൻ എന്നിവരെയും കേസിൽ പ്രതി ചേർക്കാൻ എസ്.ഐ.ടി ശുപാർശ ചെയ്തിട്ടുണ്ട്. മന്ത്രിയായിരുന്ന അബ്ദുറഹ്മാന്റെ നിർദ്ദേശപ്രകാരമാണ് സ്പോൺസർഷിപ്പ് കരാർ നൽകിയതെന്ന് മുൻ പ്രൈവറ്റ് സെക്രട്ടറി സി. സത്യപാലൻ നേരത്തെ അന്വേഷണ സംഘത്തിന് മൊഴി നൽകിയിരുന്നു. ഗവർണറുടെ പ്രോസിക്യൂഷൻ അനുമതി ലഭിച്ചതോടെ മുൻ മന്ത്രിയെ പ്രതി ചേർക്കാനും ചോദ്യം ചെയ്യൽ ഉൾപ്പെടെയുള്ള തുടർ നിയമനടപടികളിലേക്ക് കടക്കാനും അന്വേഷണ സംഘത്തിന് സാധിക്കും.
