ജമ്മു കശ്മീരിലെ കിഷ്ത്വാർ ജില്ലയിൽ സൈന്യത്തിനൊപ്പം പട്രോളിങ്ങിൽ ഏർപ്പെട്ടിരുന്ന രണ്ട് സ്പെഷ്യൽ പോലീസ് ഓഫീസർമാരെ (SPO) ദുരൂഹസാഹചര്യത്തിൽ കാണാതായി. സ്പെഷ്യൽ ഓപ്പറേഷൻസ് ഗ്രൂപ്പിലെ (SOG) അംഗങ്ങളായ രഷ്പാൽ കുമാർ (45), ബാബി ചന്ദ് (57) എന്നിവരെയാണ് കാണാതായത്. ഇവരെ കണ്ടെത്തുന്നതിനായി ഇന്ത്യൻ സൈന്യവും സി.ആർ.പി.എഫും (CRPF) ജമ്മു കശ്മീർ പോലീസും സംയുക്തമായി വനമേഖലയിൽ ശക്തമായ തിരച്ചിൽ ആരംഭിച്ചിട്ടുണ്ട്.
കിഷ്ത്വാർ ജില്ലയിലെ മർവാർ-ദച്ചൻ മേഖലയിൽ ബുധനാഴ്ച ഉച്ചയോടെയാണ് സംഭവം. കിയാർ ക്യാമ്പിൽ നിന്ന് 17 രാഷ്ട്രീയ റൈഫിൾസ് (17 RR) സൈനികർക്കൊപ്പം ബസാന മേഖലയിലെ താൽക്കാലിക സൈനിക പോസ്റ്റിലേക്ക് പട്രോളിങ് നടത്തുന്നതിനിടെയാണ് ഇരുവരെയും കാണാതായത്. ആയുധങ്ങൾ സഹിതമാണ് ഉദ്യോഗസ്ഥരെ കാണാതായതെന്ന് റിപ്പോർട്ടുകൾ സൂചിപ്പിക്കുന്നു.
ഉദ്യോഗസ്ഥരെ കാണാതാകുന്നതിന് തൊട്ടുമുമ്പ് കിയാറിനും ദെഹാർണയ്ക്കും ഇടയിലുള്ള ഉൾവനത്തിൽ വെടിയൊച്ച കേട്ടതായി പ്രദേശവാസികൾ പറയുന്നു. തുടക്കത്തിൽ ഇവരുടെ മൊബൈൽ ഫോണുകൾ പ്രവർത്തനക്ഷമമായിരുന്നെങ്കിലും പിന്നീട് സ്വിച്ച് ഓഫ് ആവുകയായിരുന്നു. മൊബൈൽ നെറ്റ്‌വർക്ക് തീരെ കുറവുള്ള ദുർഘടമായ മലയോര വനമേഖലയാണിത്.
സംഭവത്തിന് പിന്നിൽ ഭീകരവാദികളുടെ സാന്നിധ്യമുണ്ടോയെന്ന കാര്യം സുരക്ഷാ സേന ഗൗരവമായി പരിശോധിച്ചുവരികയാണ്. മുൻപ് ഹിസ്ബുൾ മുജാഹിദീൻ ഭീകരരുടെ പ്രധാന താവളമായിരുന്ന ഈ മലനിരകളിൽ ഭീകരർ ഒളിച്ചിരിക്കുന്നുണ്ടോ എന്ന സംശയവും ശക്തമാണ്. കൂടുതൽ സൈനിക സംഘത്തെ പ്രദേശത്തേക്ക് അയച്ചിട്ടുണ്ടെന്നും വനമേഖല അരിച്ചുപെറുക്കിയുള്ള തിരച്ചിൽ ഊർജ്ജിതമായി തുടരുകയാണെന്നും ഉന്നത പോലീസ് ഉദ്യോഗസ്ഥർ അറിയിച്ചു.
